Read Nyishi MALAKI 3 Bible Online

MALAKI 3 - Nyishi bible

MALAKI 3

¹Kaato, ngoqg pui baqnboam ngo kanam tayin, hoo ngoqg otuqb mwv mwx-mvaq tayin. Hoo nulug meegaqnam At Sw haqmapaq galo mwwg dvrwqbo namlo so haatayin; hoo hiyam nulug hempwl birnam pui baqnbo akv, kaato, mwv hoodu do, nyiit At Sw bedo.

²‍Hvbmabde mwwg haad aalam hiyv cwqnyi tayin, hoo hwdlo mwv daqlin yin hiyv daqnyi tayin? Hoggab mwv wm porxubo ak hvbla neexaq nan sabon ak hvb nyidwn.

³‍Mwv raxorbo ak hvb la rupam heexorbo ak hvb dootayin, hoo mwv Lebi ko tuup tulungam nyedar darxaq tayin hoo hunam la rupam heexornam hvb heexor tayin, hoo At Sw gab bulv jvqtw akiam bwa jitayin.

⁴‍Ho otuqg mood hoola vnyw tuluho hoggub Judag gvla Jerusalemwg aky jinam mam At Sw hempnam hvb hemp tayin.

⁵“Ho nulam pw-hwwtab ngo ogum hvvnwq tayin. Nyioky nyub tulungam, bwwxinbo tulungam, xaalyo bo tulungam, bonam nyijo bo tulungam nyijab-nyiyiqbo tulungam, xwwmy-hopin tulungam nyijab-nyiyiq boam, nyoodo nyiilungam jvqtwb nyimanam mam, hoo ngam bos maanbo tulungam, ngo nyebia jaqb ceekol hvvky swwtayin, nyiit At Sw bedo.

⁶“Hoggab At Sw ngo kwly maadwn; hoqgab Jakubg ko tulunga nulam, twryum maap kun i.

⁷‍Nulug ab tulug swwd aal hoqgv nulv ngoqg pvvbam caabo paku hoo ham pvvl ap kumanum. Ngoqg dookub hookur to, hoo ngo nulug dookub hookur tayin, nyiit At Sw bedo. Hvbmabde nulv bedo, ‘Hoggub nyil ngulv hookur tayin?’

⁸‍Nyiingv Pwnboam naalil naareq dvn yv? Hvbmabde nulv ngam naalil naareq do. Hvbsutwl nulv bedo, hogloq ho ngulv nam naalil naareqnum? Nulug jibwqko hoola svkal aky jik ho naalil naareq do.

⁹‍Nulam beenam lvgab beeknum, hoggab nyook soq nyi mwlwngv ngam nulv naalil naareq riqdu do.

¹⁰‍Ho ngoqg namho dvs-twwsam doom dvb, jibwqnam mam bumpwb noosu urab baqa to. Hoo hvb nyigdvl ngoqg hangam pooka to, nyiit At Sw bedo, ngo nulgab doa viyap pam ciqko jimab nyiyi bwdwq hoo nulgab lvqcv jot paku hvma deedib jil tayin.

¹¹‍Rongongam dwtwr tanbo takam-yorup pam ngo nulgab mvtur tayin, ho hoqhv nulug ked rongog aaxy tulungam dwtwram, hoo nulug roo boolungv aaxy xeemab nyiram, nyiit At Sw bedo.

¹²‍Ho gvda soq nyob asaq nyiingv nulam xinam gob betayin, hoggab nulv jampko gvdaho dootayin, nyiit At Sw bedo.

¹³“Nulug gomcwr tulungv ngam ceekol tac dvb goodo, At Sw bedo. Hvbmabde nulv bedo, ‘Hogloq ho ngulv nam ceekol agam goonum?’

¹⁴‍Nulv bepakun, ‘Pwnbon bon nyij namsi niqtuq dooma dvn. Mwwg pvvbam ngulug pvvnamv ho nyiit At Swg agaho nyix-riil wnbo wnam hvb wnmv, hognvk niqtuqkv kaapa tayin?

¹⁵‍Hoo sija ngulv kvla-kwdwrnam mam xinam akib mwwdwn. Almab nyinbo tulungv nyet twtwqma hvbmabde bulv Pwnboam pooka-peel ho bulv keleqdo.’”

¹⁶‍Ho At Swn bosbo tulungv akwn-akwn goomin sunum. At Sw ruucw kwrgab do hoo bulam tapanum, hoo At Swn bos boam la mwwg eminam xinbo tulungam mwwg agaho mwwpanam kitap ak xeqknum.

¹⁷“Bulv ngoqgv ku, nyiit At Sw bedo, hoq aalam hwdlo ngo ngoqg gumnam paaikam, hoo nyi akv mwwg ko tuupv hiyv mwam bon nyij yin hang biinam hvb ngo bulam hang biitayin.

¹⁸‍Ho nulv lokta jvqtw gvla nyicig pagoqkam hoo Pwnboam bon nyij boam la bon nyij maanbog pagoqkam dvrwq kwrwq dvb kaapa tayin.