Read Nyishi METIYU 22 Bible Online

METIYU 22 - Nyishi bible

METIYU 22

¹Jisu lokta nyi tulungam agam goodwkho doocil benum,

²“Pwnbog lvpwngv soq sibjaq nyidwn; Lok lvpw at ak mwwg ko tuup gab hvl nyem naal durum rumdwb mwx-mvaqbo hvb nyidwn.

³Durum kob haatwk hvl goql apnam nyi tulungam durum dvtab haatwk hvl goqm dvb mwwg nyera tulungam kanamnum, hvbmabde mwv haadwb mwwmanum.

⁴Hoqgab mwv nyera asaqngam soq pui sam bilwqtvl kanamnam, ‘Ngoqg durum mam munu pakun, ngoqg svv oxbo jaqkam patab pakun, ho hog mwlwngam mwx-mvaql jotv dukub mvpa kun. Nyem naal durum rumk so haato!’

⁵Hvbmabde goqol apnam nyi tulungv tvmw-taiyonum ho bulug at ya bonam nyitab wnum, akwn mwwg rongob akwn mwwg noosub,

⁶ho tuugin mwwg nyera tulungam nootu tvl jwwl pal ho bulam mengnum.

⁷Hoqgab lvpw atv hang lingtwram lengknv mwwg sipai tulungam kanam tvl hoq nyi mengnyia bo tulungam mengm kunum, hoo bulug bopam mam wm tolwqnum.

⁸Kokw so mwv nyera tulungam goqbnv bulam benum. ‘Ngoqg goqdumnam nyiin tulungv durum dvtab haakma ngoqg durum mam munu supa ku, ngoqg durum sam dvdy maan bogo.

⁹Hoggab nulv nyob lamta paanwb lengdvl nyi gotwq bolo vigo soq durum gab goqta.’

¹⁰Hoqgab nyerangv nyob lamta paanwb lengb nv nyi gotwq bolo albo ge alman ge kaapanam gotwqb al-koram xumab mwlwngam boanum, hoo nyem naak nammv bwwr kunum.

¹¹Kokw so lvpw at akv nyiin tulungam kaatab nam urab haanum, ho mwv nyi ak nyem naal durumko lo vj koonam hvk vj kooma bo nyi ak kaapanum.

¹²Lvpw at akv mwam toxnum, ‘Ajin, no hoggub nyil nyem naal dvpaqko durum ho dvtab haaikam vj koonam mam koomab uraho haapan?’

¹³Kokw so Lvpw atv mwwg nyera tulungam gaml jinum, ‘Mwwg al alaqngam leetwl aga kan twdwq alo hurpaqta, ho mwam alo exy dvxeql doomto.’”

¹⁴Jisu bitwr-benyaho benum, “Vigo goqnum, hvbmabde xuqnamv anyogo.”

¹⁵Parisi tulungv agam bexiaq baloqkam Jisun nootu dvb hvl ywrnum.

¹⁶Hoqgab mwwg dookub bulug nyi ata gola Herod dvpar hoqgv ata go kanamnum. Bulv benum, “Biswrbov ngulv cengdwn no jvqtw agam mam bekin dvn. Ho hvb Pwnbog jvqtw jaqb hang mwwnam mam nyi tulungam bekin dvn, ho hiyv nvkam no haagabl tama dvn,

¹⁷hoggub mwwdwn ham bekin tvb Romanam gvda nyooga jidwb nyid nvi yv ma nyima dvn?”

¹⁸Hvbsujaqkam bulug nyisil nyidynam pagoqkam Jisu mwv benum, “Kaak-takdvb nyil hang pwnyi bo nyi tulu, nulv ngam hog nyitwl pookal bwdwb baqgeq dvb nyidwn?

¹⁹Ngam nyooga jinam twngk taiyin lo taqg jitbv!” Bulv twngk taiyin taqg jinum.

²⁰Ho bulam mwv toxnum, “Soq si hiyvg eminv ho hiyvn kvvyw kacdvb mvnamv doodo?”

²¹Bulv birwqnum, “Sijargv.” Hoqgab Jisu bulam benum. “Hoqgab Sijarnvn jidynam mam ham Sijarnvn, hoo Pwnbon jidynam mam Pwnbon jito.”

