Read Nyishi METIYU 17 Bible Online

METIYU 17 - Nyishi bible

METIYU 17

¹Aal looxwg kokw so Jisu mwwg lvgab Pitor, Jems hoo mwwg bor Jonnvn puutu ao golo bulam vpwb boobwql boocal caagnum.

²Bulv Jisun kaagabl doodu dukho mwwg nyuqmv doonyi huunam hvbjaq huunum hoo mwwg vj koonamv kwlwq-kvlaqb puulu rusub huurabnum.

³Hoq kokwb Jisug buu oumv Mojes la Ilijanvn Jisug lvgab goorwq dvb kaapanum.

⁴Hoqgab Pitor Jisun agam goobnv benum, “At Sw, ngulug so doonam si aljaq pa! No mwwlwq dvnyiloqkam, ngo tombu lo oum go mvtayin, akwn noqg gab, akwn Mojes gab ho akwn Ilija gab.”

⁵Mwv goodul doodu dukho huuda kvlabo doomwq ak bulam pulubnum, ho hoq doomwq ura hoqgv agam yal ak dulinv benum, “Soq ak si ngoqg tumanam Ko Tuupv, mwwg lvgab ngoqg hangv xumtw-twiya dvn mwwg benam mam tagabto!”

⁶Kokw so buu tulungv soq agam yal sam tapa tvl boswl loma lomtwram lomnum, hoqgab kedib nyuqm mam pvxwtvl doonum.

⁷Jisu bulug dookub haal bulam idaql mwv benum. “Gorab tuku. Bos maabv!”

⁸Kokw so nywrab bulv kaanamv Jisun aron kaapanum hvbmabde hiyv nvkam kaapa maanum.

⁹Bulv puutu hoqgv ipoq dukho Jisu bulam gaml jil benum, “Nulv hiyv nvkam nulug soq nyiqry kaanam sam Nyia Ko Tuupam sinam hoqgv swwgwb purab maad deedib bekin maabwk hvnum.”

¹⁰Kokw so buu tulungv Jisun toxnum, “Hoggab Pvvb tomswrbo tulungv Ilija otuqb haaco tainvk hvl bedwn?”

¹¹Jisu birwqnum, “Ilija jvqtw jaqb haaco tayin, ho mwv haacol hog mwlwngam mwx-mvaql aptayin.

¹²Hvbmabde ngo nulam bekin dvn Ilija oyu maadab haapa kun hvbsujaqkam nyi tulungv mwam kaacin maanum, hvbmabde mwam bulug hang mwwlwqkob hang xumdwb mvnum. Hoqhvb kalam Nyia Ko Tuupam mvnyi-mviyal mvtayin.”

¹³Ho buu tulungv Jon Baptistg pagoqkam bulam mwv benam gob tacinum.

¹⁴Kokw so nyi tulug pvtw pengko ho hookur dwkho nyi ak Jisug dookub haabnv mwwg agahv lvpia kumbwl

¹⁵hoo benum, “Tomswrbo, ngoqg ko tuup sam aya mwwpa tvb! Mwv svmeqdo ho hentwr jaqb vc do hoggab mwv lokam wm urahv ho iss uraho haadwn.

¹⁶Ngo mwam noqg buu tulug dook bvkam baqanum hvbmabde mwam mwp nyomanum.”

¹⁷Jisu birwqnum, “Mwwjw maanbo ho almanbo nyi tulu! Ngo hog hwdgo nulug lvgab dootayin? Hog hwdgo ngo nulug lvgab dooba dvb nyitayin? Nyega ko akam soq ngoqg dookub baqato!”

¹⁸Jisu sonyiam yolu ruqxy kalam, sonyiv nyega ko hoqgv lengknum ho nyega ko akv al kunum.

¹⁹Kokw so buu tulungv Jisug dookub haal mwam toxnum, “Ngulv hog nyitwl sonyiam ruqxa nyomanum?”

²⁰Jisu birwqnum, “Soq si nulug mwwjwngv koi maagam gab nyinum. Ngo nulam jvqtw jaqb bedwn, nulug mwwjwngv ywwm aaxy hwdgo doonyiloqkam, nulv soq puutu sam ‘Soqgv alo wn!’ hvl bebaloqkam soq puutu si wtayin. Nulv hog nyinyi maanam dooram!”

²¹Hvbmabde dvmab vrrw rwl xumnamv sam ruqlin tayin.

²²Kokw so buu tulu mwlwngv olum gob Galiliho hookum dukho Jisu bulam benum, “Nyia Ko Tuupam nyi tulug alaqho gvqlwq tagdo,

²³“hoo bulv mwam meng tayin hvbmabde aal loum kokwngam swwgwb turab mvtayin.” Buu tulungv ham tatwl vcjaqb mwwdwqnum.

²⁴Kokw so Jisu la mwwg buu tulungv Kaparnahum haadwk ho xumk nam gab nyooga konbo tulungv Pitor dookub haal toxnum, “Nulam tomswrbo akv xumk nam gab nyooga jis i?”

²⁵Pitor birwqnum, “Vv, jidwn.” Kokw so Pitor nam urab haada kalam, Jisu otuqjaqb toxnum, “Simon, no hoggub mwwdwn? Soq gvda gvt soq lvpw at tulungam hiyv nyooga jidwn? Gvt at nyiv jid nvi yv ma hvbmabde nyoodo nyiv jidwn?”

²⁶Pitor birwqnum, “Nyoodo nyi tulu galoqkv.” “Hv alpa, Jisu birwqnum, “Hvnyiloqkam gvt atv atwg gvda lo nyooga jidwb nyima dvn yv?

²⁷Hvbmabde ngulv soq nyi tulu sam nyimur nwma. Hoqgab swnyiqb wgdvl vkar paqta, ho vkar gamconam ngui ciram agam kuqkoql kaab nyiloqkam no tayin taqg kaapa tayin, ham bvvlayil noqg gab xumk namho nyooga jita. Ham bvvlayil ngulug nyoogangam jita.”