Read Nyishi JAKARIYA 3 Bible Online

JAKARIYA 3 - Nyishi bible

JAKARIYA 3

¹Hoo mwv nyub but Josuanvn At Swg gumtw agaho, hoo mwwg lvqbwq taqc ho uiyv doqdunam mam mwam alma hvl yolu ruqdwb ngam kaatamnum

²‍Hoo At Sw Uiyam benum, “At Sw nam yolu ruqdwn, Ui tulunga! Jerusalem mam xuqn bo At Sw nulam yolu ruqdwn! Soq si wm hoqgv pureq kunam nit ak hvvma yv?”

³‍Kacbo vj tulungam kootwl, hoo Josua gumtwg agaho daqnum.

⁴‍Hoo mwwg agaho doqdu bo tulungam gumtwngv benum, “Mwwg hoqgv kacbo vj tulungam pipaqto.” Hoo mwam mwv benum, “Kaato, ngo nulug nyixaqkam nulug hoqgv aadob naapaq pakun, hoo ngo nulam dvrwqbo vj lo koom tayin.”

⁵‍Hoo ngo benum, “Kv bulam dvrwq bopya lo mwwg dumpo ho tulwq mvmto.” Hoggab bulv mwwg dumpo ho dvrwqbo bopya ak tulwq jinum hoo vj tulungam mwam koomnum. Hoo At Swg gumtwngv hoqho daqbanum.

⁶‍Hoo At Swg gumtwngv Josuanvn piwr jwr-jwr dvb svqgw dvb beknum.

⁷“Hoqgab soq sib nyiit At Sw bedo: Nulv ngoqg lamta tulungam wba nyiloqkam hoo ngoqg goonam mam pvvb nyiloqkam, ho nulv ngoqg nammam pvvb bwwl doog tayin hoo ngoqg yabg haaga tulungam rvky bo gob nyitayin, hoo ngo nulam soq doqdu ko pengko so daqmin gvnbo akgob ator jitayin.

⁸‍Nyub but Josuanga, no la noqg ajin tulungv hiyv noqg agaho doodwn, hoo tato, hoggab hoq nyi tuluhv hog ak kaacin dvb mvpa kun: Kaato, ngoqg nyera Ywwlin boam ngo haam tayin.

⁹‍Hoggab kaato, ngo Josuag haabo ho, wlw pwkin ho vnyiq kvn go doonbo wlwngam ap pakun, hoqho axor tulungam ngo xiqlwq tayin, nyiit At Sw bibwqdo, hoo soq gvdag nyixaqkam ngo aal lookin ho mvpaq tayin.

¹⁰‍Hoq aalam, nyiit At Sw bibwqdo, nulv nyiicwr-cwrxiv mwwg door-doopwngam mwwg roo boolu hoola mwwg taoq svvn niikum ho haam dvb dvgoq goqtayin.”