Read Nyishi JAKARIYA 11 Bible Online

JAKARIYA 11 - Nyishi bible

JAKARIYA 11

¹Lebanona, noqg viyap tulungam mvko to, ho noqg sidar svvn tulungam wmv guiyum kamyi nvpv!

²Vcjaqb sogoql xabto, Saipres svvn tulunga, hoggab sidar svvn tulungv tabto paku, yuunam svvn tulungv yuupaq paku! Vcjaqb xabto, Basanwg Ok svvn tulunga, hoggab nyoro-rokam mam kwryum paku!

³Sviya rvky bo tulug vcjaqb sogoql xabnam yalam tapa do, hoggab bulug yuunamv yuupaq paku! Sony nyot tulug dugum gumnam yalam tapa do, hoggab Jordonwg nyoro-rokamv yuupaq paku!

⁴‍Hoqgab ngoqg Pwnbo At Sw benum: “Mengtanam Sviya acam gab Sviya rvky bob nyito.

⁵‍Hiyv bulam rvnam hv bulam mengdwn hoo laqm-baqm mvmab wwm maadwn, hoo hiyv bulam puqnbo hvl bedwn, ‘At Swn xito, ngo nyet paku; hoo bulug sviya rvky bo atv bulam aya mwwpa ma.

⁶‍Hoggab soq gvda so doonbo mwlwngam ngo hwdlo kam aya mwwpa kuram, At Sw bibwqdo. Kaato, mwwg door-doopw alaq uraho ngo vx-ceram bulam haam dvb mvtayin, hoo vxiam mwwg lvpw atwg alaq uraho haam dvb, hoo gvdangam bulv muiyu-mvca tayin, hoo bulug alaq hoqgv ngo akkam naalin ram.”

⁷‍Ho sviya puqnbo tulungv sviya acam mam mengta kunum mam ngo sviya rvky bob nyinum. Hoo beqnyia dvvnyi go naanum, daagwn ham ngo Mwwsw hvl eminum, daagwn ham ngo Maqkin hvl eminum. Hoo ngo sviyangam kaonum.

⁸‍Pool barkin ho ngo sviya kaanbo oum go twrnum. Hvbmabde ngo bulug lvgab cwqnyi kumanum, hoo bulv kam ngam apaq kunum.

⁹‍Hoo ngo benum, “Ngo nulug sviya rvky bo kuma. Hoggv siyin dvn, ham simto. Hoggv twrm yindwn, ham twrmto. Hoo hiyv doonyu pan hv akwg-akwg gv vdinam mucu-mviya minsto.”

¹⁰‍Hoo ngoqg mwwswnam beqnyiangam ngo naanum, hoo ham ngo twrtunum, nyiilu mwlwg lvgab ngoqg birnam pvvb mvpia kunum.

¹¹‍Hoq aalho ham mvpia kunum, hoo sviya puqnbo tulungv ngam kaal doonyianum, ho soq si At Swg gomcwrv hvl cengknum.

¹²‍Hoo ngo bulam benum, “Nulv sam aldvb kaad nyiloqkam, ngoqg nyijongam ngam jitbv; hvbmabde almanyiloqkam pvvto.” Hoo bulv ngoqg bon nyijongam rup cammum gob xilinum.

¹³‍Hoo At Sw ngam benum, “Hoqham pwcw mvnboam hurjto”—bulv ngam aljaqnbo nyijongam nyijo jiknum. Ho ngo rup cammum mam naanum hoo At Swg nam urab hoq tulu ham hurlwqnum, pwcw mvnbo atam.

¹⁴‍Hoo ngoqg dvvnyi deen Maqkin bo beqnyiangam ngo twrtunum, Juda gvla Israel pengko ho vbw-bor tulungv mvpia kunum.

¹⁵‍Hoo At Sw ngam benum, “Paca bo akwg sviya rvkynan dupum-dvrab pam lokta naato.

¹⁶‍Hoggab kaato, hiyv twrta boam koocum maak, ho anyo boam meegaq maak, vc boam mwp maak, ho jwwtw dvb hoojw maak, gvda so ngo sviya rvky boam swwrab mvtayin, hvbmabde jwwtw tvl oxbo akam mucu-mviyanum, bulug luxuqkam peepaqnum.

¹⁷“Ngoqg niqtuq dooma bo sviya rvky boam mwwdwq dwqm to, hiyv sviya acam mam haqpaqnum! Lyoqr orioqkv mwwg laqpongam pvriq gvnka hoo mwwg nyiqbwq vnyiqkam rapaq mvto! Mwwg laqpo bumpwngam sengm to, nwwg nyiqbwq vnyiqkam vcjaqb nyiqca paku!”