Read Nyishi METIYU 13 Bible Online

METIYU 13 - Nyishi bible

METIYU 13

¹Hoq aal lookin ho Jisu nammam apaqpel sa-svlo bviywr sugurho dootwl nyi tulungam mwv tomswr dvb doanum.

²Mwwg taqg-loosaqho nyiv twwt jaqb mwam hwwiywql doqyumnum mwv swp golo cao banv hoq uraho dootwl nyi tulungam sugurho daqmtvl tomswrnum.

³Mwv bulam doocil vigo agam benum. “Lok nyi ak ampaq paqtab wnum.

⁴Mwv aaxy vliam rongo ho paqdwkho aaxy tuugin lamta aoho hopnum, ham pvta tulungv jara banv pal dvnum.

⁵Tuugin wlw aohv ked jwwkam maakho jarpnum. Aaxiv nyinyiaq alwb garknum, hoggab kediv jwwkam yoomanum.

⁶Hvbmabde hwdlo doonyiv kaarab yukam ham doonyiv kvvtwr kunum, hoggab kediv jwwkam maagam gab rwbv urab vigo haama ko-gab sengknum.

⁷Aaxy tuugin taa haataqho jarpnum ho swwrabnum, hvbmabde hoq tulungam taa-ngv kwnin banv pooyub yukam hvvkam sinum.

⁸Hvbmabde aaxy tuugin albo ked bobuqbo ho hopnum, hoq tuugin svvnv aaxiv lwwg gogaqb, tuugin camx gogaqb, tuugin cammum gogaqb aaxy xiknum.”

⁹Hoqgab Jisu bitwrho benum, “Nulv nyuru gvd nyiloqkam sam tagabto!”

¹⁰Kokw so buu tulungv Jisug ogum haabnv mwam toxnum, “No nyi tulungam agam gooikam hoggab doocil bedwn?”

¹¹Jisu birwqnum, “Ao gvdag Lvpw ura puiyam nulam cengm dvb jipa kun, hvbmabde bulam jima.

¹²Hoggab hiyv nyiv hog ak doogdvn ham meegta jibwtayin ho mwwg doognamv vigo naleqtayin, hvbmabde hiyv hog gokam doog maadwn, hoq nyi hoqgam mwwg doognam vcwr ham kam mwwg galoqkv naareq dvb nyitayin.

¹³Ngo nyi tulungam agam gooikam doocil benam siiloqkam bulv kaas jaqkam kaapa maado hoo tas jaqkam tacin maado.

¹⁴Hoqgab Aijayag nyiqry benamv niqtuq lengpa ku, ‘Nyi tulungv tagamv tas tayin hvbmabde tacinl talaqram, hoo nyi tulungv kaagamv kaas tayin, hvbmabde kaaparam,

¹⁵hoggab bulug hangv vdwdo, hoo bulug nyurungv tapa maado hoo bulug vnyiqngv nyiqcw do. Hvb nyima nyiloqkam bulug vnyiqkv kaapa sudco, bulug nyurungv tapa sudco, bulug hangv mwwlaq sudco ho ngoqg dookub haas dvco, ho ngo bulam mwp supaco, hvl Pwnbov bedo.’

¹⁶“Hvbmabde nulgab nyiloqkam hog hwdgo alnam bvrwqgo! Nulug nyurungv tapa do ho nulug vnyiqkv kaapa do.

¹⁷Ngo nulam jvqtw jaqb bekin dvn, vigo nyiqry benbo tulungv ho Pwnbog nyi tulungv nulug sija kaanam sam kaapa dvb mwwnum, hvbmabde ham kaapa nyomanum, ho nulug tapanam sam tapa dvb mwwnum, hvbmabde ham tapa kumanum.

¹⁸“Aaxy paqn boam doocil benam agam hv hognvkv ham tatwl cenglaqto.

¹⁹Pwnbog Lvpwg puiyam tatwl tacin maanbo nyi tuluhv lamta aoho hopbo aaxy hvb nyidwn. Hoggab almanbo yalv bulug hang uraho aaxy liigab apnam mam haabnv naareql wgdvn.

