Read Nyishi METIYU 26 Bible Online

METIYU 26 - Nyishi bible

METIYU 26

¹Jisu soq mwlw sam beknv benya tukul, kokw so mwwg buu tulungam mwv benum,

²“Aal loonyig kokwngam Juhudi nyedarko Durum moodho Nyia Ko Tuupam daapo aoho mengm dvb nyemaq alaqho jipaqtayin ham nulv cengdo.’’

³Kokw so nyub but tulungv la nyiixa nyi tulungv olum gob Nyub But, Kaiyapaswg namho hookum nyanum.

⁴Jisun kvsil nootul mwam mengdwb ywrsnum,

⁵“Ngulv sam durum dook moodam nyiyo ju, hvb nyibaloqkam nyi tulungv hur marab duqtayi,’’ hvl benum.

⁶Jisu Betani nampamho tviyiq nyinbo Simong namho doonum.

⁷Jisu dvdul doodwkho nyem akv kuty xinam sungam albo alabastar uppum pumg bvalayil mwwg dookub haabnv mwwg dumpongam nyem akv kuty piaqnum.

⁸Buu tulungv sam kaapa tvl hang lengb nv benum, “Hoggab sam mwciq-mwiyiq dvn?

⁹Soq kuty sungam albo sam puqnyiloqkam twngkv vigo puqlin dvn nvpv, ho hoq twngkam jwwgwbo nyi tulungam jidwb alnum.’’

¹⁰Bulv hognvkam bidul doonam ham Jisu cengtwl bulam benum, “Nulv hoggab nyem dvn aksam bitur dvn? Hoggab mwn nyis hvvtw poot jaqkam ngoqgab nyipa kun.

¹¹Jwwgwbo nyi tulungam nulug lvgab looxiam doodwb kaapa tayin hvbmabde nulv ngam looxiam nulug lvgab doodwb kaaparam.

¹²Mwv ngoqg gv aoso kuty sungam alboam piaqnam si ngam nyubuho liidnam mam nyix-nyiaql nyidwn.

¹³Ngo nulam jvqtw jaqb bedwn, hogloq ho soq tugu pui sam bekin tayin hoqho soq nyem ak soq nyinam sam bepa dvb nyitayin.’’

¹⁴Kokw so buu wyw leq vnyig pengko hoqgv akwn Judas Iskeriot hvl eminam akv nyub but tulug dookub wbnv

¹⁵mwlwngam benum, “Ngo Jisun nulam nyepin pinlin jibaloqkam nulv ngam hognvkv jitayin?’’ Bulv rup twngk kabar cammumgo hvnv ham mwam jinum.

¹⁶Hoq hoqgv Judas Jisun bulug alaqho nyepin pinlin dvb mood albo pagoq meegaql doonum.

¹⁷Opap kiilwq maanam wtw dvd otuq durum aalho buu tulungv Jisug ogum haabnv mwam toxnum. “Dvtv Durum mam no ngulam hogloqho mwx-mvaq mvdwb mwwdwn?’’

¹⁸Mwv bulam benum, “Bopam uraho doonbo akwg dookub wgdvl mwam beta, ‘Tomswr bov, bedwn, Ngoqg moodv haapa ku, ngo la ngoqg buu tulungv Dvtv durum sam noqg namho dvntayin.’”

¹⁹Buu tulungv Jisug bulam bekjaqb Dvtv Durum dvnam mam mwx-mvaql mvknum.

²⁰Ariyum yukso, mwv mwwg wyw leq vnyig buu tulug lvgab lokub dvdwb doa kunum.

²¹Dvsam dvdul dootwl Jisu benum, “Ngo nulam jvqtw jaqb bedwn, nulug pengko soqgv ngam nyepin tayin.’’

²²Buu tulungv vijaqg muur albanv mwam akwn kokwb akwn tox xurabnum, “At Sw ngoma co?’’

²³Jisu birwqnum, “Hiyv ngoqg lvgab mwwg wtwngam dvnam betaho swwburbo ak hv ngam nyepin tayin,

²⁴Dvrwqbo potangv bekjaqb Nyia Ko Tuupv sitayin hvl benam hvb nyitayin, hvbmabde Nyia Ko Tuupam nyepinbo nyi ak hoqgab mwwdwqnam jaqgo! Hoq ak hv nywywngam dwrbuqma nyiloqkam aljaq himbanyi.’’

²⁵Ho mwam nyepinbo Judas benum, “Tomswrbo, jvqtw jaqb no ngam bema co?’’ Jisu mwam birwqnum, “No kvtaqjaqb bedo.’’

²⁶Kokw so dvdul doodwkho Jisu wtw taqg naarab banv xuml paqnv wtwngam pindub tvl mwwg buu tulungam ham jinum, sam naagdvl, “Dvto, soq si ngoqg gv soodinv.’’

²⁷Hoq kokw so mwv pvtaqkam naarab banv xuml Pwnboam paqnum, ho bulam jinum, mwv benum, “Nulv mwlwngv sam twwto,

²⁸Soq si ngoqg hijumv, Pwnbog pvvbv, mwlwg nyicam nyedar darxaq naadwb.

