Read Nyishi JAKARIYA 7 Bible Online

JAKARIYA 7 - Nyishi bible

JAKARIYA 7

¹Darius lvpw atwb vnyw-nywpy go swwiyik ho, At Swg gomcwrv Jakariyanvn haanum, pool kiyag aal loopy ho, hoqhv Pwra poolv.

²‍Sija Betel nyiilungv Sarejar la Regem-meleknvn hoo At Swn mwwsw kodwb bulug nyiilungam benyoq-nyinyoq mvdwb kanamnum,

³‍nyiit At Swg dvparg nyub tulu ngamla nyiqry benbo tulungam begamv, “Ngo nyix-riil pool barng haamab dootayin yv, ngo vnyw vigo nyidul dook namhvb?”

⁴‍Hoo nyiit At Swg gomcwrv ngam haanum:

⁵“Gvda nyiilungam la nyub tulungam beto, pool bargngam la kvnnam vnyw kvn gob hwdlo nulv dvr reel hoo nyix-riinamv, nulv ngoqgab dery-reen mvi yv?

⁶‍Hoo hwdlo nulv dvi-twwikam, nulv at atgab dvma-twwma dvn yv?

⁷‍Hwdlo Jerusalemho nyiingv dooi kukho hoo nyet-nyeram swwi kukho, Jerusalem mam bopam tulungv doqyumnum, hoo nyooko nyookam nyiingv dooyum kunum, soq gomcwr tulu sam At Swg otuqho nyiqry benbo tulungv pui baqma nvm yv?”

⁸‍Hoo At Swg gomcwrv Jakariyanvn haanum hoo begamv,

⁹“Soq sib nyiit At Sw bedo, jvqtw pwwngam hwwto, anyangam la aya mwwpanam mam akwn-akwn kaakin minsto,

¹⁰‍xwwmy-hopinam, nyoodo nyiingam, ho jwwgw boam nyijab-nyiyiq maabv, hoo nulug hanglo akwn-akwn ceekol alman boam bon nyidwb mwwmabv.”

¹¹‍Hvbmabde bulv tagab dvb haqpaqnum hoo tamil doonum hoo bulug nyurungam tuuxanum ho bulv tapa kumanam.

¹²‍Bulv bulug hang aiyin hvb ator dvb mvnam hvb nyima nyiloqkam bulv pvvbam tapa banpv hoo nyiit At Swg gomcwr tulungam mwwg yal lvgab otuqg nyiqry benbo tulug lvgab kanamnum. Hoqgab nyiit At Swg vcjaqb haaxaqnamv haaknum.

¹³‍Nyiit At Sw bedo, “Ngo goqnum, hoo bulv tagab ma, ho bulv goqnum, hoo ngo takam ma,”

¹⁴“hoo bulug cengka maanam nyob asaqg pengko lo bulam ngo cwkeq-lemeq dooi lvgab cwrsaq-twqb mvnum. Hoqgab bulug gvda apaq kunamv yuupaq paku, hoqgab hoqho nyi akkam wko-wpeq kumanum, hoo albo gvdangam dooxa-xaaram dvb mvknum.”