Read Nyishi HAGGAI 1 Bible Online

HAGGAI 1 - Nyishi bible

HAGGAI 1

¹Vnyw nywnyi gola pool barxwg otuq aal gob Darius Lvpw atwb swwdul dooi yikho, At Swg gomcwrv, Judag nyiit rad Siltiyal ko tuup Jerubbabel, hoo Jehojadak ko tuup Josua nyub butub swwdu yikho, nyiqry kaanbo Haggai alaqho haanum:

²“Soq sib nyiit At Sw bedo: Soq nyiilu si bedo At Swg nammam mvdar dvb moodv haama ta.”

³‍Ho At Swg gomcwrv nyiqry kaanbo Haggaig alaqho haanum,

⁴“Soq si hvkwg moodv yv no noqg kwlwq-kvlaqbo doogw namho doos do hvbmabde soq dvrwqbo namlongam yaqpia-yaqyal doodu mvtwl?

⁵‍Hoqgab, sija soq sib nyiit At Sw bedo: Noqg lamta mwlwngam mwwka to.

⁶‍No vigo vly liis pa, hoo noocum nammv anyo do. No dvs do, hvbmabde nywywngam xumt maado; no twws do, hvbmabde no nywywngam twwn maado. No atv vj koos do, hvbmabde hv akkam og maado. Hoo bulug aal looxiam naanam mam bulv uko bo cuk ak golo vlwq gvdwn.

⁷“Soq sib nyiit At Sw bedo: Noqg lamta mwlwngam mwwka to.

⁸‍At Sw bedo, gvda yorn puutu aob caan hoo svvda lo joa gvdwl hoo nammam mvto, hoqho ngo hwnyir-hvmar dvb nyiyin nvpv hoo ngam yuumin gvi nvpv.

⁹‍No mvqlw gob kaas dvn, hvbmabde kaato, hoqhv anyo go haanum. Hoo hwdlo ham no nammwb baqnum, ham ngo miqpaqnum. Hoggab? Nyiit At Sw bibwqdo. Hv hvbnyiloqkam ngoqg nammv yvqyin-yaqpial yuupaq tvl doodo, hvbmabde nulv nyiicwr-cwrxiv mwwg atwg nam lvgab nyoma moodu do.

¹⁰‍Hoqgab doa nvg gumsiam parl ap pakun, hoo swcw nvg vly-axeq swwnam mam parl ap pakun.

¹¹‍Hoo nyook aoso hoo gvda yorn mwlw ho, vly-axeq aoho, nitib twwnam ho, kuty ho, hoggv ked aoso swwlin dvn, nyia gvla svdin aoho, hoo bon nyinam mwlwho ngo jwwxin talinam goqa pakun.”

¹²‍Ho Siltiyal ko tuup Jerubbabel, hoo nyub but, Jehojadak ko tuup Josua, ho boumnam nyi tulu mwlwg lvgab bulug Pwnbo At Swg gomcwr yalam tvjwnum, hoo nyiqry kaanbo Haggaig gomcwr mwlwngam, bulug Pwnbo At Sw mwam kanam pan hvb tvjwnum. Hoo nyiilungv At Swn bosnum.

¹³‍Ho Haggai, At Swg pui baqnbov, nyiilungam At Swg pui lvgab goonum, “Ngo nulug lvgab doodwn hvl, At Sw bibwq dvn.”

¹⁴‍Hoo Judag nyiit rad, Siltiyal ko tuup Jerubbabelwg yalam, hoo nyub but, Jehojadak ko tuup Josuag yalam, hoo boumnam nyi tulu mwlwg yalam biurnam. Hoo bulug Pwnbo, nyiit At Swg nammam bulv hookuml hoo bonam nyinum,

¹⁵‍Vnyw nywnyi gola pool barxwg camnyi leq loopy aal gob Darius lvpw atwg swwdul dooyikho.