Read Nyishi JAPANIYA 2 Bible Online

JAPANIYA 2 - Nyishi bible

JAPANIYA 2

¹Hvnyw dooma bo gvdanga, hookumto lvkin gob, vnwqb hookumto,

²Pvvb hog nyirab maatab amp hvb aalv wleq maatab At Swg wm gunam hvb haaxaqnamv noqg aoho haama taab, At Swg haaxaqnam aalv noqg aoho haama taab.

³Meegaqto At Swn, gvda soqg yanbo mwlwngv; hiyv mwwg jvqtw bo gaml tal nyidwn; meegaqto jvqtwngam; meegaqto yannam mam; At Swg haaxaqde aalam nam lokwn kvs dvb nyiyi nvpv.

⁴Hoqgab Gajangam haqpaq tayin, hoo Askelonv vp cwkw gob nyitayin (yuupaq tayin); Asdod nyiilungam aal lvpangam ruqlin tayin, hoo Ekronnam bupaq tayin.

⁵Sa-svlo bviyoq ho doonbo tulu nulv mwwdwq dwqnka, Keret nyookwg nyi tulu nulv! At Swg gomcwrv nulam ceeko do, Palistanwg nyook, Kanaan nga; hoo ngo nulam akkam doom maab twryum tayin.

⁶Hoo sa-svlo bviyoq no nwmw dukumko nyookub nyitayin, sviya kaanbo tulu gab miipap-talapv, hoo sviya tulu gab sviya pvtwngv.

⁷Sa-svlo bviyoqkv Judag nam hog boumnam gumn gob nyitayin, hoqhv bulv tuun-meengam dvmtayin, hoo Askelonwg nam tuluho bulv ariyum mam doatayin. Hoggab bulug Pwnbo At Sw bulam mwwpa keetayin hoo bulam nvtaqnam mam nyidar mvdwn.

⁸“Ngo Moabg bej-beparnam mam tapa pakun hoo Amon nyi tulug benyi-beya nammam, hoggub ngoqg nyiilungam bulv bej-bepar pakun hoo bulug nyook hoqgv bulv ceekol larnum.

⁹Hoqgab, ngo swwl doon bov,” nyiit At Sw bibwqnam, Israelwg Pwnbo, “Moabv Sodom hvb nyitayin, hoo Ammon nyiilungv Gomorra hvb nyitayin, hogloq nyook hv taa-haataq bvla al ung gumn gob nyidwn, hoo nwrba gob niqtuq dookma. Noqg boumnam nyiilungv bulam naareq-naaceq tayin, hoo ngoqg nyookwg swwnbo tulungv bulam gumn pvvtayin.”

¹⁰Bulug larnam gab soq si bulug nvtaqnam gob hookur tayin, hoggab nyiit At Swg nyiilungam bulv ceekol bej-beparnv ho larnum.

¹¹At Sw bulam vcjaqb ceeko tayin; ho swcw soqg mwlw asaq pwnboam mwv niipaq mvtayin hoo mwam pvxwl xumtayin, hoqg nyook mwlwho, hoo nyob nyi asaq nyook mwlw hookam.

¹²‍Kus nyi tulunga, nulam kam, ngoqg lyoqr orioqkv meng tayin.

¹³Hoo mwv sudumb mwwg alaqkv ceekol yvmjin tayin hoo Assiriyangam twrtayin, hoo diixa-rara pwtw rwbwbo hvb mwv Nenibingam niqtuq dooma dvb mvtayin.

¹⁴Mwnwg pengko ho tuun-mee tulungv kartayin, hoolu luuxy svdinv; pvta pupv la kvvnyi-tornam svdinv mwnwg rvviyw uraho doogw tayin; pupum hoqgv sogoqnam yalv dulin tayin; viyap dwqtam ho twryum nammv nyitayin; ho mwnwg sidar hoqgv bonam nyinamv asarb dootayin.

¹⁵Soq bopam si cumciqb hwrcwb doonum, ho mwnwg hang ura lo benum, “Ngo twq, hoo tolo asaq akkam dooma.” Hoggub yu mwn niqtuq dooma boam nyipa kun, nyoro svdin tulu gab xaalyo bo gob nyinam! vxiv hiyv hoqb (mwnwg dookub) wpeq bov mwwg alaqkam yumt kwrwq tvl xiixuml hoo hwqdinam.