²⁹Ngo nulam bedwn, soq twwnam sam nulug lvgab ngo nywywngam twwpa kuram hwdlo ngoqg Abwg lvpw tol nitib twwnam sam lok nulug lvgab twwma deedib.’’

³⁰Kokw so bemin benum, Olib puutub lengl wknum.

³¹Ho Jisu bulam benum, “Soiyig aiso nul mwlwngv ngam apaqpel keleqtayin, hoggab Dvrwqbo Potangv bedwn, ‘Pwnbov sviya rvkybo akam mengtayin ho sviya pvtwngam cwrsaq twqb mvtayin.’

³²Hvbmabde ngam turdkub swwgwb purab kokwngam ngo nulug otuqb Galilib wcotayin.’’

³³Pitor Jisun birwqnum, “Mwlwngv nam apaqjaqkam, ngo nywywngam nam apaqpel wram!’’

³⁴Jisu Pitornvn benum, “Ngo jvqtwjaq bedwn, soi poroqngv xoqma daab, ngam no cengma dvnwk hvl luum go no betayin!’’

³⁵Pitor birwqnum, “Ngo noqg lvgab sidwb nyijaqkam hoojaqkam ngo sitayin.’’ Hoq benam akinam buu tulu mwlwngv benum.

³⁶Hoq kokw so Jisu mwwg buu tulungam bool Getsemani hvl benam nyookub wbnv mwwg buu tulungam mwv benum, “Nulv so dooiya to, ngo alo wggin gvdwl xumtayin.’’

³⁷Mwv Pitornvn la Jebedig ko tuup vnyiam mwwg lvgab bool wgnum. Ho mwv vdwq akwl mwwdwq saqk gob vs-axaqb nyirabnum.

³⁸Kokw so mwv bulam benum, “Ngoqg hang si mwwdwqkv ngam sig tado. Nulv soq so hengabl ngoqg lvgab dooiya to!’’

³⁹Mwv hoq ditaq hoqgv meeg wggin layil, mwv atv kedhv nywtin tvl Abam xumnam, “Ngoqg Ab, soq hentwrnam ui pvtaq sam ngoqg galoqkv naapaq dvb nyipa nyiloqkam naaxa tvb! Hvbmabde ngoqg mwwkub ma, hvbmab noqg mwwlwqkob nyimto.’’

⁴⁰Kokw so mwv buu oumg dookub haanum ho mwv bulam yubl doodub kaapanum, ho mwv Pitornvn benum, “Hoggub nyil nul oumv ngoqg lvgab wm swlw duur gob kam kaayal doonyi maadkun?

⁴¹Hoqgab pookal sup koma dvb hengabl xuml hvvmin gvdwl nulv dooto. Yalv mwwby sujaqkam gv ayaqngv ator maadwn.’’

⁴²Jisu lokta bulam apaqpel wggin banv xuml benam, “Ngoqg Ab, soq hentwram twwn nan pvtaq sam ngo twwma dvb no naapaq dvb mwwma nyiloqkam, noqg mwwkub nyimto.’’

⁴³Mwv lokta hookurl kaaknamv bulam yubdul doodub kaapanum, hoggab bulug vnyiqkam nyiqbiol doodwb ap nyomanum.

⁴⁴Kokw so Jisu hvraqb bulam apaqpel luum dvb xumtab wnum, ho benam akin agam mam hvraqb betinl benum.

⁴⁵Kokw so mwv buu tulug dookub hookur kunv benum, “Nulv sija godab yubtab tabl doodu dvn? Kaato! Nyia Ko Tuupam nyicbo nyi tulug alaqho gvqlwq jid moodv hvvnwq paku.

⁴⁶Kuj, gorabtuk, ngulv wnkuj. Kaato, ngam nyepinbo nyi akv si haapa ku!’’

⁴⁷Jisu agam goodul doodu dvkho buu wyw leq vnyig pengko hoqgv akwn Judas, mwwg lvgab nyi acamgo nyub buda tulungv la nyi axa tulungv kanamnamv lyoqr orioq ho dvvp jootwl haanyanum.

⁴⁸Nyepinbo akv nyi acam mam bix-beaql apnum, mwv benum, “Ngo hoglo nyi ak ham moopup tayin, hoq nyi hv nulug nootu tanam akv. Ho nulv mwam nootu laka!’’

⁴⁹Judas Jisug ogum haabnv benum, “Tomswrbo, swrsomalongv noqg lvgab dooba nvka,’’ hvl mwam moopupnum.

⁵⁰Jisu birwqnum, “Ajin, no hognvkam nyitab haapan ham vnwqb nyito!’’ Kokw so ogum haabnv Jisug gv aoho alaq idaql mwam nootul bool wg kunum.

⁵¹Jisug lvgab yvba bo nyi tulug pengko hoqgv akwn mwwg orioqngam seqlin banv nyub but jaqg nyera akwg nyuru ruugwn xaqxianum.

