Read Nyishi METIYU 21 Bible Online

METIYU 21 - Nyishi bible

METIYU 21

¹Kokw so Jisu la mwwg buu tulungv Jerusalemb wdu dvkho Olib puutu ogumho doonbo Betpagi nampam mam wnwq kunum. Jisu mwwg buu vnyi gon soq agam sam bilwq banv kanam nvmlwqnum.

²“Ngulug wga alo doonbo nampamho nulv nyebia jaqb svdam joobaq ak apnamgo kaapa tayin. Nulv ham poqsul ngoqg dookub boatab.

³Ho hiyv akgon hog bebaloqkam mwam betamta ‘Nyiit at sam nyin sanam ak doopa hvta, hvl bebaloqkam mwv nyorib jitayin.”

⁴Soq sib nyiknam si nyiqry kaanbov hognvkv benum ham niqtuq lengm dukub nyinum.

⁵“Jaiyon bopam mam bekinto, kaato, noqg lvpw atv noqg dookub hoodu do! Mwv yanbov, mwv svdam aoho, hoo svdam ko ao golo caol haado.”

⁶Hoqgab buu tulungv Jisu bulam hog hvl benum hvbkalam nyinum.

⁷Bulv svdam annam la ko doram boanum hoo bulug vj koonam mam puutwl hoq aoho Jisu caol wnum.

⁸Nyi tulungv bulug vjam lamtaho puup jinum, ho tuugin svvn haqbam pal lamta hv puup jinum.

⁹Jisug haabo-langkwb wnbo nyi tulungv sogoq goql benum, “Debid ko Tuup akam paqto! At Swg emin gab haanbo akam Pwnbov aya tvka, Pwnbog eminam paqto!”

¹⁰Kokw so Jisu Jerusalem urab haadwk ho bopam pvmpwngv hur marab durab nyianv nyi tulungv toxnum, “Soq si hiyv yu?”

¹¹Nyi tulungv birwqnum, “Soq nyi siilak Galilig Najaret hoqg nyiqry kaanbo Jisu.”

¹²Kokw so Jisu Xumk nam urab haaba kunv hoqg uraho puql hoo rvl doonbo nyi tulungam ruqlin kunum. Mwv twngk kwly bo nyi tulug twgwnam mam hoo pukum puql twgwl apnam mam likub-lexeql dvb mvnum.

¹³Mwv bulam benum, “Dvrwqbo pota lo xeqpnamv doodwn, ‘Ngoqg nammam Swgw gwwkumko namgob goqdwb nyitayin; hvbmabde nulv sam dvcobo tulug kvs sigwb yaab mvgdo.”

¹⁴Nyiqca bo hoo lvca bo nyi tulungv mwwg dookub haanum, ho bulam mwv al dukub mwp jinum.

¹⁵Kokw so swrdorxeqb nyinam mam ho ko tulungv Xumk nam uraho, “Debidg ko tuup akam paqto!” hvl sogoql benam mam tatwl nyub buda tulungv la Pvvb tomswrbo nyi tulungv haaxaqnum.

¹⁶Hoqgab Jisun toxnum, “Bulv hoghvl bedo ham no tapa do?” Jisu birwqnum, “Vv, ngo tapa do, Dvrwqbo potalo xeqpwl apnam mam nulvkam pooril kaapa ma i? ‘Nulv ko tulungam la ko hoiyinam jvqtw jaqb paqm dvb biswr aptayin.’”

¹⁷Kokw so Jisu bulam apaqpel bopam hoqgv lengknv Betanig nampam uraho ai dooknum.

¹⁸Ar rogin ho Jisu bopamb wkur dukho mwv kanonum.

¹⁹Mwwg lamta wga bviywrho taoq svvn nwwg daqdwb kaapa tvl hoq svvn lwkwb haal kaanum hvbmabde aaxy cigukam kaapa maab nwmw arongam kaapanum. Hoqgab Jisu taoq svvnam benum, “No soolo galoqkv lokam aaxy xeekram.” Hoo hvl bedakalam taoq svvn hv sengknum.

²⁰Buu tulungv soq sam kaatwl lomnum. Bulv toxnum, “Hoggub jaqyu svvnv nyory jaqb sengpa kun?”

²¹Jisu birwqnum, “Ngo nulam jvqtw jaqb bekin dvn, nulv mwam mwum maab mwwjw baloqkam nulvkam ngo soq taoq svvn sam mvnum hvbkalam hoqhvk atoram kaapa tayin ho sam aro twqma, hvbmabde soq puutu sam kam, ‘puutu no wto ho swnyiq urab atv gilwq suto hvl kam bedwb atoram kaapa tayin.

²²Nulv mwwjwl hognvkam swgwl kotayin ham nulv kaapa tayin.”

²³Jisu Xumk nam urab hookur kunv mwv tomswr swrdul doodwkho nyub buda tulungv la nyi nyiixa tulungv mwwg dookub haal mwam toxnum, “Nam hiyv soq atornam sam nyigdvn? Ho hiyv nam soq ator sam jinbov?”

²⁴Jisu bulam birwqnum, “Ngo nulam toxnam ak ngokam tox tayin, nulv ham ngam birwqto, ho ngo nulam hogloqgv ngo ator naal soq bon sam nyidwn ham nulam bekin tayin.