²⁰Ho wlw aoho hopbo aaxy hv puiyam tapa tvl hoo hemp lvgab nyebia jaqb loorwq bov,

²¹Hvbsujaqkam mwv atv rwbv vigo hwrgab maanum, ho oyu yooma go doodwn, hoo hwdlo hentwr henamv ho mvnyi-mviyanamv hoq pui gabwk hvl haaikam, mwv ham nyebia alwb apaq dukun.

²²Ho taa-haataqho hopbo aaxy hv puiyam tapa tvl gvda gvt soqg swwgam ho nyet-nyeram gab mwwdwqnamv puiyam cooyubl coox gvdkun; hoqgab aaxy xeenyi maadkun.

²³Hvbmabde ked dibuqho hopbo aaxy hv puiyam tatwl tacinl hoo talaqbo nyi tulu hvb nyidwn. Jvqtw jaqb mwv aaxy xeedwn, tuugin lwwg, tuugin camxgo hoo tuugin cammumgo aaxy xeedwn.”

²⁴Jisu akta doocil bulam benum, “Ao gvdag lvpwngv soq sib nyidwn. Nyi ak mwwg rongo ho ampaq albov paqnum.

²⁵Ai golo ceebio hang baqnbo nyi ak mwlwngv yubtwr yikho wbnv golo amso aaxiam am lvpaho pvqlwq pel wleqnum.

²⁶Kokw so svvnwb nyiknv opu puul aaxiv ywrgab tanum, ho golo amsongvkam kaadar cekar dvb swwrabnum.

²⁷Rongo at hoqg nyera tulungv mwwg dookub haabnv benum, ‘Bir at, no am vmlyw alboam noqg rongo ho paqn mvlak, hoggub nyil golo amso si haapan?

²⁸Mwv birwqnum, ‘Nyi ceebio hang baqnbo ak sam nyipa.’ Bulv mwam toxnum, ‘No ngulam wgdvl golo amso torabpam bupaqta hvdwn?’

²⁹Mwv birwqnum, ‘Ma, nulv lokam golo amsongam bupaq tanv ammam butaqdvn.

³⁰Hoqgab ammam la golo amsongam dvn naad nagub lokub swwm to ho kokwngam ngo naanbo tulungam golo amsongam otuqb bul bupaq cootwl ham gaqg gaqgwb agaqtvl wm parxia mvtayin, hoq kokwb am vliam naagdvl ngoqg noosu urab bvqlwq tvk hvl betayin.’”

³¹Jisu bulam doocil akta benum, “Ao gvdag lvpwngv soq sibjaq nyidwn. Nyi ak ywwm aaxy cig naalayil mwwg rongo hv paqnum.

³²Soq aaxy si mwlwjaqg aaxiam circw yaadwn, hvbmabde soq si swwrab yukam mwlw nwmw svvnam nwwt yaadwn. Kokwngam soqg haqb tulu so pvta tulungv osup subkum dvn.”

³³Jisu bulam doocil akta benum, “Ao gvda lvpwngv soq sibjaq nyidwn. Nyem ak wtwngam goobur mvdwb opappam naalayil huc hoq wtw uraho vlwq dvn, hoq wtw hv goorob maady deedib ham apdvn.”

³⁴Jisu dooc doocil nyi tulungam hog mwlwngam bekinnum, doocil bemalo mwv nyi tulungam hog akukam bemanum.

³⁵Mwv soq sib benam si hvbaloqkam nyiqry kaanbov hog hvl bepnum ham jvqtw jaqb niqtuq lengm dvb bepan. “Ngo bulam agam gooikam doocil betayin; Ngo bulam gvda gvt sam bvl pwdwk hoqgv nywywngam cengka maanam bvrwqngam bekin tayin.”

³⁶Kokw so Jisu nyi tulungam wm peekul mwv at nammwb haaknum ho mwwg buu tulungv mwwg dookub haal mwam benum, “Ngulam rongo hoqg golo amsongam doocil benamv hognvkv hoq niqtuqngam bekin tvb.”

³⁷Jisu birwqnum, “Am albo paqnbo nyi ak hv Nyia Ko Tuup Akv;

³⁸rongo hv gvda gvt ampaq albo hv lvpwg nyi tulungv, golo amso hv almanbo yalwg nyi tulungv.

