Read Nyishi METIYU 25 Bible Online

METIYU 25 - Nyishi bible

METIYU 25

¹“Pwnbog lvpwngam hoq moodam nyem wywg nyegangam lamta ho wrwql kvvrwqbo nyem tulu hvb nyitayin.

²Bulug pengko hoqgv ang gon nyiidam bo hoo ang gon hv mwwlaqbo nyijwrb nyinum.

³nyiidam bo nyijwr ang-gv muram bvvl wgnum hvbmabde mur gab kuty bvvbin maab wnum,

⁴hvbmabde mwwlaqbo nyijwr ang-gv mur lvgab kuty uppum pumg gob bvvtaql wnum.

⁵Nyegangv haata yikho yumy kunv yubtab kunum.

⁶“Ai nywyw raab nyiknum, ho agam yal ak tapanum, kv, si nyegangv haadku, haag dvl mwam kvvrwqto.

⁷Hoq nyijwr wywngv bulv huurab kunamv bulug muram kuty toolwqnum,

⁸hvbmabde nyiidam bo tulungv mwwlaqbo tulungam benum, nulug kuty hoqgv ngulam meeg jitwb hoggab ngulug murv miqta duku.

⁹Ma, hog jinyiram, hvl birwqnum, nulam jidub la ngul gab koigo dookma. Hvbmabde puqnbo dookub wgdvl nulgab atv rvta.

¹⁰Hoqgab kokw so nyiidam bo nyijwr tulungv kuty rvtab wleq dvkho nyega akv haaknum. Ho mwx-mvaql doonbo nyijwr ang-gv mwwg lvgab nyem naak durumko nam urab haaknum, kokw so viyap pam ciqtum kunum.

¹¹“Kokw so nyijwr tuugin hvvc kunum. Bulv sogoql benum ‘Tomswrbo! tomswrbo! Ngulam urab haam tvb,’

¹²‘Nyegangv birwqnum, jvqtw jaqb bedwn, ngo nulam cengma.’”

¹³Bitwr-benyaho Jisu benum, “Hoqgab nulv hengab hvvmin gvdwl kaayal dooto, hoggab nulv mwwg haad aalam cengma.

¹⁴“Hoq aalam Ao gvda Lvpwngam nyera tulungam goqkum banv mwwg gumnam rongongam nyera tulug alaqho jilwqpel aado gvdab gaqtab wnbo nyi hvb nyitayin,

¹⁵Mwv vxiam mwwg nyidynam mam hinglwql akwn mwv rup twngk kabar lwwyw ang-go jinum, akwn lwwyw vnyi go, ho akwn lwwyw akin go jinum. Kokw so mwv wleq kunum.

¹⁶Lwwyw ang-go naanbo nyera akv nyebia jaqb wknv kor mvnum hoo twngk lwwyw ang gota door twnwr kunum.

¹⁷Hoq hvbkalam lwwyw vnyi go naanbo akv lwwyw vnyi gota door twnwr kunum,

¹⁸hvbmabde lwwyw go naanbo nyi akv ham naalayil ked urahv ung dukoq tvl mwwg at ak hoqg twngkam ungho liilwql apnum.

¹⁹“Oyu jaqg kokw so at akv hookur kunum, hoo mwwg nyera tulug lvgab xootwram tvrabnum,

²⁰Lwwyw ang-go naanbo nyera akv haabnv twngk lwwyw ang gota jijo ywwtwl benum, At no ngam lwwyw ang-go jinum, ‘Kaato! Ngo lwwyw ang gota door twnwr pakun.’

²¹Mwwg bir at akv mwam benum, ‘Dengkyjaqb nyipa, ngoqg mwwjwnam hoo albo ngoqg nyera. No anyo ko bon nyiklo mwwjw dvb nyipa, hoqgab ngo nam koi albo pagoqkam rvky mvdwb jitayin. No ngoqg lvgab hemp poba to.’

²²“Kokw so soq rup twngk lwwyw vnyi go jinam akv haabnv benum, ‘Kaato! Ngo lwwyw vnyi gota door twnwr pakun.’

²³Bir at akv benum, ‘Dengkyjaqb nyipa, ngoqg mwwjwnam ho ngoqg albo nyera. No anyo ko bon nyiklo mwwjw alwb dvb nyipa, hoqgab ngo nam koi albo pagoqkam rvky mvdwb jitayin. No ngoqg lvgab hemp poba to.

²⁴“Hoq kokwb rup twngk lwwyw go jinam akv haabnv benum, ‘Bir at, ngo nam cengdwn, no vdwbo nyiv, hoglo no vly aaxy liima pan hoqho vly-axeq naadwn, hoo hoglo no ampaq paqmanum hoqgv am naadwn.

²⁵Hoqgab ngo bosnum, ho noqg twngkam ngo naalayil wbnv ked urahv ung gol liil apnam. Kaato soq si noqg jinamv.’

