Read Nyishi METIYU 18 Bible Online

METIYU 18 - Nyishi bible

METIYU 18

¹Hoq agarho buu tulungv Jisug dookub haabnv mwam toxnum, “Ao gvdag Lvpw tolo hiyv mwlwngam koi yaadwn?”

²Ho Jisu himy ko ak goqa banv bulug agahv daqm tvl bulam

³mwv benum, “Ngo jvqtw jaqb bedwn nulv nulug hangam mwwkurl himy tulug hang hvb nyima baloqkam nulv nywywngam ao gvda Lvpwngam kaapa nyoram.

⁴Ao gvdag Lvpw tolo mwlwngam koi yaady bo akv atam anyo dvb mvsul soq himy ak sib nyinbo ak gab doodwn.

⁵Hiyv nyiv soq svk himy ko akgon ngoqg emin gab svgagvrwq dvn hoq nyi akv ngam svgagvrwq dvn.

⁶“Ho hiyv akgon soq svk anyo akam, ngam mwwjw boam nyic nyidwb jitayin hoq nyi akam lwwpo ho wlw pvqlwqtvl mwam sa-svlo urajaq golo tuulwqnamv mwwg gab altayin.

⁷Gvda gvt si nyi tulungam bulug mwwjwnam hoqgv duleql geqm dvb jinbov soq svkv nyikil doos tayin, hvbmabde soq sam nyigbo ak gab mwwdwqnamv!

⁸“Noqg alaqngv hvbmab lvpiangv nam nyic nyim dvb jipa loqkam ham pal hurxa to! Lvpia lwnyi bwbwngam la alaq lvqnyiam baqtwl ui nyookub nywywngam miqmabo wm mvramho nwrba cwtam gob haal doom mam lingsam all alaq akwn baqmakam swwgam kaapal swwnamv alyatayin.

⁹Noqg vnyiq nyiqgwn nam nyic nyim dvb jipa loqkam ham harlin harpaqto! Hoggab vnyiq nyiqnyi bwbwngam baqtwl ui nyookub nywywngam miqmabo wm mvramho nwrba cwtam gob doom mam lingsam vnyiq cikin gon baqtwl swwgam kaapal swwnamv altayin.

¹⁰“Mwwgabto, nulv anyobo torab sam hiyv nvkam mwwnyi maabv. Ngo nulam jvqtw jaqb bedwn, ao gvda tolo bulug ao gumtwngv looxiam ao gvda tolo doonbo ngoqg Abwg kaagalo doodwn.

¹¹Nyia Ko Tuupv niinboam ywwtab haadwn.

¹²“Sviya lwwg daqgbo nyi akwg sviya doorgin nyiiba loqkam hoq nyi ak hv hoggub mwv ham nyidwn ham nulv cens i? Mwv sviya cam kiya leq kiyangam puutu bviywrg ww hwwtaqho apaqpel mwv gaqxarl niikbo sviya dooram meekar ram i?

¹³Ham mwv kaapa yukam, ngo bedwn, mwv sviya cam kiya leq kiya niimabo gab hemp ponam mam laabo yaab hoq dorkin gab hemp pobin yaadwn.

¹⁴Soq sib kalam Ao gvda tolo doonbo nulug Abv nulug pengko lo anyo akgon hiyv nvkam niim dvb mwwma dvn.

¹⁵“Noqg bor akv nyic nyipa loqkam no mwwg dookub ogum haal mwwg nyixiaqnam mam mwam kaakin to. Hvbmabde no sam nunyig pengko lo vpwb nyisil nyis-kaasto. Mwv noqg benam mam tabaloqkam noqg boram kaapa pakun.

¹⁶Hvbmabde noqg benam mam tama baloqkam dvrwqbo potangv benam hvb vnyi go noqg lvgab ho agam gamxiam nyi vnyi oum mam tvdy mvdwb ho hvvky swwm dvb nyito.