³⁹Ho golo amsongam ceebio hang baql paqnbo nyi ak hv uiyv. Dvn nanam hv twrd aalv, ho dvn naanbo tuluhv ao gumtwngv.

⁴⁰Golo amsongam dorkuml wm uraho parxianam hvbkalam kuiyum mam twrd aalam nyitayin.

⁴¹Nyia Ko Tuupv mwwg ao gumtwngam kanam tvl mwwg lvpw uraho doonbo nyi tulungam nyic nyimbo ho alman boam nyinbo mwlwngam dorxuql darxatayin,

⁴²hoo bulam bos alnam wm mvram uraho hurlwq tayin hoqho xabtayin ho bulug exiv dvxeq tayin.

⁴³Ho Pwnbog dvrwqbo nyi tulungv Abwg lvpw lo doonyi hunam hvb huul dootayin. Hoqgab hiyv nyuru gvdwn sam tagabto!

⁴⁴“Ao gvdag lvpwngv rongo rwqra lo gumn cwwl apnam hvb nyidwn, hiyv akgon hoq cwwl apnam gumnam kaapal kvsil mubum apdvn, hoo mwv hemp poma vrram pol nammwb wl mwwg hog mwlwngam dvrab pam puqlayil wkurl hoq rongongam mwv rvdkun.

⁴⁵“Ao gvdag Lvpwngv viyin alboam meegaqbo nyi ak hvb nyidwn.

⁴⁶Mwv xinam viyin ak meepa paloqkam mwv nammwb wkurl mwwg hog mwlw dvrab pam puql hoq viyinam rvdwn.

⁴⁷“Ao gvdag Lvpwngv soq sib nyidwn, ngui mengbo nyi tulungv bulug wswqkam swnyiq urab hwrlwqtvl ngui luuxy deedam nootunam hvb nyidwn.

⁴⁸Kokwngam wswqho nguiyv swqg yukam sugurho seelin tvl doal ngui alboam la almanam dorxuql alboam paaxa uraho dorcum dvn, ho almanam hurpaq gvdwn.

⁴⁹Soq sib kalam twrd aalam Ao gumtw tulungv wgaql almanbo nyi tulungam albog pengko hoqgv dorxuql darlin tayin

⁵⁰hoo bulam bos alnam mvram uraho hurlwq tayin hoo bulv xabtayin hoo exiv dvxeq tayin.”

⁵¹Jisu bulam toxnum, “Nulv soq mwlw sam tacin pa i?” Bulv birwqnum, “Vv tacin pa.”

⁵²Ho mwv birwqnum, “Hoqgab Pvvbam tomswrbo nyi vxiv Ao gvdag Lvpw gab tomswr-honynamv nam at ak hvb nyidwn, hoo hiyv mwwg noosu ura hoqgv nitam la kucuqngam naalin layil baqdwn.”

⁵³Kokw so soq doocil benam torab sam nyi tulungam bexo so hoq nyookam mwv apaqpel

⁵⁴mwwg doogw ko nampamb wkur kunum. Ho mwv bulug Sinagog nam uraho tomswrnum hoo mwwg tomswrnam mam tanbo nyi tulungv lomnum. Bulv benum, “Mwv hogloqkv soq mwlw nyijwq-nyegam belaq lvqwr sam kaapa pan? Mwwg swrdorxeq nyis tulungam nyinam sam mwwkato?

⁵⁵Mwv svvtaq jem mvnbo hoqg ko tuup hvvma i? Mwwg annv Meeri maai yv? Ho Jems, Josap, Simon, Judas mwwg bor maai yv?

⁵⁶Soq doonyia dvn mwlw si mwwg bwrm tulu maai yv? Hvb nyiloqkam mwv soq mwlw sam hogloqgv naapan?”

⁵⁷Hoqgab mwam muurul haqpaqnum. Jisu bulam birwqnum, “Nyiqry kaanbo akam hogloqkam ximab nyima dvn, hvbmabde mwwg atwg nampam hoola mwwg imiq nyiv xima dvn.”

⁵⁸Hoggab mwam mwwjw maagam gab mwv hoqho vigo swrdorxeq nyis tulungam nyimanum.