²⁶“Mwwg bir at akv mwam benum, ‘Almanbo ho jaama bo nyera no! Hoglo ngo vly aaxy liimanum hoqho vly-axeq naadwn, hoo hoglo ngo ampaq paqma dvn hoqho am naadwn ham no cengt kubanyi?

²⁷Hvbnyiloqkam no ngoqg twngkam twngk noosu golo vlwqtvl doom jikin banyi, ho ngo ngoqg twngk ap pvvjongam naataql naadwb nyikinum.

²⁸Hoqgab sija mwwg galoqkv twngkam naag dukul hiyv lwwyw ang-go doogdvn ham jitku.

²⁹Hoggab hiyv nyiv meeg doogdvn hoq nyi akam meegta jibw dvb nyitayin, hoo mwwg gv naleq jaqb dootayin, hvbmabde hiyv nyiv hog akkam doog maadwn hoq nyi doognam gumn vcwramkam mwwg galoqkv naareq dvb nyitayin.

³⁰Soq almanbo nyera sam aggag kan twdwq alo hurpaq tvl mwam xabl hoo exy dvxeq xeql doomto.’

³¹“Nyia Ko Tuupv Lvpw at gob nyil haaikukam mwv mwwg ao gumtw mwlwngam mwwg lvgab haag tayin. Mwv mwwg lvpw at pwqlw dootam aoho dootayin.

³²ho luuxig nyi tulungam mwwg aoho olum gob bookum tayin. Hoq kokwb mwv nyi tulungam pvtw vnyi gob sviya rvky bov sviyangam sibin hoqgv rooxubl mvnam hvb mvtayin.

³³Mwv jvqtw bo nyi tulungam mwwg lvqbwq taqc ho hoo laqc taqc ho asaqkam doom tayin.

³⁴Ho Lvpw atv mwwg lvqbwq taqc ho doonbo nyi tulungam betayin. ‘Haato, ngoqg Abwg ayanam nyi tulu, nulv gvda gvt sam bvl pwdwk hoqgv mwx-mvaql apkunam lvpwngam nulv bvvtku,

³⁵Hoggab ngo kanonum, nulv ngam dvdwb jinum, ngo hvngwrnum, nulv twwdwb jinum. Ngo nyoodo nyiib nyinum, nulv ngam nulug namho doonu dvb jinum.

³⁶Ngo talonum, nulv ngam vj koomnum, ngo vcnum, nulv ngam vc sonum, ngo pvtwqho doonum nulv ngam kaatab haanum.’

³⁷“Ho jvqtw bo nyi tulungv mwam birwqtayin, ‘At Sw, ngulv hwdlo nam kano dvb lok kaapal dvdwb jinum, ho hvngwrnam mam kaapal twwdwb jinum?

³⁸Ngulv nam hwdlo nyoodo nyiib nyidwb nyinam mam lok kaapal svgagvrwqnum ngulug namho ho vj koopa maanam mam kaatwl vj koomnum?

³⁹Ngulv hwdlo nam vcnam mam lok kaapa tvl nam kaatab haanam?’

⁴⁰Ho Lvpw at akv birwqtayin, ‘Ngo nulam bedwn, ngoqg soq vbw-bor tulug pengko so hiyv ak gonam nulv soq sam nyijpan, hoqhv ngam nyid gab nyipa kun!’

⁴¹“Hoq kokwb mwwg laqc taqc ho doonbo nyi tulungam mwv betayin, ‘Pwnbov beenam nyi tulu, nulv ngoqg ogum soqgv wleqto, ui gab la mwwg gumtw tulu gab mvl apnam nwrba cwtam wmmwb nulv wnku,

⁴²Ngo kanonum, nulv ngam dvdwb jimanum, hvngwrnum, nulv ngam twwdwb jimanum;

⁴³Ngo kaacin maanam nyi akub nyinum hvbmabde nulv nulug namho svgagvrwq maanum. Vj koopa maanum, nulv ngam vj koodwb jimanum, ngo vcnum, nulv ngam vc kaamanum, pvtwqho doonum, nulv ngam kaatab haamanum.’

⁴⁴“Ho mwam birwqtayin, ‘At Sw, ngulv hwdlo nam lok kanonam mam, hvngwrnam mam, vc cinam mam ho pvtwqho doonam mam kaapa tvl nam ngulv svka maab nyinum?’

⁴⁵Ho Lvpw atv birwqtayin, ‘Ngo nulam jvqtw jaqb bedwn, hiyv akgon jaqkam soq pengko soqgv nulv svgagvrwql svka maanum.’

⁴⁶Hoqgab soq tulu sam bulam nwrba cwtam gob laqm baqkub kanam taikun. Hvbmabde jvqtw bo nyi tulungam nwrba cwtam swwgwb wtayin.’’