Read Nyishi JAKARIYA 13 Bible Online

JAKARIYA 13 - Nyishi bible

JAKARIYA 13

¹“Hoq aalam Debidg dvpar gab iss subuqkv buqlin jitayin hoo Jerusalemho doonbo nyiilungam, bulug nyicam la kacam hwrxaq mvtayin.

²“Hoo hoq aalam, nyiit At Sw bibwqdo, gvda soqg murty emin tulungam ngo mvpaq tayin, ho bulv lokkam mwwpa kuram. Hoo ngo gvda soqg nyiqry benbo tulu ngamla kacbo yalam mvpaq tayin.

³‍Hoo hiyv akgon lokta nyiqry kaal bebnyiloqkam, mwam ko bwwnbo ann-abv mwam betayin, ‘No swwkram, hoggab no At Swg emin gab vm mvvl agam goqdo.’ Hoo mwwg ab-annv mwam ko bwwnbov mwv hwdlo nyiqry kaaikam mwam nwqx tayin.

⁴“Hoq aalam nyiqry kaanbo vxiv mwwg nyiqry kaanam mam hvnyw tayin, sur rudub mwv vm-rvsabo kamtam pilwqram,

⁵‍hvbmabde mwv betayin, ‘Ngo nyiqry kaanbo ma, ngo rongo mvnbo akv, hoggab nyiv ngam yaapa yuk ho puqknum.’

⁶‍Hoo nyi ak mwam tox baloqkam, ‘Noqg langkwg un tuluhv hoggv mvpan? Mwv betayin, ‘Un tulu si ngoqg ajin nam ho un gvnum.’

⁷Huurab to, Lyoqr orioq ka, ngoqg sviya rvky boam ceeko to, ngoqg bviywrho daqnbo nyi akkam ceeko to.” Nyiit At Sw bibwqdo, Sviya rvky boam jwwto, hoo sviyangv cwrsaq-bvraq gob nyitayin; ngoqg alaqkv anyo boam ceeko tayin.

⁸At Sw bibwqdo, gvda mwlwho, lvvt yaagwn mvpaqtayin hoo yuupaq tayin, hoo anyo yaagwn swwm dvb apaq jitayin.

⁹Hoo lvvt yaagwn ngo wm uraho vlwq tayin, hoo rupam jiqxubnam bulam jiqxub tayin, hoo hunam jiqkanam hvb bulam jiqka tayin. Bulv ngoqg eminam goqtayin, hoo ngo bulam birwq tayin. Ngo betayin, ‘Bulv ngoqg nyiingv’; hoo bulv betayin, At Sw ngoqg Pwnbov.’”