¹⁷Hookam mwv bulam tama baloqkam dvrwq namlongam pui bekinto. Hoq kokw jaqb dvrwq namlo benam mam tak mabaloqkam mwam Nyoodo nyi ho nwd xipa maadwb mvtku, gvda nyooga kokarbo ak gob mvto.

¹⁸“Ngo nulam mwlwngam bekin dvn, nulv hognvkam gvda so mutum tayin ham ao gvda tolokam mutum tayin, ho hog nvkam gvda so nulv mvko tayin ham ao gvda tolo kam mvko jitayin.

¹⁹“Ngo nulam akta bekin dvn, gvda so nulug pengko lo vnyi go hang pwkin gob mwwl loomin sul xuml hog ak kobaloqkam, ham ao gvda tolo doonbo ngoqg Abv nulam niqtuq lengdwb nyijtayin.

²⁰Hoggab hogloqho vnyi oum go lvkin gob ngoqg emin gab dookum dvn hoqho ngo bulug lvgab dooba dvn.”

²¹Pitor Jisug dookub haanv, “At Sw, ngoqg bor akv ngam nyimur murdul dooba loqkam ngo hog hwdgo mwam hoo lukgo himwl apaq jitayin, kvn go i?”

²²Jisu birwqnum, “Kvn gotwq ma, hvbmabde cam kvnleq kvn go.

²³Hoggab Ao gvdag Lvpwngv sib nyidwn. Lok Lvpw at ak doonum, mwv mwwg nyera tulug nyinam wnam mam miidil kaaka dvb mwwnum.

²⁴Mwv hvb nyirab dvkho mwwg galoqkv twngk lwwyw wyw go dvgo kunbo nyera ak mwwg ogumho boanum.

²⁵Nyera ak hv mwwg dvgongam hiqn nan dook maab nyiknum. Hoqgab lvpw at akv mwam la mwwg nywxw ko tulungam hoo mwwg nam hoqg hog mwlwngam puqg dukul dvgongam hiqtkuk hvl gaml jilin kunum.

²⁶Nyera akv lwbw kumbw tvl lvpw at agaho xuml benum, Ngam meeg kaaya tvb ngo noqg hog mwlwngam jikur tayin.

²⁷Lvpw at akv mwam aya mwwpanv, mwwg nyera hoqg dvgongam apaq jitkul hoo mwam tooxa jiknum.

²⁸“Hvbmabde kokw so hoq nyi ak hv agab lengnv mwwg nyera ak mwwg galoqkv twngk luum go dvgo bo akam kaapanum. Mwv hoq nyera hoqg dumpo lwwpongam swwgab tvl hiqcuq tanv ngoqg galoqkv noqg dvgongam vnwqb jitkuk hvl mwv benum.

²⁹Mwwg nyera ajin akv lvpia nootul xumknv mwam benum, ngam meeg kaaya tvb, ngo nam mwlwngam jikur taikun.

³⁰Hvbmabde mwv ham tamanum, mwam pvtwq uraho mwwg dvgongam pwma deedib tuml apkunum.

³¹Soq nyinam sam nyera asaq tulungv kaapanum, hoo lvpw at dookub wbnv hog mwlw luuxiam bekinnum.

³²Ho mwv nyera ak ham urab goqanum hoo mwv benum, ‘Niqtuq doomabo nyera!’ ‘Ngo noqg dvgongam pw-hwwma, no mvnyi-moiyul betwl apaq jitkun.

³³Ngo nam aya mwwpa namhvb no kam noqg nyera ajinam aya mwwpa kinum.’

³⁴Lvpw at akv hang lingtwr kunv nyera akam pvtwqhv dvgo mwlwngam jikur maad deedib laqm-baqm dvb pvtwqb kanam kunum.”

³⁵Kokw so Jisu bitwr-benyaho benum, “Hoq hvbkalam nulug boram nulug hang ura hoqgv apaq jima baloqkam ao gvda tolo doonbo ngoqg Abv kam nulam vxiam hvbkalam nyitayin.”