Read Nyishi HABAKKUK 2 Bible Online

HABAKKUK 2 - Nyishi bible

HABAKKUK 2

¹Ngoqg rvkyko swwrw lwkw dvqgw ho ngo daqtayin hoo soja aoho ngo atv dootayin, hoo mwv ngam hoggv betayin ham ngo tuugabl kaatayin, hoo ngo hoggv timbnam hoq pagoqkam ngo birwqtayin.

²Hoo At Sw ngam birwqnum: Nyiqry kaanam mam xeqto; ham lwpia aoho kvvbw dvb xeqto, ho hiyv sam poory tan mwv nyebia jaqb ritayin.

³Hvbjaqkam nyiqry kaanamv sija godab hoqg xipnam moodv haama ta; si nyebia jaqb haata do-si vm mvvram. Soq si oyu kidy nyiloqkam, sam kaaya to; soq si hoggub nyijaqkam haatayin; soq si oyu ram.

⁴“Kaato, mwwg yvjv goobum-gooiyiq gooca do; hoqhv mwwg uraho dvrwq kuma, hvbmabde jvqtw bov mwwg mwwjwnam hoqgv swwtayin.

⁵“Hoq aoho, opo si nyepinbo akv, larnbo nyi akv nywywngam doonu maadwn. Mwwg cwwnamv Sux-ywlw hwdgo taqt dvn; sinam xaqb mwv nywywngam xumt maadwn. Mwv nyob nyi mwlwngam mwwg atgab nookum dvn hoo nyiilu mwlwngam mwwg atwg hvb nookum dvn.”

⁶‍Soq mwlw si mwam bulv ceekol bej-beparl benyi-beyal ramyv, hoo mwwg gab nwwtam bvlam gob nyiram yv, hoo bedo, “Mwam mwwdwq mvto hiyv pookuml ap pan hoggv mwwg atwg maasu— ho hog hwd oyu go?— hoo dingrnam tulu lvgab mwv atam paateq tvl doodwn!”

⁷Haqmapaqb noqg cwwrwqbo tuluhv daqrab ramyv, hoo bulug huurabnamv nam bos dvb mvram yv? Ho bul gab no ocu-aiya gob nyitayin.

⁸Hoggab no nyob nyiilungam naleqgo naalil naareqnum, boumnam nyiilu mwlwngv nam naalil naareq tayin, Hoggab mengnam-puqnam mvla swcw nvg yolu-swcinv, bopam tulu bvla ho hoqho doogw bo tulug aoho haatayin.

⁹Hiyv alman hoqgv mwwg nam gab nookum pan mwam mwwdwq dwqmto, mwwg osup pam aoho sup dvn, un-tar mvgnam hoqgv wc maab cumciqb doodwb!

¹⁰Noqg nam gab no hvnywngam nyipup paku nyiilungam naleqgo meng gam gab; noqg swwgam no mutuml ap pakun.

¹¹Hoggab wlwngv cwqc hoqgv sogoq goqlin tayin, hoo svvda xaapo hoqgv birwq tayin.

¹²“Hiyv hijum lvgab pamda ak ywrpan mwam mwwdwq dwqmto hoo nyimur aoho bopam ak kaapanum!

¹³Kaato, soq si nyiit At Sw hoqgv maai yv ho nyiilungv wm gab bon nyitwqdo, hoo nyob nyiilungv bulv atv hog doomab mwwdwq dwqdo?

¹⁴Hoggab At Swg yuunam cengnamv swcwngam bwwr tayin, issiv hoggub sa-svlongam hwwiyumnam hvb.

¹⁵Hiyv mwwg door-doopwngam twwdwb mvdwn mwam mwwdwq dwqmto- noqg hang lingtwrnam mam no toolin to hoo bulam twwxum mvto, bulug talonam mam atam kaapa mvto!

¹⁶Yuunam mam kaapa tanbov no hvnyw yaangam kaapa tayin. Twwto, no atv, hoo noqg pepaql-mux mvmanam mam kaakin to! At Swg lvqbwq alaq pvtaqkv noqg taqg-loosaqb haatayin, hoo vcjaqb hvnywngv noqg yuunam aoho haatayin!

¹⁷Lebanonam kwr-korwb noqg nyiknamv nam mviya tayin, svdin mwlwngam bulam bos belaml twrmnam hvb, mengnam-puqnam mvla swcw nvg yolu-swcinv, bopam tulu bvla ho hoqho doogw bo tulug aoho haatayin.

¹⁸“Hoggv murtig niqtuqkv hwdlo hoqham mvnbov mvp yukun, dvvcw guss akv, vm mvvnam mam tomswrbo akv? Hwdlo mwv agam gooma bo murty tulungam mvlin tvl hoqham mvnbov atwg mwwg mvlinam mam mwwgw dvn!

¹⁹hiyv svpongam huurabto hvl bedwn, mwam mwwdwq mvto; jimy-jema bo wlwngv, gorabto! Si tomswr swrnyi tan yv? Kaato, soq sam hunv la rupv vgw dvb pvvlwqpa; hoo hoqhv saqnam akkam dooma dvn.

²⁰Hvbmabde At Sw mwwg dvrwqbo namlo uraho doodwn; hoqgab swcw mwlwngv mwwg agaho cooikab dooto.”