Read Nyishi MALAKI 1 Bible Online

MALAKI 1 - Nyishi bible

MALAKI 1

¹Israelam At Swg gamt tonam gomcwrv Malakig lvgab haanum.

²“Ngo nulam aby pakun,” At Sw bedo. Hvbmabde nulv bedo, “No ngulam hoggab aby pakun?” “Esu Jakubg vbw maai yv?” At Sw bibwqdo. “Hvbsujaqkam ngo Jakubnvn aby pakun

³‍hvbmabde Esunvn ngo oyum pakun. Ngo mwwg diisw nyookam dooxa dvb mvpa kun hoo mwwg nvmcw dookam svca soomin ko diixa-rara gob mvpa kun.”

⁴‍Idomv hvl bebnyiloqkam, “Ngulv yaqpia-yaqya paku hvbmabde ngulv mvpia-mviyanam mam mvdar tayin,” nyiit At Sw bedo, “Bulv mvdar sujaqkam, hvbmabde ngo damyaq lotayin, hoo bulam nyic-nyiabo nyook gob goqtayin; hoo ‘At Sw nyiilungam nwrba gob haaxaq dvn.’”

⁵‍Nulug atwg vnyiqkv soq sam kaatayin, hoo nulv betayin, “Israelwg gvda vrr lvvg nagub At Sw koido!”

⁶“Ko tuup akv mwwg abam xidwn, hoo nyera akv at akam xidwn. Ho nyiloqkam ngo abvk hvl ngam xinamv hoglo? Hoo ngo at akv hvl ngam bosnamv hoglo? Nyiit At Sw nulam bedo, nyub tulunga, hiyv ngoqg eminam haqpaq dvn. Hvbmabde nulv bedo, ‘Ngulv hoggub noqg eminam haqpaqnum?’

⁷‍Ngoqg yugw ho dvs-twws akiam muburnum. Hvbmabde nulv bedo, ngulv hoggub nam kacdvb mvnum?’ Sam bejo ywl At Swg tebolam haqpaq dvb nyiknum.

⁸‍Hwdlo nulv nyiqca bo svdinam pwr jiyin, hv aldvn yv? Hoo hwdlo nulv lukum-laqca boam la any maanboam aky jiyin, hv aldvn yv? Ham nulug nyiit radam jika to; mwv nulam loorwql ho nulam mwwsw ywba dw? Nyiit At Sw bedo.

⁹‍Hoo sija At Swn mwwsw kodwb nyito, ho mwv ngulam anya mwwpa kamyi nvpv? Nulug alaq hoqg hvkwg lvqc cinamv nulam hiyam jaqkam mwwg mwwswnam mam kaakin tai nvi yv? Nyiit At Sw bedo.

¹⁰‍Nulug pengko hoqgv akgon yabgam ciqtum tan, ho niqtuq doomab nulv ngoqg yugw ho wm rwgab ram! Ngo nulug aoho hemp mwwpa ma, nyiit At Sw bedo, hoo nulug alaq hoqgv aky jinam mam ngo loorwqram.

¹¹‍Hoggab dou-caga hoqgv haaga nagub nyob asaq pengko lo ngoqg eminv koi tayin, hoo nyook mwlwho dvrwqbo akiam la sulum mwmwqnam akiam jitayin. Hoggab nyob asaq pengko ho ngoqg eminv koi tayin, nyiit At Sw bedo.

¹²‍Hvbmabde nulv ham kacdvb mvnam hwdlo nulv begamv At Swg Tebol lvla hoqho aaxy doon bov kac do, hoqho doonbo dvs-twwsv kac do.

¹³‍Hvbmabde nulv bedo, ‘Soq agar si hoggv yu, hoo hoqham nulv svqyi-saqca do, nyiit At Sw bedo. Nulv yolu-swcin dul naaknam mam, hoo lukum-laqca boam, ho any maanboam bwa do, hoo hoq tulu ham nulv akib bwado! Ham ngo nulug alaq hoqgv loorwq tai nvi yv? At Sw bedo.

¹⁴‍Dingrwl sviya yaap jwwtw boam jitan hvpel jimab mvvn boam beenum, hoggab At Swn siram tanboam pwr jidwn. Hoggab nyiit At Sw bedo, ngo koibo lvpw atv, hoo nyob asaqg pengko ho ngoqg eminam bos tayin.