Read Nyishi JAKARIYA 14 Bible Online

JAKARIYA 14 - Nyishi bible

JAKARIYA 14

¹Kaato, At Sw gab aal ak hoodu do, hwdlo noqg hoqgv naareq kunam mam noqg pengko lo mvpin-mvra tayin.

²‍Hoggab ngo Jerusalem mam ceekol nyob pam dvb, nyob asaqkam goqkum tayin, hoo bopam mam naatayin hoo nammam naareq tayin hoo nyem tulungam humlil nyitayin. Bopam hog taqcgon nyuum wtayin, hvbmabde nyi tuugin bopam hoqgv mvpaqram.

³‍Hoo hwdlo nyob pad aalho mwv nyob panam hvb At Sw lvvgwb lengtayin hoo nyob asaqkam ceekol nyob patayin.

⁴‍Hoq aalam Jerusalemwg dou-caga taqc ho doonbo olib puutu ho mwwg lvpiangv daqtayin, hoo olib puutungv tvqnyi gob dou-caga-haaga taqcib taqc layil taqtbo lywpa gob nyitayin, ho puutu taqcgon nyoodumb xwwca tayin, hoo taqcgon nyookob xwwl tayin.

⁵‍Hoo ngoqg puutu lywpab no ketayin, hoggab puutu lywpangv Ajal nagub wc tayin. Hoo Ujjiya Judaho lvpw at gob swwd aalho nyioby hwqyikho nulv kenam hvb nulv ketayin. Ho ngoqg Pwnbo At Sw haatayin, hoo dvrwqbo mwlwngv mwwg lvgab dootayin.

⁶‍Hoq aalam huto, hviyiq, ho tapamv dookram.

⁷‍Hoo luusaq jaqb aal ak dootayin, ham At Sw cengdwn, hv aal kama ho ai kama, hvbmabde ariyum moodam hoqhv hutongv dootayin.

⁸‍Hoq aalam swwl doonbo issiv Jerusalem hoqgv toolin tayin, iss taqcgon dou-caga taqcig sa-svlob totayin, hoo iss taqcgon dou-haaga taqcig sa-svlob totayin. Hoqhv dwr-dvrangam todul dootayin.

⁹‍Hoo At Sw swcw mwlwg lvpw atwb nyitayin. Hoq aalam At Sw akin tayin hoo mwwg eminv akin tayin.

¹⁰‍Geba hoqgv Jerusalemwg nyookog Rimmon nagub gvda mwlwngam haapa dvb mvtayin. Hvbmabde Jerusalemv aob hoq daqk ho Bejaminwg Toggoq hoqgv otuqg nyook toggoq namgub, hoqgv Cuukiq Haapa nagub, hoo Hananel Soja hoqgv lvpw at tulug roo ala raxurl ralinko nagub daqtayin.

¹¹‍Hoo hoqho nyiingv dootayin, hoggab hoqham nywywngam lokta twrm kuram. Jerusalemv swrsob dootayin.

¹²‍Hoo hiyv Jerusalem mam ceekol nyob panbo nyiilu mwlwngam At Sw swcin-taiyaq lvgab jwwtayin: bulug lvpiangv doqdu yukam bulug gv aiyaqkv yaapaq tayin, bulug vnyiqkv yaapaq tayin, hoo bulug lyolv bulug agam ura lo yaapaq tayin.

¹³‍Hoo hoq aalam vcjaqb bos dvb nyinamv At Swg hoqgv bulug aoho haatayin, hoqgab nyi vxiam asaq alaqkv nootu tayin, hoo akwn alaqkv akwn aoho ceekol mvmin sutayin.

¹⁴‍Juda ngvkam Jerusalem mam paiyaq mins tayin. Hoo taqg-loosaqg nyob asaqg hun, rup, hoo vj tulungam gumnam vcjaqb nookum tayin.

¹⁵‍Hoo swcin-taiyaqkv svpur tulug aoho, svdam tulug aoho, svjin tulu aoho, svdam tulug aoho, hoo hog luuxy svdinv svmcw ho dootayin.

¹⁶‍Hoo nyiicwr-cwrxiv hiyv Jerusalem mam ceekol haanbo nyob asaq mwlwngv vnyw-vnywngam nyiit At Swn Lvpw at gob xumtab wtayin, hoo Doogw Durum mam sootayin.

¹⁷‍Hoo swcw soqg imiq dvpar nyitwl nyiit At Swn xumtab Jerusalemb caama baloqkam, bul gab nyodo horam.

¹⁸‍Hoo Ijipt imiq dvparv bulv atv hvvc dvb caama baloqkam, bul gab nyodo horam; ho Doogw Durum soonam mam sootab caama baloqkam At Sw swcin-taiyaq lvgab nyob asaqkam duqtwr duqm tayin.

¹⁹‍Soq sib Ijiptam laqm-laqm tayin hoo mwlw nyob asaqkam laqm-baqm tayin hiyv caal Doogw Durum soonam mam sooma baloqkam.

²⁰‍Hoo hoq aalam svpur tulug riinyi-tajin ho hvl xeqtayin, “At Sw Dvrwq nvka.” Hoo At Swg dvrwqbo namlo hoqg pwcw tulungv yugw lwkw ho pukaq gob nyitayin.

²¹‍Hoo Jerusalem gvla Juda hoqg pwcw cwwxiv nyiit At Sw gab dvrwq tayin, ho hiyv pwr jitab haanbo mwlwngv hoq tulu ham naala tayin ho pwr jinam vdinam hoqho xwwtayin. Hoo hoq aalam nyiit At Swg dvrwqbo namlo ho kwm-kor mvnbov dookram.