Read Nyishi JAKARIYA 2 Bible Online

JAKARIYA 2 - Nyishi bible

JAKARIYA 2

¹Hoo kaato, nyi ak mwwg alaqho xika nan svvda lvgab bvvdwb, ngoqg vnyiqkv nyirab banv ngo kaapanum!

²‍Hoo ngo benum, “No hogloqb wdu dvn?” Hoo mwv ngam benum, “Jerusalem mam xika taab, kaatab hog hwdgo hoqhv taqt dvn hoo hog hwdgo hoqhv aaso dvn.”

³‍Hoo kaato, ngoqg lvgab goonbo gumtw hv ngoqg otuqb haanum, hoo asaq gumtw ak haanum hoo mwam kvvrwqtab

⁴‍hoo mwam benum, “Xarto, hvl yaapa bo nyiam beto, bvly dooma bo nampam hvb Jerusalem so nyiingv dootayin, hoggab dumtwq-miilyw nyiilu ngvla tuun-mee doog gam gab.

⁵‍Hoo ngo mwnwn wmmwb bvly hwwiyum doog tayin, At Sw bibwqdo, hoo ngo mwnwg pengko ho yuunam gob nyitayin.’”

⁶‍Gorabto! Gorabto! Nyoodum gvda hoqgv keleqto, At Sw bibwqdo. Hoggab ngo nam doag alap lvpy bo hvb aado jaqg mvpin-mvra pakun, At Sw bibwqdo.

⁷‍Bebilonwg nyem ko lvgab nulv doon bov, gorabto! Jaiyonwb keto.

⁸‍Hoggab soq sib nyiit At Sw benum, mwwg yuunam mam ngam jixo kokw so nulam naareqbo nyob loolub kanamnum, hoggab hiyv nulam idaq bov mwwg nyiqrw tuugabnam mam idaq dvn:

⁹“Kaato, ngoqg alaqkv bulug ao lo hwqdin tayin, hoo bulam bon nyijbo tulungv bulam naareq tayin. Hoo nyiit At Sw ngam kanam pakun hvl nulv cengtayin.

¹⁰‍Bemin beto hoo hwnyir-hvmar to, Jaiyonwg nyem konga, hoggab kaato, ngo haadwn hoo ngo nulug pengko ho doogw tayin, At Sw bibwqdo.

¹¹‍Hoo vigo nyob asaqkv atv-atv At Swg aalam lvkin gob hookum tayin, hoo bulv ngoqg nyi tulub nyitayin. Hoo ngo nulug pengko ho doogw tayin, hoo nyiit At Sw ngam nulgab kanam pakun hvl nulv cengtayin.

¹²‍Hoo At Sw mwwg naady sanam otu hvb Judangam dvrwqbo gvdaho naatayin, hoo lokta Jerusalem mam xuqtayin.”

¹³‍At Swg agaho, nyi mwlwngv, cooikab dooto, hoggab mwwg dvrwq doogw hoqgv mwv atv gorab paku.