Read Nyishi JAKARIYA 8 Bible Online

JAKARIYA 8 - Nyishi bible

JAKARIYA 8

¹Hoo nyiit At Swg gomcwrv haanum, hoo begamv,

²“Soq sib nyiit Pwnbo At Sw bedo: vcjaqb kaaneqnam lvgab ngo Jaiyon gab kaaneq dvn, hoo vcjaqb hang lingtwrnam lvgab ngo Jaiyon gab kaaneq dvn.

³‍Soq sib At Sw bedo: Ngo Jaiyonwb hookur pakun hoo Jerusalem pengko ho dootayin, hoo Jerusalem mam dengky bo bopam gob goqtayin, nyiit At Swg puutungam dvrwqbo puutu gob goqtayin.

⁴‍Soq sib nyiit At Sw bedo: Nyekam-xox tulungv lokta Jerusalemwg lamta tuluho dootayin, vcjaqb axa ko-gab vxiv alaqho beqnyia bwwtayin.

⁵‍Hoo bopamg lamta tuluho naleqgo nyem-nyega ko tulungv hoq lamta tuluho soominl yvtayin.

⁶‍Soq sib nyiit At Sw bedo: Hoq moodho boumnam nyi tulug kaagaho soq si Swrdorxeq panyiloqkam, soq si ngoqg kaaga lo swrdorxeq gob nyidy nvi yv, nyiit At Sw bibwqdo?

⁷‍Soq sib nyiit At Sw bedo: Kaato, dou-caga haaga gvda hoqgv ngoqg nyiilungam ngo ywwtayin,

⁸‍hoo bulam Jerusalem pengko ho doom dvb ngo boa tayin. Hoo bulv ngoqg nyi tulub nyitayin, hoo dengky hoola jvqtwho, ngo bulug Pwnbob nyitayin.”

⁹‍Soq sib nyiit At Sw bedo: “Nulug alaqkam ator mvto, nulv hoq aalho nyiqry benbo tulug agam hoqgv soq gomcwr tulu sam todu keedkun, hiyv hoq aalho doonam nyiit At Swg nam gwwlam diirab yukho, ho dvrwqbo namlongam mvdwb nyikam yinpv.

¹⁰‍Hoggab hoq aal tulu otuqb nyi gab la svdin gab hog nyijo doomanum, mwwg ceebio gab mwv swrsob wi-wcal nyila maanum, hoggab nyi vxiam mwwg door-doopwngam ceeko mins mvdwb mvpan.

¹¹‍Hvbmabde otuqg aal tulu hvb soq boumnam nyi tulug lvgab ngo hog nyikram, nyiit At Sw bibwqdo.

¹²‍Hoggab swrsog aaxiam paqtayin. Roo ngv aaxy xeetayin, hoo rongo ngv vigo vly-axiv lengtayin, hoo doangv bulam gumsiam diiyum jitayin. Hoo soq hog mwlw sam soq boumnam nyiilungam doog mvdwb ngo mvtayin.

¹³‍Hoo nyob asaqg pengko ho nulam beenam agam gob nyipa kun, Juda la Israelwg dvpar tulunga, ho nulam ngo ywwtayin, hoo nulam lvqc citayin. Bos maabv, hvbmabde nulug alaqkam ator to.”

¹⁴‍Hoggab soq sib nyiit At Sw bedo: “Hwdlo nulug ab tulungv ngam hang lingtwr dvb nyiluqnum, ho ngo ciqcaq-bviyaqkam nulam ham dvb xuqbwq pakun, hoo ngo ham anyo dvb mvram, nyiit At Sw bedo,

¹⁵‍ho ngo lokta hoq aalam Jerusalem mam la Judag dvparam alboam ham dvb xuqbwq pakun; bos maabv.

¹⁶‍Soq tulu sam nulv nyitayin: Akwn-akwn jvqtwngam gooto; nulug toggoq tuluho jvqtw pw-hwwto hoo swrso gab nyito,

¹⁷‍nulug hanglo akwn-akwn ceekol alman boam nyidwb mwwmabv, hoo xaalyol dingdwb aby maabv; hoggab soq mwlw sam ngo oyum dvn, At Sw bibwqdo.”

¹⁸‍Hoo nyiit At Swg gomcwrv ngam haanum hoo begamv,

¹⁹“Soq sib nyiit At Sw bedo: Pool bvrpiam vrnamv hoo bargngam vrnamv, hoo kvnnam vrnamv hoo bvrywngam vrnamv Judag dvpar gab hwnyir-hvmar mood gob nyitayin hoo hemp bvla hwrcwb soominl dvmin-twwminam gob nyitayin. Hoqgab jvqtwngam la swrsongam aby to.

²⁰“Soq sib nyiit At Sw bedo: Nyiilungv hvvxiqtayin, ho bopam tuluho doonbo nyi tulu ngvkam hvvxiqtayin.

²¹‍Akwn bopam ho doonbo nyiilungv akwn wtayin, hoo begamv, ‘Kuj ngulv lvkin ciqnyi gob At Swn mwwsw kodwb modul xuml kotuj hoo nyiit At Swn meegaq taaj; ngo atv kam wdu dvn.’

²²‍Atorbo nyob asaq kvla vigo nyiilungv nyiit At Swn Jerusalemho haal meegaq tayin hoo At Swn mwwsw kodwb kodwn.

²³‍Soq sib nyiit At Sw bedo: Hoq aalam nyi wyw go agam asaq-asaqb goonbo gvda hoqgv Juhudig kamt vjam nootu tayin, hoo begamv, ‘ngulam nulug lvgab wmtvb, hoggab ngulv tapa pakun Pwnbov nulug lvgab doodwn.’”