Read Nyishi METIYU 11 Bible Online

METIYU 11 - Nyishi bible

METIYU 11

¹Jisu soq tomswrnam agam tulu sam mwwg buu wyw leq vnyiam tomswr swrxo kokw so mwv nyookam apaqpel hoq nyookwg diis-paap ho hoq ogum nampam tuluho biswrtab la pui bekintab wnum.

²Jon Baptist pvtwq uraho dootwl mwv Kristog bon nyinam mam puiyam tapa tvl mwv mwwg buu tulungam Jisug dookub kanam tvl bulam tox mvnum.

³Mwv Jisun toxnum, “Ngulam bekin tvb, Jonwg nyi ak haatayinwk hvl benam nyi ak hv! No yv? Hvb maloqkam ngulv nyi asaq ak kaayal dooyin dvn yv?”

⁴Jisu birwqnum, “Nulv hognvkam tapa kun ho hognvkam kaapa kun ham wkur gvdwl Jonnvn bekinta.

⁵Nyiqca bov kaapa duku, lvca bov wlaq duku, bwswq-tviyiq nyinbov, tviyiq nyinbo al duku, ruutar bov tapa duku, sik boam turab duku mvpa ku ho Tugu Puiyam jwwgwbo nyi tulungam bekin paku.

⁶Ngoqg pagoqkam mwum maanbo nyi tulungv xinam jaqkv!”

⁷Jonwg buu tulungv wxo kokw so Jisu Jonwg pagoqkam goopanv nyi tulungam benum, “Diix-raralo Jonwg dookub wdwkho nulv hognvkam kaatab wnum? Tvpy-tapoqngam dooi yidynam mam kaatab wnum?

⁸Hvb maloqkam hognvkam kaatab wnum? Maqmaq yaiyaq bo vj koonbo nyiam kaatab wnum? Hoqhvb vj koonbov lvpw atwg nam lolak doodwn!

⁹Ngam bekin tvb, nulv hognvk jaqkam kaatab wnum? Nyiqry benbo? Hv jvqtwjaq, hvbmabde nulv nyiqry benboam koi yaan boam kaapanum.

¹⁰Hoggab Dvrwqbo Potangv benam ak hv Jon. ‘Pwnbov benum, kaato, ngo ngoqg pui baqnboam noqg otuqb kanam tvl lamtangam paxaql pao mvdwb jipan.’

¹¹Ngo bitwjaqb nulam bedwn, Jon Baptist nyia kog swwca lo dwr buqnam pengko hoqgv mwv koi yaan bov. Hvbmabde hiyv ao gvdag Lvpw lo mwlwngam anyo yaanbo akv Jonnvn koi yaadwn.

¹²Jon Baptist swwca hoqgv sija godab ao gvdag lvpwngam kwnin kviyal atjaqb nyibum nyiyiq nyinam mam himwl hindul doodwn, hoo kwnin kviyal nyinbo nyi tulungv sam kwninl naareq dvb sur rul doodwn.

¹³Jon swwlin namgob nyiqry benbo tulu ngvla Mojesg Pvvbv ao gvdag lvpw pagoqkam nyiqry benum.

¹⁴Hoqgab nulv bulug puiyam mwwjw dvb mwwnyi loqkam hiyvg pagoqkam haata ywk hvl nyiqry kaal apnam Ilija hv Jon lak,

¹⁵Nulug nyurungv tan nanv dood nyiloqkam tato.

¹⁶“Sija, ngo swnyw-soolog nyi tulu sam hognvk lvgab doocil betayin? Bulv kwm-kor mvklo soomin yvnbo himy hvb nyidwn, bulug himy soobam acam gonam bedwn.

¹⁷“‘Ngulv nulgab nyem boal soonam bemin piul tabnum, hvbmabde nulv noso soomanum!’

¹⁸Kokw so Jon haaknum ho mwv dvmab vrnum hoo opo twwmanum, ham kaatwl nyi tulungv benum, ‘Soq nyi akwg uraso ui go doodo!’

¹⁹Hoq kokw so Nyia Ko Tuupv haanum, mwv dvnum, twwnum hoo nyi vxiv benum, ‘Soq nyi sam kaato! Mwv dvlam bo hoo opo twwn bog, mwv gvda nyooga kokarbo tulu ngvla nwd xipa maanam nyi tulug ajin go!’ Hvbsujaqkam Pwnbog cengnam mam soq nyinam galoqkv jvqtw jaqb kaakin paku.’

²⁰Jisu hogloq nampam tuluho mwwg swrdorxeq nyis tulungam vigo nyinum hoq nampam tulu hoqg nyi tulungv bulug nyic nyinam hoqgv mwwkur maanum. Hoqgab mwv hoq nampam tulungam haqpaqnum.

²¹“Oa! Corajin ho Betsaida, noqg gab hog hwdgo hang hodwb nyido! Nulug pengko lo soq swrdorxeqb nyis tulungam nyinam sam Taiyar la Sidon nampamho nyinyiloqkam hoqg nyi tulungv kol otuqho tuila vjam kootwl, gv aoho mubam taiyaq tvl bulug nyic nyinam lamta hoqgv mwwkurl wkur kunam mam kaakin supaco!

²²Ngo nulam bitwjaqb bedwn, pw-hwwd aalam Pwnbov nulam hilayab Taiyar la Sidonnam ayangam kaakin tayin.

²³Kaparnahum no ao gvdab booca kodwb mwwdwn i? Nam ui nyookub hwrgeq lotayin! Noqg uraho swrdorxeq nyis tulungam nyinam mam Sodom uraho nyik nyiloqkam Sodomv soolo godab turl doos dvco!

²⁴Ngo nulam jvqtw jaqb bedwn, pw-hwwd aalam Pwnbov nam laabo yaab Sodom mam ayangam kaakin tayin!”

²⁵Jisu hoq moodho xuml benum, “Ab swcw-nyodog At Swv! Ngo nam paqdwn, hoggab no hognvkam nyijwq-nyegam belaqbo ho cenglaqbo nyi hoqgv kvsil apnam mam cengma bo nyiam kaakin paku.

²⁶Vv, Ab soq si noqg mwwlwqkob nyim dvb jinamv nyipa ku.

²⁷“Ngoqg Ab hog mwlwngam ngam jipa kun. Abv Ko Tuupam cingtwqnam ao hoqgv hiyvkam cengma dvn ho Abam Ko Tuupv hiyv nvxeq kaakin dvb mwwdwn hoq tulungam mwam kaakin dvn.

²⁸“Igin viyam baqla kumab baqnyi maab doonbo vpybo nyi tulu, ngoqg dookub haato ngo nulam doonu dvb jitayin.

²⁹Ngoqg igin vi baqmnam sam nulv baqto hoo ngoqg galoqkv cengto, hoggab ngo hang nyinyiaqbo hoo yal lo yanbo nyiv hoo nulv hang uraho jampam kaapa tayin.

³⁰Hoggab ngoqg nulam igin baqm tanam si baqngam dvn hoo hvrab dvn.”