Read Nyishi JAPANIYA 3 Bible Online

JAPANIYA 3 - Nyishi bible

JAPANIYA 3

¹Mwnwn mwwdwqto hiyv tvjw maab la kac-kanyiaq dvb mvnum, nyijab-nyiyiq nyidu bo bopam!

²Mwn yal dunam akkam tama dvn; mwn tomswrl bedarnam mam loorwq maadwn. Mwn At Swn mwwgw maadwn; mwn mwnwg Pwnbo ogumg hvvnwq maadwn.

³Mwnwg oppis uraho nyinbov sony nyot tulu hvb dugum gumdu do; mwnwg nyegam tulungv ariyumg svcangv hv hog akkam apaq maadwn arkomc nagub.

⁴Mwnwg nyiqry benbo tulungv hingw dvb nyima dvn, xaalyo bo nyi tulungv; mwnwg nyub tulungv bibur dvn hoggv dvrwqdvn; bulv pvvbam mvpia dvn.

⁵Mwnwg uraho doonbo At Sw jvqtw dvn; mwv jvqtw maanboam nyima dvn; ar roxiam mwv mwwg jvqtwngam kaalin lengm dvn; arkomc vxiam mwv niqtuq lengmab nyima dvn; hvbmabde jvqtw maanbov hvnywngam cengma dvn.

⁶“Ngo nyob nyi asaqkam papaq tukun; bulug nyob panamv yuupaq nukun; bulug lyobu buuxiam ngo niqtuq dooma dvb mvpa kun hoqgab nyi akkam bulug uraho wk maadwn; bulug bopam tulungam niqtuq dooma dvb mvpa kun, nyia ko dookma, hog akkam hoqho dookma.

⁷Ngo benum, ‘jvqtw jaqb no ngam bos tayin; no tomswrl bedarnam mam loorwq tayin. Hvb nyibnyiloqkam noqg doogwngam papaqram nam ceeko mvdwb ngoqg hog mwlw xuql apko jaqb nyimram.’ Hvbmabde bulv vi yaiya go mwungnv bulug hog mwlw almab bon nyinam tulungam nyinam.

⁸“Hoqgab ngam kaaya to,” At Sw bibwqnam, “hoq aalam ngo gorab layil mengta boam naareqtan. Ngoqg soq pvvb si nyob nyi asaqkam hookum mvdwb, lvpw haty mwlwngam hookum mvdwb, ngoqg wm gunam hvb haaxaqnam mam, ngo bulug aoho tooiyaq tan; ngoqg wm gunam hvb kaaneqnamv swcw mwlw sam duiyum tayin.

⁹“Hoq moodam ngo nyiilug goonam mam dvrwqb goom dvb kwly tayin, ho bul mwlwngv At Swg eminam aoho goqkam yinpv hoo lvkin gob mwam bon nyij yinpv.

¹⁰Ngam xumn bo tulungv Kus pobu tulug lvvg hoqgv, ngoqg ruqs-ruqtwrl ruqpaq kunum akwg nyem kov, ngoqg akiam baqa jitayin.

¹¹Hoq aalam nulv hvnyw kuram nulug ngam ceekol tvjw maab bon nyiknam tulu hoqgv; hoqgab ngo nulug pengko hoqgv nulug larl yuunam akkam mvpaq tayin, hoo nulv ngoqg dvrwqbo puutu lo lokkam atam paqskuram.

¹²Hvbmabde ngo nulug pengko ho nyi yanbo la anyob mwwnbo ak apaq jitayin. Bulv At Swg eminam ho cwwgw meegaq tayin,

¹³hiyam xeq Israel ho apaq kunam; bulv jvqtw maanboam nyiram hoo vm mvvl agam gooram, ho bulug lyol hookam xaalyo lyonam taparam. Hoqgab bulv gaqminl hoo gel kartayin, hoo hiyv kam bulam bos mvlam ram.”

¹⁴Jaiyonwg nyem ko nga, vcjaqb beminto; Israela, sogoq to! Noqg hang mwlw lvgab hwnyir-hvmarl hoo hwrcw to, Jerusalemwg nyem ko nga!

¹⁵At Sw nam ceekol pw-hwwnam tulungam naapaq gvnkun; mwv noqg ceebio tulungam mvpaq gvnkun. Israelwg Lvpw ata, At Sw noqg pengko hv doodo; no nywywngam lokta alman boam bos sokram.

¹⁶Hoq aalam Jerusalemv beta yukun: “Bos maab, Jaiyona; noqg alaq tulungv laanyi maab nyima bv.

¹⁷Noqg Pwnbo At Sw nulug pengko hv doodo, atorbo akv ywwlin tayin; mwv noqg aoho mwwngaml hwnyir-hvmar tayin; mwv mwwg aby hoqgv nam cooikab doom tayin; mwv noqg aoho hwrcw lvgab vcjaqb bemin betayin.

¹⁸Nulv hiyv soominl dvminam gab nyix-riidwn ham ngo bookum tayin, ho nulv yolu ruqnam hoqgv hentwr henkram.

¹⁹Kaato, hoq moodam nul mwlwngam bejab-biyiqbo tulungam ngo pw-hwwka tayin. Hoo ngo lukum boam ywwlin tayin hoo nwd xipa maanam mam bookum tayin, hoo bulug hvnywngam ngo paqdwb kwly tayin hoo swcw nvg mwlw so yuupw tayin.

²⁰Hoq moodam nam ngo urab boatayin, hoq moodam nam ngo lvkin gob bookum-boopa tan; ho nam ngo yuud bvla paqdwb swcw nvg nyiilu mwlwg pengko soqgv mvtayin, ho (hwdlo) noqg vnyiq kaagaho nam nvtaqnam tulungam ngo jikur tan,” At Sw benam.