²²Bulv soq benum sam tatwl lomnum. Bulv mwam apaq peekul hoo wleq kunum.

²³Hoq aal lookin ho Sadusi nyi tulu go Jisug dookub haabnv nyi tulungv sik bolo turab kuram hvl benum.

²⁴Bulv benum, “Tomswr bov, Mojes benum, ‘Nyi ak ko doomab sib nyiloqkam mwwg borv xwwmy akam nywxw sodwb nyidwn, hoo bulam ko dool hoq ko tulungam sikbo nyi hoqg kov hvl bedwb nyitayin.’

²⁵Soq otuqho vbw-bor kvngo doonum, vbw jaqhv nyem naanum, hvbmabde ko doomab sileq kunum. Hoq kokwb hoq bor akv xwwmy akam nywxw sonum,

²⁶mwwg gab ko doomanum hoq kokwb oum deen borv doognum, hvb nyiknv kvn nagub mwlwngv vbw-borv doognum.

²⁷Kokw jaqso nyem akv siknum.

²⁸Ho sija sikbo tulungv swwgwb turab yukam hoq nyem akv hiyvg nywxwb swwtayin? Hoggab mwlwngv mwnwn nyem swwgnum.”

²⁹Jisu bulam birwqnum, “Nulv hwdgo nyimur do! Nulv Dvrwqbo potangam kam cengma, ho Pwnbog atoram kam cengma nyi.

³⁰Hoggab sikbo tulungv turab yukam ao gvdag ao gumtw hvb nyitayin, ho nyem naaram ho nyem jimin sukram.

³¹Sikbo tulungv swwgwb turab deeknam mam Pwnbov nulam bekin kunam mam nulv Dvrwqbo potalo poory ripa ma i?

³²Pwnbov benum, ‘Ngo Abraham gv Aisak gv Pwnbov, ho Jakubg Pwnbov, mwv turl doonbo sima bo Pwnbov.’”

³³Mwwg tomswrnam mam tatwl nyi tulungv lomnum.

³⁴Kokw so Parisi tulungv Jisu Sadusi tulungam gambeq maadwb agam mam bepak hvl tapa tvl dookum nyanum.

³⁵Bulug pengko hoqg Pvvb tomswrbo akwn Jisun pooka banv toxnum.

³⁶“Tomswrbo, gaml tulug pengko lo mwlwngam koi yaanbo Pvvb si hogloq ak hv?”

³⁷Jisu birwqnum, “Noqg Pwnbo At Swn noqg hvvjw-hara lvgab, noqg yvj lvgab hoo noqg mwwnam lvgab aby boto.

³⁸Soq si koi bvla otuqcob gaml jiknamv.

³⁹Hoqg dvqsin koibo gaml akv si, ‘Noqg door-doopwngam no atam abynam hvb aby boto.’

⁴⁰Mojesg gamlv hoo nyiqry benbo tulug bvrwq niqtuqkv mwlwngv soq vnyi so doogw dvn.”

⁴¹Lok Parisi ata go olum gob doqkum doolum dvkho Jisu bulam toxnum.

⁴²“Ywwn bog pagoqkam nulv hoggub mwwdwn? Mwv hiyvg ko hosiv yu?” Bulv birwqnum, “Mwv Debidg ko hosiv yukv.”

⁴³Jisu bulam toxnum, “Hvbnyiloqkam hoggub Yalv Debidnvn bilwql mwam At Sw hvl benum?”

⁴⁴“At Sw ngoqg nyiit atwn benum: Ngoqg lvqbwq taqc so dooto hwdlo ngo noqg nyemaqngam noqg lvpia niikumho doodwb mvma deedib.”

⁴⁵Debid mwam ngoqg At Swv hvl goqn mvnyiloqkam Ywwnbo ak hv hoggub nyil Debidg ko hosiqb nyitayin?

⁴⁶Hiyvkam Jisug toxnam mam akukam birwq nyomanum ho hoq aal jaq hoqgv hiyvkam mwam hog tox dvb hampeq lakmab nyiknum.