Read Nyishi METIYU 14 Bible Online

METIYU 14 - Nyishi bible

METIYU 14

¹Hoq apoho Galili gvdangv Herodg alaqho doonum ho mwv Jisug puiyam tapanum.

²Mwwg saab tulungam mwv toxnum, “Jon Baptist mwv jvqtw jaqb lokta turab pakun? Hoqgab mwv swrdorxeq bonam nyin nan atoram doog pa.”

³Hoggab oyu maadab Herod Jonnvn nootu dvb gaml jinum ho mwam leetwl pvtwqho lwql apnum. Soq sam Herod si mwwg bor Pilipg nywxw Herodiag pagoq gab nyinum.

⁴Hoggab Jon Baptist Herodnvn benum, “No Herodianvn nywxw bool doognam si al ma.”

⁵Herod mwam mengdwb mwwnum, hvbmabde mwv Juhudi nyi tulungam bosnum, hoggab Jonnvn nyiqry benbo akv bo hvl mwwnum.

⁶Herodnvn ko bwwd aalho Herodiag nyem ko akv nyi tulug agaho noso soojnum. Herod hemp aljaq mwwpanum,

⁷hoggab mwv nyem ko akam dingbnv benum, “No hognvkam kootayin ham ngo nam jitayin!”

⁸Mwwg annam bilwq kotwl nyem ko akv mwam benum, “Ngam Jonwg dumpongam soq beta so jitwb!”

⁹Lvpw atv tapa tvl mwwdwqnum, hvbmabde mwv nyi tulu mwlw agaho dingr kunam gab nyem ko akwg ko-gabnam mam jidkub mwv gaml jiknum.

¹⁰Hoggab kokw so mwv Jonnvn pvtwq uraho dumpongam pvriql mengknum. ko-gab

¹¹Dumpongam beta ao golo tvptvl nyem ko akam joa jinum, ham nyem ko akv annam joojnum.

¹²Jonwg buu tulungv haal mwwg svmangam joolayil svma liiknum. Kokw so wknv puiyam Jisun bekinnum.

¹³Kokw so Jisu Jonwg puiyam tapa tvl swp golo caol hoq nyookam apaqpel nyi cumciqko nyook golo wleqnum. Ham tapa tvl nyi tulungv bulug nampam mam apaqpel mwwg kokwb kedwb wmin gvnum.

¹⁴Jisu swp hoqgv lengknv kokw so mwv nyi acam camt algo kaapa tvl mwwg hangv biil bulam aya mwwpanum, ho mwv bulug vcam mwp jinum.

¹⁵Hoq ariyumho mwwg buu tulungv mwwg dookub haal mwam benum, “Nyook si deexa-rara pa, ho doonyiv kam haade ku; nyi tulungam kanam tukul nampamb wgdvl bulug dvsam atam rvl dvmto.”

¹⁶Jisu birwqnum, “Bulam wm dvb nyiram, nulv bulam hog dvslo ak dvm dvb jito!”

¹⁷Bulv birwqnum, “Ngulug alaq si wtw taqang gola ngui cinyi go dootwq do.”

¹⁸Kokw so Jisu benum, “Hoq tulu ham ngoqg dookub bvato.”

¹⁹Mwv nyi tulungam misab talap ww aoho doom dvb jinum. Kokw so mwv wtw taqangam la ngui cinyiam naal bvvtwl ao gvdab koodul Pwnboam paqnum. Kokw so wtwngam pingmwql buu tulungam jinum, ho buu tulungv ham nyi tulungam jinum.

²⁰Nyi vxiv ayeq dvdeq dvb dvnum kokw so buu tulungv huc cwyw leq cinyi go bulug dvleqngam dorkum kunum.

²¹Hoqho dvnbov nyem himy tulungam bepa maab nyeganga hvnam mam xikanamv lwwyw ang gob nyinum.

²²Kokw so Jisu nyi tulungam wwm dukub kanam ywwtwl mwwg buu tulungam swp aob caol swnyiq kvtin gonwb rabco yaatwk hvl kanamnum.

²³Nyi tulungam wxo mvtkul mwv puutu golo vpwb xumtab caonum. Kokw so ariyum nagub hoq ditaqho Jisu vp-cwkwb doonum.

²⁴Hoq ditaqho swpv sugur hoqgv swnyiq ura aado ho doonum, ho suduq-duql hoo dooiyv yiturl ko-gab swpv yookub-yaaxeql swnyiq uraho nyidul doonum.

²⁵Arkomc poroq xoqd ditaqho Jisu buu tulug dookub iss aob lvpiangv korl haanum.

²⁶Kokw so mwam iss aoho lvpiab korl haanam mam kaapa tvl boswl lomnum. “Iss oram go!” hvl benv boswl sogoqnum.

²⁷Jisu nyory alwb bulam agam goorwql mwv benum, “Haakam to! Ngo sulak. Bos maabv!”

²⁸Ho Pitor benum, “At Sw, jvqtw jaqb no jaqloqkam ngam noqg dookub iss aob haam tvb.”

²⁹Jisu birwqnum, “Kv haato!” Hoqgab Pitor swp hoqgv ipoq layil iss aob Jisug dookub wrabnum.

³⁰Hvbmabde vc alwb dooi yinam mam hempa tvl mwv bos kalam iss urab holwq tanum ho mwv xabl benum, “At Sw, ngam ywwtwb!”

³¹Ho Jisu nyebia alwb ijin banv mwam nootu tvl benum, “Noqg mwwjwngv hwiyw go! No hoggab mwum dvn?”

³²Kokw so bunyi vnyi bwbwngv swp aob caokunum ho dooiyv kam yingin kunum.

³³Kokw so swp uraho doonbo buu tulungv Jisun xumnum. Bulv benum, “No jvqtw jaqb Pwnbog Ko Tuup goknyi!”

³⁴Kokw so swnyiq kvtin gonwb rabknum hoo Genvsaret gvdaho haanum.

³⁵Hoq gvdag nyi tulungv Jisun kaacinum. Hoqgab gvda taqg-loosaqb nyi kanam tvl diis-paap nampamho doonbo vcbo nyi tulungam mwwg dookub boa mvnum.

³⁶Mwam xuml benum vcbo nyi tulungam mwwg vj laqyap niqtuq gojaqkam gvbw mvtbvk hvl benum ho hvb gvbwbo mwlwngv vc hoqgv al kunum.