Read Nyishi METIYU 16 Bible Online

METIYU 16 - Nyishi bible

METIYU 16

¹Parisi nyi tulu ngvla Sadusi nyi ata go Jisug dookub haanum, hoo mwam pooka dvb mwwg Pwnbog lvgab doobanam mam bulv mwam swrjaqb bon ak nyil kaakin tvbwk hvl benum.

²Jisu bulam birwqnum, “Doonyi haaxongam nulv bedwn, doonyiv altai hvl, hoggab doonyiv lwwlin pa.’

³Hoo ar komcam nulv bedwn, ‘Soolo nyodo hotayi, hoggab doonyi-poolv kaiya do ho kan do.’ Nulv swnyw-soolog mood soqg pagoqkam kaacin taxdvb nyinam mam kaalaq nyoma, hvbmabde doonyi poolam kaatwl doonyig al-kor deenam mam belaqdo!

⁴Soolog nyi tulu si hog hwdgo almab la dvrwq maanbo nyiib nyidwn! Nulv ngam swrdorxeq bon lo nyil kaakin tvb hvdwn i? Kaakin ram! Nulam Jonag kaakinam swrdorxeq aoho asaq swrdorxeqgo kaakin dvb nyiram.” Kokw so bulam apaqpel mwv wleqnum.

⁵Kokw so buu tulungv swnyiq kvtin gonwb rabdwkho wtwngam baqdwb mwwpa kumab baqk maab rabnum.

⁶Jisu bulam benum, “Nulv atam Parisi tulug la Sadusi tulug opap hoqgv hengab suto.”

⁷Buu tulungv bulug pengko ho goomin sunv benum, “Ngulv wtwngam baqbo jimatvl hoqgab mwv sam bedo.”

⁸Bulv hognvkam bidunum ham Jisu cengnum, kokw so mwv bulam toxnum, “Nulv hoggab nulug wtwngam baqbo maak hvl nulug pengko ho goodu gvdwn? Nulug mwwjwngv anyo jijaq pa!

⁹Nulv sija godab mwwcin maada i? Nulv ngo wtw taqangam nyi lwwyw ang gab pingmwqnam mam mwwgab kuma i? Ho kokw so hog hwd hucgo nulv doorkumnum?

¹⁰Hoo wtw kvnam nyi lwwyw vpiam hoonam hoqgv nulv hog hwd hucgo dorkum kunum?

¹¹Nulv hoggub nyil ngo nulam wtw pagoqkam goomanam mam ham tacin maadwn i? Nulv atam Parisi tulug la Sadusi tulug wtw lo opap hoqgv hvvminl hengab suto!”

¹²Kokw so buu tulungv tacin kunum, mwv bulam wtwho mviyonam opap bvrwqngam bemanyi, hvbmabde Parisi tulug la Sadusi tulug tomswrnam hoqgv aado ho dootwk hvl benam goknyi.

¹³Kokw so Jisu Sijariya-Pilipi nampam dook gvdab wnum. Hoqho mwv mwwg buu tulungam toxnum, “Nyi tulungv Nyia Ko Tuup akam hiyv jaq hvl bedwn?”

¹⁴Bulv birwqnum, “Nyi tuugin Jon Baptist. Acam gon bedwn Ilija, nyi tulu gon bedwn Jerimiya ho ata gon begamv nyiqry benbo tulungv.”

¹⁵Mwv bulam toxnum, “Nulv hog hvdwn? Ngam nulv hiyvjaq hvl bedwn?”

¹⁶Simon Pitor birwqnum, “No jvqtw jaqb sima bo Pwnbog Ko Tuup, Ywwnbo akv.”

¹⁷Jisu Pitornvn birwqnum, “Jonwg ko tuup Simon paqyalinco! Hoggab soq si hiyvg nyia ko galoqkv haama pan, hvbmabde soq si ao gvda tolo doonbo ngoqg Abv nam jvqtw jaqb belin mvdwb jipan.

¹⁸Hoqgab nam ngo bedwn, Pitor; no wlwngv, ho soq wlw aoso ngoqg dvrwq namlongam mwgwl mvrab tayin ho sigv kam sam mviya nyoram.

¹⁹Ngo nam ngoqg ao gvdag Lvpwg sabi ngam jitayin; no hognvkam gvda gvt so mutum tayin ham ao gvda tolokam mutum tayin, ho hognvkam no gvda gvt so mvko tayin ham ao gvda tolokam mvko jitayin.”

²⁰Kokw so Jisu mwwg buu tulungam hiyv nvkam mwv Ywwnbo ak hvl bekin maabwk hvl yvtw pal apnum.

²¹Hoq moodjaq hoqgv Jisu mwwg buu tulungam bedar cekarl bekinnum, “Ngo Jerusalem wl nyiixa nyi tulug, nyub buda tulug ho Pvvb tomswrbo nyi tulug alaq hoqgv hentwram hendwb nyiky tayin. Ngam sidkub meng tayin, hvbmabde aal loum kokwngam ngo swwgwb lokta turab tayin.”

²²Pitor mwam boogin banv yolu ruqnum, “At Sw, nam Pwnbov hvb nyim dvb jima bvka! Hoqhv nywywngam nyima bvka!”

²³Jisu nywwkar nywarl kaatwl mwv Pitornvn benum, “Ngoqg ogum soqgv aado wggin to Ui! No ngoqg lamta lo duqtup ter gob nyido, hoggab noqg mwwnamv Pwnbo galoqkv haama hvbmabde nyia ko galoqkv haapa.”

²⁴Kokw so Jisu mwwg buu tulungam benum, “Hiyv nyiv ngoqg kokwb wba dvb mwwdwn, mwv atam ludum sudub nyiky tayin, ho mwwg atwg daapongam jootwl kokwb wmin gvdwb nyitayin.

²⁵Hoggab hiyv nyiv atwg swwgam ywwtws mwwdwn, mwv ham yuupaq mvtayin; hvbmabde hiyv nyiv mwwg swwgam ngoqgab yuupaq mvtayin ham mwv kaapa taikun.

²⁶Nyi ak mwv gvda gvt mwlwngam kaapa sutwl atwg swwgam niim suba lo hognvk niqtuqkv dootayin? Hog gode kaaparam. Swwgam kwly naadwb hog gokam hoq simp dooma dvn.

²⁷Hoggab Nyia Ko Tuupv oyu maadab Abwg yuunamho mwwg ao gumtw lvgab haatayin, ho mwv nyi vxiam at atwg bon nyinam nyijongam jitayin.

²⁸Ngo nulam bitwl bedwn, nulug pengko soq tuugin Nyia Ko Tuupv Lvpw atwb nyil haama deedib simab doody bo doodo.”