Read Nyishi METIYU 20 Bible Online

METIYU 20 - Nyishi bible

METIYU 20

¹“Ao gvdag Lvpwngv nyi ak ar komcam gorab layil mwwg roo boolu ho bon nyim dvb bon nyijobo nyi akam ree goqnam hvb nyidwn.

²Mwv nyi tulungam aal loam rup twngk kabar barg nyijongam jidwb hvl bir minsul ap kunum, ho mwv bulam mwwg roo boolu urab bon nyim dvb hvl kanamnum.

³Kokw so mwv doonyiv caada dvk mood ditaqho kwm-kor mvkwb lengb nv nyi acamgo hog nyimab doodu bo nyi tulu go kaapa tvl

⁴bulam benum, ‘Nulv kam wgdvl boolu ura alo bon nyita ngo nulam nyijonam henl alwb jitayin.’

⁵Kokw so bon nyitab wnum. Ho kokw so doonyiv caato dukho doonyi taab moodho la itoq duk moodho hoq nyinam akinam mwv nyinum.

⁶Ariyum doonyi haasv twqb nyid moodho lokta kwm-kor mvkwb wnv nyi ata gota doqdunam mam kaapa tvl, mwv bulam benum, ‘Nulv hog nyitwl aal loopwngam so daqmin dvn.’

⁷Bulv birwqnum, ‘Hiyvkam ngulam bon nyijo tvk hvl goqma.’ Mwv bulam benum, ‘Nulv wgdvl ngoqg boolu lo bon nyita.’

⁸“Kokw so ariyumho boolu atv nam atam benum, ‘Bon nyinbo tulungam goql bulug nyijongam bulam kokw jaqb goqnyul goqanam hoggv naarab gvdwl goqconam nyi tulungam jitwrnum.’

⁹Ariyum moodho bon nyirabo tulungam rup twngk kabar barg jinum.

¹⁰Kokw so bon nyijo mvdwb goqconam nyi tulungam bulug nyijongam jid moodv haaknum, bulam meeg vigo jiyi nvp hvl mwwnum, hvbmabde bulam twngk kabar barsaq gotwq jiknum.

¹¹Bulv twngkam naajo ywwtwl bon nyimbo akam haqbnv benum.

¹²‘Soq goqnyunam nyijobo nyi tulu si wm swlw durgob twq bonam nyinum, hvbmabde ngulv aal loopw doonyi ogho bonam nyit kun, hvbsujaqkam no bulam jinam hvbkalam ngulam jipa,’ hvl benum.

¹³“Boolu at akv bulug pengko hoqg akwnam benum, ‘Tagabto ajin, ngo nulam nyixiaq maaslak no aal loopw go bon nyijongam rup twngk barg naadwb hvl loor maanum i?

¹⁴Noqg nyijongam naatku ho nammwb wnku ngo kokw jaqb boanum nyijobo nyi sam nam hog hwdgo jitkun hvdkalam go mwam ngo jitayin.

¹⁵Ngo ngoqg twngkam ngoqg mwwkub nyiyin maad nvi yv? No ngoqg twngkam ngoqg jiga alwb jinam mam kaatwl no ham kaaneq dvn i?’”

¹⁶Jisu bitwr-benya so benum, “Kokwb nyinbo tulungv otuqb hoo otuqb nyinbo tulungv kokwb nyitayin. Hoggab goqnamv vigosu, hvbmabde xuqnamv anyogo.”

¹⁷Jisu Jerusalem coodul doodwkho mwwg buu wyw leq vnyiam vpwp goqbwq banv bulam wjo ywwtwl goosil gookinum.

¹⁸Bulam mwv benum, “Tagabto, ngulv Jerusalem coodu dvn, Nyia Ko Tuupam nyub buda tulug la Pvvb tomswrbo nyi tulug alaqho gvqlwq tayin. Bulv mwam sim dvb pvvb patayin.

¹⁹Ho hoq kokwb mwam Nyoodo nyi tulug alaqho jilwqtvl, mwam bej-bepar betayin, xipwql mvtayin, ho mwam daapo aoho mengtayin, hvbmabde aal loum deen aalho mwam swwdkub swwgab lokta purab taikun.”

²⁰Kokw so Jebedig nywxw akv mwnwg ko tuup vnyiam bool Jisug dookub haal mwam xuml hog ak konum.

²¹Jisu mwnwn toxnum, “No hognvkv konw dvn?” Mwn birwqnum, “Ngam bir tvb soq ngoqg ko tuup vnyi sam no bir abwb swwikam akwn noqg laqc taqc ho hoo akwn noqg lvqbwqho dooba mvtbv.”

²²Jisu ko tuup tulungam birwqnum, “Nulv hognvkam kodwn ham nulv cengma? Nulv ngoqg hentwr twwn nan pvtaq taqkin ho twwla tayin i?” Bulv birwqnum “Vv, ngulv twwla tayin.”

²³Jisu bulam birwqnum, “Nulv jvqtw jaqb ngoqg twwnko pvtaqho twwtayin, hvbmabde ngoqg laqc-lvqbwqho hiyv doodwb nyitayin ham xuqnyi ram. Ngoqg laqc-lvqbwqlo doody boam ngoqg Ab mwx-mvaql bulam ap pakun.”

²⁴Kokw so buu wyw taqt gonhv soq sam tapa tvl hoq vbw-bor vnyiam hang lengnum.

²⁵Hoqgab Jisu bul mwlwngam olum gob goqkum banv benum, “Nulv cengdwn Nyoodo nyiig gora ab tulungv bulug nyi tulu aoho bulv hog mwlw nyidwb atoram doogdvn, ho xilo tulungv bulug lvgab hog mwlw pvvb padynam atoram bwwg dvn.

²⁶Hvbmabde soq nyinan si nulug pengko ho soq sib nyiram. Nulug pengko hoqgv hiyv akgon koiyib swwdwb mwwdwn hoq nyi ak hv mwlwngam kanam taiyabo nyiib nyitayin.

²⁷Ho hiyv nyiv otuqjaqb doodwb mwwdwn, mwv nulug nyerab swwdwb nyitayin.

²⁸Nyia Ko Tuupv xumk taab haamanum, hvbmabde xumtab ho nyi mwlwngam nyedar taab atwg swwgam jipaqtab haanum.”

²⁹Jisu la mwwg buu tulungv Jeriko hoqgv agab lingdu dvkho, nyi acamv mwwg kokwb wdunum.

³⁰Hoqho nyiqca bo nyi vnyi go lamta bviywr ho dootwl Jisu wpeq dvk hvnam mam tapa tvl bunyiv sogoq goqnum, “Debidg Ko hosiq tuupa! Tomswrbo, ngulam anya mwwpa tvbka!”

³¹Nyi acamv bunyiam yolu ruqnum ho cooikab dootwk hvl benum. Hvbmabde bunyiv laabo yaab sogoqnv benum, “Debidg ko hosiq tuupa! Tomswrbo, ngunyiam anya mwwpa tvbka!”

³²Jisu romo tvl hoo bunyiam goqnum. Mwv bunyiam toxnum, “Hog nvklo nunyi gab nyit bvk hvl bedwn?”

³³Vnyiv birwqnum, “Tomswrbo, ngunyiam vnyiq kaapa mvdwb jitbv!”

³⁴Jisu mwv bunyiam anya mwwpanum ho bunyig vnyiqngam idaqnum, ho dara bunyig vnyiqkv kaapa kunum ho bunyiv mwwg kokwb wmin gvknum.