²⁵Jon atoram naalayil baptijum jinum soq sam Pwnbog galoqkv kaapanum ma nyia ko galoqkv?” Bulug pengko lo hwwmin sunum, “Nulv hog hvl betayin? Ngulv mwam ‘Pwnbog galoqkv haanum hvl bebaloqkam’ mwv ngulam betayin, ‘hoggab nulv mwam mwwjw maanum?’

²⁶Hvbmabde, ‘Nyia ko galoqkv haanum’ hvl besam kam, ngulv nyi tulungam bosdo. Hoggab nyi mwlwngv Jon Pwnbog galoqkv haanbo nyiqry benbo akv hvl ceng do.”

²⁷Hoqgab mwwtwr sutwl Jisun birwqnum, “Ngulv ham cengma.” Ho Jisu bulam benum, “Hvbnyiloqkam Ngo kam hogloq atorv naal sam nyigdvn ham nulam bekinram.”

²⁸“Nulv sija hoggub mwwdo? Lok ko tuup vnyi go doonbo nyi ak doonum. Ab akv vbw akwg dookub wbnv benum, ‘Ngoqg ko, no roo boolub wgdvl soolo bonam nyita.’

²⁹Mwv birwqnum. ‘Ngo wnw ma.’ Hvbmabde mwv kokw so mwwkur banv wknum.

³⁰Hoqg kokwb ab akv bor akwg dookub wbnv benum. Mwv birwqnum. ‘Vv, ab ngo wtayin,’ hvbmabde kokw so mwv wkmab nyinum.

³¹Soq vnyig pengko so hogloq ak hv benam mam tanum?” Bulv birwqnum, vbw ak hv. Ho Jisu birwqnum. “Ngo nulam jvqtwb bekin dvn, gvda nyooga kokar bo tulu ngvla meqjo bo nyi tulungv nulug otuq yaab Pwnbog lvpwngam kaapa cootayin.

³²Hoggab Jon Baptist nulam jvqtw lamta wdy koam kaakin taab haanum, hvbsujaqkam mwam nulv mwwjw maanum, hvbmabde gvda nyooga kokar bo tulu ngvla meqjo bo nyi tulungv mwam mwwjw kunum. Soq sib nyinam mam nulv kaat lakam kokw hoojaqkam nulug hangam nulv mwwkur kumanum ho mwam mwwjw maanum.

³³“Doocnam lo akta tato,” hvl Jisu benum. “Lok nyi ak doonum. Mwv roo boolu ak mvtwl ham sulungv nwqlub apnum, ho roo aaxiam heexor tvl ala cookumko ung ak dukoql apnum, ho ham kaayal dook rvkyko nam akam mvnum, kokw so mwv hoq roo boolungam rongo mvnbo nyi tulug alaqho appel hoo nammamkam apaqpel gvda golo gaqkar taab wleqnum.

³⁴Kokw so roo aaxiam pud moodho, mwwg nyera tulungam mwv rongo mvnbo nyi tulug dookub kanam tvl mwwg aaxy naadynam pammam baqa tak hvl kanam nvmlwqnum.

³⁵Hoq rongo mvnbo nyi tulungv mwwg nyera tulungam nootul akwn jwwgurnum, akwn mengnum, akwn wlwngv hurx kunum.

³⁶Kokw so mwv lokta otuq hvbkalam nyera tulungam kanamnum, hoo bulam otuq nyinum hvb hvraq nyinum.

³⁷Kokw jaqso mwwg ko tuupam kanam banv benum, ‘Jvqtw jaqb ngoqg ko tuupam xiky tayin, hvl kanamnum.’

³⁸Hvbmabde rongo mvnbo tulungv ko tuupam kaapa tvl, bemin sunv benum, ‘Siik lak rongo atwg ko tuupv, kuj mwam mengpaqtuj, hoo mwwg gumnv ngul gab dootayin.’

³⁹Kokw so hoqgab mwam nootul roo boolu agab seelin banv mengknum.”

⁴⁰Jisu bulam toxnum. “Kokwngam roo boolu atv haak baloqkam mwv hoq rongo mvnbo nyi tulungam hoggub mvtayin?”

⁴¹Bulv birwqnum, “Mwv jvqtw jaqb hoq nyi almanbo nyi tulungam apaqram, mengtayin, ho roo boolungam nyi asaqkam mwam jidynam mam mood jaqkam jinbo rongo mvnbo nyiam jitayin.”

⁴²Jisu bulam benum, “Nulv lokkam Dvrwqbo potangv hog hvl bedwn, ham poory rika ma i? ‘Nam mvnbo tulungv haqpaqnam, ximab ngurxianam, wlw pw hv mwlwngam xibin yaanam wlw gob nyiknum. Soq sam At Sw nyinum, ho ngulv kaanamv sam swrjaqb kaado!’

⁴³“Jisu hoq aoho kobwl benum. Pwnbog lvpwngam nulug galoqkv naareq layil hiyv vigo aaxy xeem dvn hoq nyi tulungam jitayin.

⁴⁴Ho soq wlw aoso hodaqbo nyiv vmwq yumgub nyitayin, hvbmabde hiyvg aoho soq wlw si hodaq tayin, mwam diikwr-tvmwr hvb miiriq riqpan hvb nyitayin.”

⁴⁵Nyub buda ngvla Parisi tulungv Jisug soq doocnam sam tatwl bulug pagoqkam bedbo mwwnum,

⁴⁶hoqgab, mwam nootu dvb tuugabnum. Hvbmabde nyi tulungam bosnum, hoggab Jisun nyiqry benbo akv hvl mwwnum.