Read Nyishi METIYU 24 Bible Online

METIYU 24 - Nyishi bible

METIYU 24

¹Jisu Xumk nam hoqgv lengknv wdkub nyitanum, hoq ditaqho buu tulungv mwwg dookub hvvnwq banv Xumk nam hoqg rwwpum mam kaakin banv mwam benum,

²Mwv benum, “Vv, nulv soq tulu sam hind alwb kvvdy to, ngo nulam sam bedwn soq wlw tulug pwggin aoho pwggin doonbo wlw pwkin gonkam hurpaq maanam akukam dooram, mwlwngam hurpaq dvb nyitayin.’’

³Kokw so Jisu Olib Puutu aoho doodwkho mwwg buu tulungv vpwb mwwg dookub haabnv soq mwlw si hwdam nyitayin ham ngulam bekin tvb hvl benum, “Ho noqg haata yukam hoqgv soq gvda so nyiid kunam pagoqkam kaacin dvb hog nvkvxeq nyitayin.’’

⁴Jisu bulam birwqnum, “Nulv hiyv nvkam pwqk maab hengab jaqb dooto.

⁵Nyiv vigo ngoqg eminb haal, ‘Ngo Kristok!’ hvl betayin hoo nyi tulungam pwqtayin.

⁶Ho nulv ogumho nyob panam mam tapa tayin hoo aado ho nyob patanam puiyam kam tapa tayin. Hingkwq-kvwq maabv, hengab to hoggab soq si nyiky dvb nyitayin, hvbmabde soq si nyigam gab moodv ku hvdwb nyiram.

⁷Gvdangv akwn ceebiob akwn baqrab tayin. Ho lvpw akwn lvpw akwnam patayin. Gvda mwlw hoo dwr buliv wtayin, nyiobiv hwqtayin.

⁸Soq mwlw si ko cinc cirabnam hvb nyinam mwxiq su.

⁹“Hoq moodam nyi tulungv hentwr laqm mam hendwb nulam nootul nyi tulu alaqho gvqlwq jitayin, hoo mengm dvb jitayin, hoo ngoqg emin gab mwlwngv nulam oyum tayin.

¹⁰Hoq moodam nyi tulungv vigo bulug mwwjwngam paqxia tayin, akwn akwn nyepin pimin sutayin, ho akwn akwn oyum mins tayin.

¹¹Hoq kokwb xaalyob nyiqry benbo tulungv lengtayin hoo nyi tulungam vigo mvvxa tayin.

¹²Almanbov vigo nyigam gab nyi tulug abynamv hviyiq taikun.

¹³Hvbmabde hiyv kokw namgob cwql dootayin hoqham ywwtayin.

¹⁴Ho soq tugu pui sam gvda mwlwho hvvkib nyi mwlwngam betam tamxongam swcw nyodongv twrta yikun.

¹⁵“Ho nulv ‘nyiqry kaanbo’ Daniyelwg boswl lomdwb dvrwqbo nyookho daqdwb benam mam kaapa tayin.’’ (Sam poory bov si hognvkam bedwn ham tacinto).

¹⁶“Judiya ho doonbo nyi tulungv puutu aob keleqdvb nyitayin.

¹⁷Ho mwwlo aoho doonbo nyiv ipoql mwwg dvrab pam naatab nam urab haamabv.

¹⁸Rongo lo doonbo nyiv mwwg kamtam naatab nammwb wkur maab.

¹⁹Hoq ko gvnbo nyem tulu ngvla ko vjwbo nyem tulu gab hentwr jaqb mwwpanam go.

²⁰Nulug hoq kenam ham tapam poolam, ho doonu dvk aalam nyim mvma dvb Pwnboam xumto.

²¹Hoqgab hoqhvk hentwr go gvda gvtam pwdwk hoqgv nyi tulungam hoqhvk hentwr henam sija godab cengka ma. Ho kokwngam kam hoqhvk nywywngam cengka ram.

²²Hvbmabde Pwnbov hoq moodam anyo dvb mvma nyiloqkam hiyvg nyivkam swwram. Hoggab xuqnam nyi tulu gab hoq aalam loodw dvb mvtayin.

²³“Ho hiyv akgon nam ‘Kaato, Kristo si doodo hvbmab!’ ‘Vv doodo hvl bejaqkam!’ nulv mwam tvjw maabv.

²⁴Hoggab xaalyo bo kristo ho xaalyo bo nyiqry benbo tulungv lengtayin. Bulv kaama tamanam swrdorxeq nyimanam mam nyil Pwnbog xuqknam nyi tulungam xaalyo lyopaq tayin.

²⁵Tagabto ngo moodiv haama daab nulam bekin pakun.

