Read Nyishi METIYU 2 Bible Online

METIYU 2 - Nyishi bible

METIYU 2

¹Jisun Judiya gvdag Betleham nampamho ko bwwnum, hoq apoho Herod lvpw atwb swwnum. Ko bwwxo kokw daqho takar xinbo nyi acamgo dou-caga taqc hoqgv Jerusalemb haanum.

²Bulv toxnum, “Juhudi tulu gab lvpw at swwdy bo ko bwwnam ko hoiyin akv hoglo? Ngulv mwwg takaram dou-caga taqc aotv kaapanum, hoqgab ngulv mwam xumtab haaiyin.”

³Herod lvpw atv soq pui sam tapa tvl mwwdwq dwqma vrram dwqnum hoo Jerusalemho doonbo nyi vxiv mwwdar saqpar kumab hur marab dunum.

⁴Mwv mwlw nyub buda tulungam hoo nyijwq-nyegam tomswrbo nyi tulungam olumgob goqkum banv bulam toxnum, “Hogloq jaqho Ywwnbo akam ko bwwkin do?”

⁵Nyiqry kaanbo tulungv birwqnum “Betlehamg Judiya pamda ho.” Hoggab soq sib xeqpwl apnamv doodwn.

⁶‘Betleham, no Judiya gvdag nampam koibo tulug pengko lo no hoggub nyilakam anyo maadwn, noqg galoqkv ngoqg Israel nyi tulungam swwgbo nyi ak lengtayin.’”

⁷Kokw so Herod dou-caga taqc hoqgv haanbo takar xinbo nyi tulungam goqs banv takarv hwdlo aal jaqho buqlinum ham bul galoqkv toxnum.

⁸Hoq kokwb bulam mwv hindy jijaqb bilwqtvl Betlehamb kanamnum, “Wgdvl hindib ko hoiyin akam meekarta, nulv mwam meepa baloqkam ngamkam bepatvl cengdwb jilaka, hoggab ngo kam mwam wl xumtayin.”

⁹Bulv lvpw atwg agam mam tape kul bulug atwg wk lamtab wknum, kokw so bulug kaanam takaram dou-caga taqc ho hvraqb kaapa kunum, hoq takarv hvraqb bulug otuqb huul ko hoiyin akwg aoho lvlaqkv dudaql doonam gob huucol wnum.

¹⁰Bulv takaram kaapa tvl hemp poma vrram hemp ponum.

¹¹Ho nam urab haabnv ko hoiyin akam la mwwg ann Meerinvn kaapanum, lwbwngv kumbwl mwam xumnum. Kokw so bulug baqnam gumnam taapur banv bulug akiam mwam hun, sulum, hoo sungam albo xinam jaq kutiam jinum.

¹²Kokw so lamta basaqb wknv atwg gvdab wknum, hoggab Pwnbov bulam yuma lo Herod dookub wkur kumabvk hvl biturnum.

¹³Bulv wxo kokw so At Swg ao gumtw ak Josapnvn haabnv yumaho benum, “Herod ko akam meegaql mengdwb nyita do. Hoqgab no gorabto, koam la annam boolayil Ijipt gvdab keleqto, hoqgv ngo nam hog bema deedib Ijiptam apaqmab alo dooto.”

¹⁴Josap gorab kunv koam la annam boolayil ai Ijipt gvdab wleqnum.

¹⁵Ho Herod sinam godab mwv Ijipt ho doonum. Soq sib nyinam si nyiqry kaan boam At Swg bepwl ap kunam mam hoq agam niqtuqngam lengm dukub nyipa kun, “Ngo ngoqg Ko Tuupam Ijipt hoqgam goqlin kunum.”

¹⁶Kokw so Herod dou-caga hoqg takar xinbo tulungv mwam vm mvpaq paku mwwnv hang lingtwr kunum, hoqgab mwv Betleham nampam uraho, hoo hoq bviywrg gvda hoqg nyega ko vnyw nywnyi boam hoo ham anyo yaanbo mwlwngam mengm dvb gvbwql gamlin jinum. Soq sam mwv takar xinbo nyi tulu hoqgv takarv hwdlo jaq buqlinum hoqham tanam hoqgv moodam hinlwq banv nyinum.

¹⁷Nyiqry kaanbo Jerimiya hog hvl bep kunum hoqhv soq sib niqtuqkv lengknum.

¹⁸“Rama hoqgv xabnam agam yalgo, ho nyix riinam hang hvvdwql nyiqs-tanap dinam agam go tapa gvdo. Rakel mwwg ko tulu gab xabk xabknv; bulam kaapa maagam gab mwwt saqlal mwwnam mam ludum paku, hoggab bulv sipa ku.”

¹⁹Herod sixo kokw so At Swg ao gumtw ak Josapnvn yuma maanv mwwg dookub Ijipt ho haabnv

²⁰benum, “Gorab tuku, koam la kog annam boog dukul Israel gvdab wkur tuku, hoggab ko akam mengta bo nyi tulungv sinkun.”

²¹Kokw so Josap gorab kunv koam la kog annam boolayil Israel gvdab wkur kunum.

²²Hvbmabde Arcelaus mwwg ab Herodg kwlib mwv Judiya hoqg Lvpw atwb swwsiq duiyuk hvl tapa tvl Josap hoqb haadwb bosnum. Kokw so mwam yuma golo hingky jaqb bekinko gab mwv Galili nyook lywpa yaab wnum,

²³hoo Najaret nampam hvl eminam nampamho mwwg nammam mvl dooknum. Hoggab nyiqry benbo tulungv benamv jvqtw jaqb bijwq yuk banyi, “Mwam Najaret nyi hvl goqtayin.”