Read Nyishi JAKARIYA 10 Bible Online

JAKARIYA 10 - Nyishi bible

JAKARIYA 10

¹Nyodo hod moodam At Sw hoqgv nyodongam koto, At Sw mwv doomwq nyodongam mvdwn, hoo gvda soqg nwmw-nwsin mwlwngam, mwv nyodongam bul gab hol mvdwb jitayin,

²hoggab nammwg cuutum-botv dooxa agam mam goolin dvn, hoo nyiqry kaanbo tulungv xaalyo nyiqry kaadwn; bulv xaalyo yumangam betam dvn hoo niqtuq dooma boam bet-bela dvn. Hoqgab nyiilungv Sviya hvb nyogaq gaqdwn; sviya rvky bo dooma gam gab bulv duqtwr-duqdwn.

³Sviya rvky bo tulungam ngo og-rusuqb haaxaql ceeko dvn, hoo nyiilo tulungam ngo laqm-baqm tayin; hoggab nyiit At Sw Judag dvparam mwwg sibin-svv hvb hoocum dvn, hoo mwwg koijaqb nyob panan svpur hvb bulam mvtayin.

⁴Mwwg hoqgv pwlw soogwngv lengtayin, mwwg hoqgv tombu xubtin nanv lengtayin, mwwg hoqgv nyob panan illiv lengtayin, mwwg hoqgv pvvb bwwl doogbo vxiv lengtayin-hog mwlwngv lvkin gob lengtayin.

⁵Bulv atorjaqb nyob panbo nyi tulu hvb nyitayin, ceebiongam lamtag suiyu ho ceely tayin; bulv nyob patayin hoggab At Sw bulug lvgab doodwn, hoo svpur aoho wnbo tulungam bulv hvnyw-har dvb mvtayin.

⁶“Judag dvparam ngo ator dvb mvtayin, hoo Josapg dvparam ngo ywwlin tayin. Ngo bulam bookur tayin hoggab ngo bulug aoho hang biipa kun, hoo bulv hvb nyiskujaqkam ngo bulam haqpaq maanum, hoggab ngo bulug Pwnbo At Swv hoo ngo bulam birwq tayin.

⁷Hoo Iprayimv atorb nyob paky bo ak hvb nyil haatayin, hoo bulug hangv opo lvgab hemp tayin. Bulug ko tulungv ham kaatayin hoo hemp dvn; bulug hangv At Swg ho hwnyir-hvmar tayin.

⁸“Ngo bul gab piipa miqtayin hoo bulam bookum tayin, hoggab ngo bulam pvlyw pakun, hoo bulv otuqho hoggub mvqlwnam hvb bulv mvqlw tayin.

⁹Ngo bulam nyob asaq pengko ho cwrsaq gob mvsnum, hvbsujaqkam aado kiyo nyook ho bulv ngam mwwpa tayin; hoo bulv bulug ko tulu lvgab swwlayil hoo hookur tayin.

¹⁰Ijipt gvda hoqgv ngo bulam nammwb boatayin, hoo Assiriya hoqgv bulam bookum tayin, hoo Gilead la Lebanon gvdab ngo bulam boatayin, hoqho bul gab dook akkam dooma dvb mvtayin.

¹¹Mwv vs-axaqbo sa-svlob wpeq tayin hoo sa-svlog suduq duqnam mam mvm-mabnam, hoo Nail pobug lwwrum ura mwlwngv pwtw-rwbw tayin. Assiriyag larnam mam akob mvl tayin hoo Ijipt lvpw atwg beqnyiangam baql wleq tayin.

¹²At Swg ho ngo bulam ator dvb mvtayin, hoo mwwg emin ho bulv wtayin,” At Sw bibwqdo.