²⁶“Hvbmabde nyi tulungv nulam mwv nyoro rokam uraho doodwk kaaka to hvjaqkam hoqb wmabv, hvbmab mwv si kvsil doodwk hvjaqkam ham tvjwmab.

²⁷Hoggab Nyia Ko Tuupv haaikam doonyaqngv hoggub dou-caga hoqgv dou-haagab taiyam bioqnam hvbkalam nyitayin.

²⁸“Hogloqho svmangv doodwn hoqho dookpulv jorkum tayin.

²⁹“Hoqhvb hentwr hend moodv wxo kalam doonyi kam kan puta yukun ho poolv kam huukram, takarv doonyi ao toloqgv holtayin hoo doa aog atoram likub dvb mvtayin.

³⁰Hoq kokwb Nyia Ko Tuupv haatanam mam kaacin dvb doonyi ao tos nyitayin, ho gvda soq nyob luuxiv nyix-riitayin, Nyia Ko Tuupwg doomwq aolo xitor-xilo gob nyil yuudub ipoqnam mam kaapa tayin.

³¹Ho mwv gvda gvt tuuly koi alboam miql mwwg ao gumtw mwlwngam taqg-loosaqb kanam tayin, ho mwwg xuqnam tulu mwlwngam gvda gvt tvpw hoqgam bookum tayin.

³²“Taoq svvn doocnam soqgv nulv hog ak cengto. Taoq svvn haqbv vjwl ok jurlin yukam dwr poolv hvvnwql haai kubo hvl nulv cengdwn.

³³Hoq hvbkalam soq mwlw nyinam sam kaapa yukam moodv oguml nyidynam aalv nyirab yukbo mwwl cengto.

³⁴Ngo nulam bitwjaqb bedwn, sam mwwgabto, so mwlw si nyima deedib apo soq nyi tulu si siram.

³⁵Swcw nyodongv niitayin hvbmabde Pwnbog agamv nywywngam niiram.

³⁶“Hoq aalam la hoq mood hvvdam hwdlo haatayin hvl ham hiyvkam cengma dvn, ao gvda tol doonbo ao gumtw ngvkam ho Ko Tuupv kam cengma dvn, hvbmabde Abv aro cingtwqdvn.

³⁷Nyia Ko Tuupwg haanamv Noag moodho hoggub nyinum hoq hvbkalam nyitayin.

³⁸Diidwr issiv haama daadho nyi tulungv dvl-twwl, nyem naal, nyega bool, Noa hulu urab cao namgob nyil doonum.

³⁹Hvbsujaqkam bulam diidwr issiv toal mwlwngam urab nuul wg namgob hog gokam mwwdar lamab doonum. Hoq hvbkalam Nyia Ko Tuupv haaikam nyitayin.

⁴⁰Hoq moodam nyi vnyi go rongo ho rongo mudul dooikam, akwn ham naal wgtayin, akwn ham apaqpel wleq tayin.

⁴¹Nyem vnyi go dux cvngparho dux xudul dootayin, akwn nam bool wleq gvtayin, akwn dootayin.

⁴²“Hoqgab nulv hengab dooto. Hoggab At Sw hwdam haatayin ham nulv cengma do.

⁴³Dvcobov hwdam haatayin ham nam atv cengloqkam huul dootwl dvcobo nyi akv mwwg nammam pakol naamram.

⁴⁴Hoqgab nulv ham looxiam hengab mwx-mvaql dooto, hoggab Nyia Ko Tuupv haaram bo nulv mwwd mood jaqkam mwv haatayin.

⁴⁵“Hvnyiloqkam hiyv mwwjwnam la mwwlaq bob nyidwn? Mwv at akv nyera asaqngam kvvyw-tada mvdwb ho bulam mood jaqkam dvsam jim dvb atv apnam.

⁴⁶Bir atv nammwb haai kukam soq mwlw sam nyidu dvb kaapanam nyera ak hv jaqmolo paqnam nyerangv.

⁴⁷Jvqtw jaqb ngo nulam bekin dvn, at akv hoq nyera akam mwwg gumnam mwlwngam rvky mvdwb jitayin.

⁴⁸Hvbmabde almanbo nyerangv atam betayin ngoqg at sija haakram oyu tayin,

⁴⁹hvl bel mwwg nyera swwbam asaqkam jwwrab baloqkam ho twwxum dviyaq bo lvgab dvl-twwl nyibaloqkam.

⁵⁰Hoq nyera akv mwwg at akv haaram mwwl doodu dvk aalam cengmab hookur tayin.

⁵¹Bir atv mwam tunyi gob mvtayin ho mwam hang pwnyi bo kaak-takdvb nyinbo nyi tulu lvgab mwam jitayin. Ho mwv xabl mwwg exiam dvxeql dootayin.