Read Nyishi JAPANIYA 1 Bible Online

JAPANIYA 1 - Nyishi bible

JAPANIYA 1

¹At Swg gomcwrv Kusi gv ko tuup Japaniya haanum, Gedalia gv ko tuup, Amariya gv ko tuup, Hejekiya gv ko tuup, Amonwg ko tuup Josiya, Judag lvpw atwb swwd aalho.

²“Swcw nvg ao soqg hog luucw luutam ngo twrkub aadob nuupaq mvtayin,” At Sw bibwqdo.

³“Ngo nyiingam la svdinam aadob nuupaq mvtayin; doa pvtangam hoo sa-svlog nguiyam ngo aadob nuupaq mvtayin, hoo nyicbo lvgab yvqmwq mvnam. Swcw nvg ao soqgv ngo nyia koam mingtwr tayin,” At Sw bibwqdo.

⁴“Judangam la Jerusalemho doonbo mwlwngam ngoqg alaqkv ceekol ijin tayin; hoo soq nyook soqgv ngo boumnam Baalamnvn mvpaqtayin hoo nyub tulu lvgab murty xumn bo nyub tulug eminam kam ngo mvpaqtayin,

⁵hiyv mwwlo aoho doag nyiit atam pvxwl xumdwn, hiyv At Swn dingr pvxwl xumpel hoo hvbsujaqkam Milkom mamkam dingrnam,

⁶hiyv At Swn wmin gvnbov wkur kunum, hiyvkam At Swn meegaq maadwn ho mwv tox-tataql pui naakam maanam.”

⁷Pwnbo At Swg agaho cooikab dooto! Hoggab At Swg aal ogum duku; At Sw pwr jidwn mwx-mvaq paku hoo mwwg nyiin tulungam darxaq paku.

⁸Hoo At Swg pwr jid aalho — “Saab tulu ngamla lvpw atwg nyega ko tulungam ngo laqm-baqm tayin hoo bul mwlwngv atv nyoodo vjam nookuml kootayin.

⁹Hoq aalam hiyv viyap dwqtamb lukum tvl jaabo tayin ngo vxiam laqm-baqm tayin, hoo hiyv yolu-swcin bvla xaalyonam lvgab bulug nyiit atwg nammam bwwr mvpa kun.

¹⁰“Hoq aalam, “At Sw bibwqdo,” “Ngui Toggoq hoqgv kiir noonam mam, Door-doopw nam hoqgv sigin ginam, yorn tulu hoqgv yoqlnam yalam tapa tayin.

¹¹Kwm-kor mvk haty ho doonbo mwlwngv, sigin gingto! Hoggab kwm-kor mvnbo mwlwngv dookma; mwlwg mwwlinam rupam mvpaq gvnkun.

¹²Hoq moodam ngo mur lvgab Jerusalem mam meegaq tayin, hoo hiyv almab nyita bo nyi mwlwngam ngo laqm-baqm tayin, hiyv bulug hang lo bedwn, ‘At Sw alboam nyiram, hoo mwv alman boam nyitayin.’

¹³Bulug dupum-dvrab pam naareq tayin, hoo bulug nam tulungv yuupaq nukun (niqtuq dookma). Bulv nam tulungam mvsjaqkam, bulv nam tuluho dooram; bulv roo boolungam liis jaqkam, bulv hoq tulu hoqgv twwsam twwpa ram.”

¹⁴At Swg koibo aalv ogum duku, ogum bvla nyebia jaqb wdo; At Swg aalwg yalv kacaq do; atorbo nyiv vcjaqb kiir noodo.

¹⁵Hang lingtwrnam aalv hoq aal ak hv, vcjaqb mwwdwq bvla vcnamv hoq aalv, yuupaq nammv la twryumnamv hoq aalam, kan twdwq bvla doomwq-putum nammv hoq aalam,

¹⁶tuuliam miqpur tan hoo ceebio baql gurum nwqtumnam bopam tulungam nyob padwb kiggoq goqtan hoo ceekol soja aoho doon boam nyob patan.

¹⁷Nyia koam ngo vcjaqb mwwdwqnam mam baqa jitayin ho bulv nyiqca bo wnam hvb wtayin, hoggab bulv At Swn ceekol nyic nyipa ku; bulug uiyv diimwr hvb toolin tayin, hoo bulug aiyaqkv ee hvb eelin tayin.

¹⁸Bulug rupam ho hunamkam kamab bulam jinyiram At Swg hang lingtwr dvk aalho. Mwwg kaaneqnam wmv, swcw mwlw sam guiyum tayin; mwv swcw soq doonbo mwlwngam bumpw bvla haqma paqb twrm tayin.