Read Nyishi JAKARIYA 1 Bible Online

JAKARIYA 1 - Nyishi bible

JAKARIYA 1

¹Darius vnyw nywnyi gola pool piin gob lvpw atwb swwi yikho, Berekiyag ko tuup, Iddog ko tuup nyiqry kaanbo Jakariyanvn At Swg gomcwrv haanum, hoo begamv,

²“At Sw nulug ab tulungam vigo haaxaqnum.

³‍Hoqgab bulam beto, nyiit At Sw bibwqdo: Ngoqg dookub wkur to, mwwg At Sw bedo, hoo ngo nulug dookub haatayin, nyiit At Sw bedo.

⁴‍Nulug ab tulu hvb nyimabv, hiyam otuq hoq nyiqry benbo tulungv sogoql (xabl) benum, soq sib nyiit At Sw bedo, nulug almanbo lamta hoqgv la almab bon nyinam tulu hoqgv wkur to.’ Hvbmabde bulv tapa kamk ma ho ngam tvmw-taiyonum, At Sw bibwqdo.

⁵‍Nulug ab tulungv, bulv hoglo? Hoo nyiqry benbo tulungv, bulv nwrba gob swwd nvi yv?

⁶‍Hvbmabde ngoqg gomcwr tulungv la ngoqg pvvb tulungv, hogloq ham ngo ngoqg nyiqry benbo nyera tulungam gaml jiknamv, nulug ab tulungam bulv nootu kuma namyv? Hoqgab bulv mwwkurnum hoo benum, nyiit At Sw mwwg bekjaqb ngulug lvgab ngulug lamtangam la bon nyinam tulungam, mwv ngulug lvgab nyim pakun.”

⁷‍Darius vnyw nywnyi gola pool bvryw leq barkinwg Sebat poolwg camnyi leq loopy aalho lvpw atwb swwiyik ho, Berekiyag ko tuup, Iddog ko tuup nyiqry kaanbo Jakariyanvn At Swg gomcwrv haanum, hoo begamv,

⁸“Ngo aiho kaanum, hoo kaato, nyi ak lwwcw bo svpur aoho wdunam! Mwv cibu buucwko golo opungv puulu tvl sungam bo svvn nwwtaq pengko golo doqdunam, hoo mwwg langk ho lwwcw bo, lwwcw cwwmo-cwwlo bo hoo puulu svpur tulungv daqnam.

⁹‍Hoo ngo benum, ‘Ngoqg atv, aloq tulu v hoggv? Gumtw ak ngoqg lvgab agam goonum hoo ngam benum, ‘bulv hoggv ham ngo nam kaakin tayin.’

¹⁰‍Ho opungv puulu tvl sungam bo svvn-nwwtaq ho doqdu bo nyi akv birwqnum, ‘Aloq tulu alam At Sw swcw sam kaol rvky mvdwb kanamnum.’

¹¹‍Hoo opungv puulu tvl sungam bo svvn nwwtaqg pengko ho doqdubo At Swg gumtwngam bulv birwqnum hoo benum, ‘Ngulv swcw sam kaol rvky pakun, hoo kaato, swcw mwlwngv jamp pwl doodwn.’

¹²‍Hoo At Swg gumtwngv benum, ‘Nyiit At Swa, hog hwdgo no Jerusalem mam la Judag bopam tulungam aya mwwpa maab nyita yukun, noqg ceekol haaxaq kunamv vnyw camkvn paku?’

¹³‍Hoo At Sw anyajaqb birwqnum hoo ngam goorwqbo gumtw lvgab bet-bela nan gomcwr tulungam goonum.

¹⁴‍Hoqgab hiyv ngoqg lvgab goorwqbo gumtwngv ngam benum, ‘Sogoq to, soq sib nyiit At Sw bedo: Ngo vc-loodab Jerusalem gab la Jaiyon gab hang luqdwn.

¹⁵‍Hoo rvvsw bo nyob asaqg lvgab ngo vc-loodab haaxaq dvn; ngo anyo mood gob haaxaqnum hvbmabde ciqcaq-bviyaqkam bulv vi yaiya nyigwq mvnum.

¹⁶‍Hoqgab, soq sib At Sw bedo, ngo aya mwwpanam lvgab Jerusalemb hookur pakun; ngoqg nammam hoqho mvta yukun, nyiit At Sw bibwqdo, hoo Jerusalemwg aob xika nannam sorbo tayin.

¹⁷‍Lokta sogoq to, soq sib nyiit At Sw bedo: Ngoqg bopam tulungv lokta nyet-nyeram lvgab tomin tayin, hoo At Sw lokta Jaiyonam bet-bela tayin hoo Jerusalem mam xuqtayin.’”

¹⁸‍Hoo kaato, ngoqg vnyiqkv nywrab banv, vrrw rwwpy go kaapanum!

¹⁹‍Hoo ngoqg lvgab birwqbo gumtwngam ngo benum, “Soq tulu si hoggv?” Hoo mwv ngam benum, “Soq vrrw tulu si Juda, Israel, hoo Jerusalem mam cwrsaq-bvraq twqb mvnam mv.”

²⁰‍Hoo At Sw ngam jem mvnbo nyi vpy go kaatamnum.

²¹‍Hoo ngo benum, “Bulv hog mvtab hoodu dvn?” Mwv benum, “Soq tulu si Judaho cwrsaq-bvraq twqb mvnum vrrw tulungv, hoqgab akgon kam mwwg dumpongam paarab ram. Hoo bulv haapa kun bulam bos belam dvb, nyob asaqg vrrw tulungam akob joogeq dvb, Juda gvdangam cwrsaq-bvraq mvdwb bulug vrrwngam paarabnum.”