Read Nyishi HABAKKUK 3 Bible Online

HABAKKUK 3 - Nyishi bible

HABAKKUK 3

¹Sigionotwg bekjaqb Nyiqry kaanbo Habakkukwg swgwl konam.

²At Swa, noqg pui betamnam mam ngo tapa paku, hoo At Swa, noqg bonam nyinam mam, ngo bosdvn yv. Vnyw tulug pengko lo hoqham lokta swwdar mvto; vnyw tulug pengko lo hoqham cengm dvb mvto; hang lingtwrnam uraho aya mwwpa tvb.

³Teman hoqgv Pwnbov, hoo puutu Paran hoqgv dvrwqbo Akv haanum. Doangam mwwg yuunamv tomlupnum, hoo swcw sam mwwg paqnamv bwwrnum.

⁴Mwwg puulungv huto hvb nyinum; lvlaqkv mwwg alaq hoqgv bioqlinum; hoo tolo mwwg huqlwngam mwv putumnum.

⁵Mwwg otuqb topum-yorupv wnum, hoo mwwg ludho swcin-taiyaqkv wmin gvnum.

⁶Mwv daql swcw sam xikanum; mwv nyob nyiilungam tuugabl kaal hwqdinum; ho kuiyum namgub puutu tulungv cwrsaq-twqb nyinum; kuiyum namgub yorn tulungv akob yoqlwqnum. Mwwg lamtangv kuiyum xaqb dooky dvn.

⁷Ngo Kus nyi tulug doogw ho duqtwr-duqnam mam kaapanum; Midian nyookwg tortumnanv tvmdwrnum.

⁸At Swa, hwdlo noqg svpur tulu aoho no wiyikho, noqg ywwlinam ceriot aoho wiyikho, noqg hang lingtwrnamv pobu tulungam ceeko namyv? Noqg haaxaqnamv pobu tulungam ceeko namyv, hvbmab noqg haaxaqnamv sa-svlongam ceeko namyv?

⁹Noqg illy lexangam no xwwyiq-xwxeql tumdwrnum, uppuq lo vi gok hvl goqnam. No swcwngam pobu tulu lvgab tvqnyi gob mvnum.

¹⁰Gvda puutu mwlwngv nam kaanum hoo hv hwqkub-hwqxeqnum; vcjaqb suduq-duql iss tonbov nuug nukun; iss ura hoqgv jaq yalam dulin mvnum; ao jaqb hoq alaqkam icanum.

¹¹noqg uppuq huto ho bulv jarl wdwkho, noqg kwlwq-kvlaqbo nwwxongv bioql wdwkho doonyiv la poolv bulug dook ho biimab doonum.

¹²Swcw nvg pengkob no bos kaapa dvb wpeqnum; noqg haaxaqnam hoqgv nyob nyiilungam swqmwqnum.

¹³Noqg nyiilungam ywwtab no lvvgwb lengnum, noqg xuqknum mam ywwlin taab. Nyicbo namwg atam no vmwq yumgub mvnum, xarpo hoqgv lwwpo nagub mwam asar dvb pvvl apnum.

¹⁴Mwwg atwg uppuqkv mwwg nyob pagbo at akam no vblwqnum, hiyv cwkeq-lemeq dooi hvb ngam cwrsaq-bvraqb mvtab, hoo hwnyir-hvmarl jwwgw boam kvsil mvpaqtab haanum.

¹⁵Noqg svpur tulu lvgab no sa-svlongam, ator jaqb iss nyiipo bvleqboam caajabnum.

¹⁶Ngo tapanam, hoo ngoqg gvngv tvmdwr dvn; ngoqg nabor yalv yadin dvn; ngoqg alongv yaadwn hvb nyidwn; ngoqg lvpiangv tvmdwr dvn. Hvbsujaqkam ngulam nyob patab haanbo nyi tulug aoho, haady bo vs-axaq aal gob ngo cooikab kaaya yaal dootayin,

¹⁷Taoq svvn tulungv opu puuma sujaqkam, ho roo tulungv aaxy xeema sujaqkam, olib pv osuq sujaqkam hoo rongo rwqtaqkv dvs-twws lengma sujaqkam, sibin-svv luutv twryum jaqkam hoo tuun-meengv dook maajaqkam,

¹⁸hvbsujaqkam ngo At Swn hwnyir-hvmar tayin; ngam ywwlin bo Pwnbog uraho ngo hempam naatayin.

¹⁹Pwnbo, At Sw, ngoqg atorv; mwv ngoqg lvpiangam sudum lvpia hvb mvdwn; mwv ngam ngoqg aobo nyookub wm dvn. Rwwxw-gung ga lvgab; bemin begbov begdvn.