⁵²Jisu mwam benum, “Noqg orioqngam buqxaho xwqlwq tuku. Lyoqr orioq buqnbo mwlwngv lyoqr lvgab atam twrstayin.

⁵³Ngo ngoqg Abam svka konyiloqkam mwv ao gumtw nyemaq lwwyw leq lwwnyi laleqgo kanam jiram hvl no mwwdwn?

⁵⁴Hvbmabde Dvrwqbo potalo bepnamv hoggub nyil niqtuq lengnamv niqtuq lengtayin?’’

⁵⁵Kokw so Jisu nyi tulungam benum, “Nulv dvcobo nyi akgon nootunam hvb orioq bwwl hoo dvvp jootwl ngam nootu taab haaiyin i? Ngo aalwg looxiam dvrwq namlo ho ngo dootwl tomswr dvkho nulv ngam nootu maanum.

⁵⁶Hvbmabde mwlw si nyiqry benbo tulungv Dvrwqbo potalo xeqpwl ap kunam mam niqtuq lengm dvb nyiknum.’’ Ho buu mwlwngv Mwam apaq peekul ho keleq kunum.

⁵⁷Jisun nootubo nyi tulungv mwam nyub but Kaiyapaswg nammwb Pvvb tomswrbo ho nyi axa tulug dookum dookho boanum.

⁵⁸Pitor wc-wc yoomab kokw-kokwb nyub but nam baag ogum namgob wmin gvnum. Mwv urab haabnv rvkybo tulug lvgab dootwl hoggub jaq nyin dvba dw ham kaayal doonum.

⁵⁹Nyub buda tulungv ho Dookum hoqg doonbo mwlwngv Jisun mengdwb vm xaalyo benbo hvvky pagoq meekarnum.

⁶⁰Hvbmabde hog akukam meelin nyomab nyinum, hvbsujaqkam vigo nyiv mwwg pagoqkam xaalyob benum. Kokw jaqso nyi vnyi go

⁶¹haabnv Jisun benum, “Soq nyi ak si benum, ‘Ngo Pwnbog xumk nammam sapia tvl aal loum kokwngam mvdar tayin hvl benum.’”

⁶²Nyub but akv daqrab banv Jisun benum, “No soq sam nam yolu hvl benam sam hog birwqsv dooma i?’’

⁶³Jisu birwqmab, cooikab doonum. Nyub but akv lokta mwam benum, “Sima bo Pwnbog emin gab ngo nam dingl bedwn ngulam jvqtw jaqb bekin tvb, no Pwnbog Ko Tuup, Ywwnbo ak hvvjaq yv?’’

⁶⁴Jisu mwam birwqnum, “Noqg benam hv sulak hvbmabde ngo nul mwlwngam At ator yaanbo akwg lvqbwq alaq taqc tol doodwb hoo ao gvda toloqgv doomwq aoho ipoqnam mam kaapa tayin.’’

⁶⁵Nyub but akv mwwg atwg gv vjam swrcaq-swryaq banv benum, “Mwv Pwnboam bepaq paku, ngulv sija hvvky meegaq dukub nyikma, hoggab mwv Pwnboam bepaq taiyaqnam mam nulv atv tagnukba!

⁶⁶Nulv hoggub mwwdo?’’ Bulv birwqnum, “Mwv nyixiaqpa, hoqgab mwv sidkub nyipa ku.’’

⁶⁷Kokw so mwwg nyuqm mam tacor curyaqnum, hoo mwam jwwnum, hoo mwam pitaql mvnbo nyi tulungv

⁶⁸benum, “Ywwnbo, nam jwwn bo nyiv hiyv ham nyiqry kaalin kaatna!’’

⁶⁹Pitor nyub but nam wgag haty ho doodu dvkho nyub butwg paqn nyijwr ko akwn mwam benum, “No kam Galili Jisu lvgab yvn mvlak.’’

⁷⁰Hvbmabde mwam cengmak hvl bul mwlwg agaho benum, mwv birwqnum, “No hog hvl bedwn ham ngo tacin ma.’’

⁷¹Hoqgv mwv urag viyap haagab haanum, hoqgv mwam nyem ko ak kaapa tvl nyi tulungam bekinnum, “Mwv Najaret Jisug lvgab yvbanum.’’

⁷²Pitor lokta lwnyi dvb birwqnum, “Ngo dingl bedwn, ngo hoqg nyi ak ham ngo cengma dvn!’’

⁷³Hoqgv oyu maadab hoq dvtaqho daqnyiabo nyi tulungv Pitorg dookub haabnv benum, “No bulug pengko hoqgv yvnbo akgon hvvma, hoggab noqg agam goonamv nam bekin do!’’

⁷⁴Kokw so Pitor benum, “Ngo hoq nyi ak ham cengma! Ngo xaalyo dvloqkam Pwnbov ngam kaato hvl beesnum!’’ Hvl beda kalam poroqngv xoqnum,

⁷⁵ho Pitor Jisu mwam hog hvl benum, ham mwwpa kunum poroqngv xoqma daab, “No ngam cengmak hvl luum go vm mvtayin.’’ Mwv agab lengknv vcjaqb xabnum.