Read Nyishi JAKARIYA 9 Bible Online

JAKARIYA 9 - Nyishi bible

JAKARIYA 9

¹Hadrakwg gvdangam At Swg gomcwrv mwwdwq dvb ceekonam hoo Damaskas nyookv doonu kob nyinam. Hoggab At Swg vnyiqkv nyia kog aoho, hoo Israelwg nyob mwlwg aoho kaapa paku,

²hoo hoqg gvda vrrwg Hamat ao hookam, Taiyar hoo Sidonv bulv mwwlaq sujaqkam.

³Taiyar mwn atv ceetor nan ak pws jaqkam hoo rupam diimwr hvb paaca jaqkam, hoo albo hunam lamta hoqg suiyu hvb mvsjaqkam.

⁴Hvbmabde kaato, At Sw mwnwg swwg-geenam mam asaq dvb mvtayin hoo mwnwg huqlwngam sa-svlob pvqlwq tayin, hoo mwnwn wmv guiyum tayin,

⁵Askelonv ham kaatayin, hoo bos tayin; Gaja ngvkam mwwdwql ho biswr tayin; Ekron ngvkam hoqg svqgwnam tuluho vbwq kumanum. Gaja hoqg lvpw atv yuupaq tayin; Askelon ho nyi doodwb nyikram;

⁶Asdod ho nyob luucw-luut nyiilungv doogw tayin, hoo Palistiyag lvrgw nannam ngo mvpaq tayin.

⁷Ngo agam hoqg uiyam, hoo exy pengko hoq kacam ngo naapaq tayin; hoq tuluhv ngulug Pwnbo gab anyo ko boumnam ak gob nyitayin; hoq hv Juda hog nyob ak hvb nyitayin, hoo Ekronv Jebus nyi tulu hvb nyitayin.

⁸Hoo ngoqg nam dookam ngo svmcw gob mvl rao tayin, ho hiyv kam hoqb wi-wca dvb nyilaram; nyijab-nyiyiqbov lokta bulug aoho wkram, hoggab ngoqg atwg vnyiq hoqgv ngo sija kaanam.

⁹Vcjaqb hwnyir-hvmar to, Jaiyonwg nyem koa! Vcjaqb sogoq to, Jerusalemwg nyem koa! Kaato, noqg lvpw atv noqgab hoodu do; mwv jvqtwngam la ywwlinam mam doog do, yanbanv svdam aob hoodu do, joobaqbo svdam aoho hoodu do,

¹⁰Ngo Iprayim hoqg ceriotam hoo Jerusalem hoqg nyob panan svpuram mvpaq tayin; hoo nyob panan illiam pvtwr tayin, hoo mwv nyob asaqkam swrsob gootayin; mwwg pvvb bwwl doognamv sa-svlo akwn hoqgv sa-svlo akwn nagub, hoo Pobu hocw-hot hoqgv swcw nvg ywwtwr nagub.

¹¹Noqgab kam, hoggab noqg lvgab ngoqg birnam uiyv doodwn, noqg nyuum tulungam iss doomako ung hoqgv ngo toolin tayin.

¹²Nulug atorb cwwgw kob hookurto, svqgwl doonbo nyuum tulunga; ngo soolo bibwq dvn ngo nam vbw tukul jikur tayin.

¹³Hoggab ngo Judangam ngoqg illy gob gwra tukun; ngo Iprayim mam uppuq gob mvtkun. Jaiyona, ngo noqg ko tuup tulungam nwqduq tayin, Gwris nga noqg nyega ko tulungam ceeko mvdwb, hoo nam nyob panan lyoqr orioq ak hvb nyin mvtayin.

¹⁴Hoo At Sw bulug aoho daqlin tayin, hoo mwwg uppuqkv taiyam bioqnam hvb bioqlin tayin; Pwnbo At Sw tuuly yalam miqtayin hoo svkog cwkeq-lemeq dooi lvgab cuml wtayin.

¹⁵Nyiit At Sw bulam ceetor tayin, hoo bulam swwxw-lvqmin wlw hoqgv mviya tayin, hoo nulv twwtayin, hoo roo ala twwxum bo hvb sogoq tayin, hoo pukaq hoqgv iss biqnam hvb yugw bviywr hoqgv hijum biqlinam hvb biqlin tayin.

¹⁶Mwwg nyiingam sibin-svv acam hvb; hoq aalam bulug Pwnbo At Sw bulam ywwtayin, ho hun-rup lvqc cinam hvb mwwg gvdaho bulv huutayin.

¹⁷Hoggab mwwg alnamv hwdgo koido, hoo mwv hwdgo kangam do! Am-temiv tuudy-yaamy tulungam naleqgo hemp mvtayin, hoo nit roo ala ho nyem nyijwrv hemp tayin.