Read Nyishi METIYU 27 Bible Online

METIYU 27 - Nyishi bible

METIYU 27

¹Ar komc nyub buda tulu ngvla Lvpw hoq nyi nyiixa tulungv Jisun mengdwb hvl ywrs nyiaknum.

²Mwam tagv korcuptvl Roman Gora ab Pilatg alaqb jilwqnum.

³Kokw so nyepinbo Judas, Jisun mengdkub bvrwq loornam mam tapa tvl mwv mwwkur kunv rup twngk cammum mam nyub buda tulu, nyi nyiixa tulug dookub bwkurl haanum.

⁴Mwv benum, “Ngo yolu dooma bo nyi akam nyepin tukul simnam si ngo nyic nyipa ku.’’ Bulv birwqnum, “Hoq pagoq ham ngulv hog mwwdwq dwqs dooma. No atv ham cengs tvka!’’

⁵Judas twngkam xumk nam urahv hurpaqpel wleqnum hoo kokw so mwv atv pvqswrl siknum.

⁶Kokw so nyub buda tulungv hoq twngkam naarab banv benum, “Soq si nyi hijum korv, hoo so xumk nam noosu lo vlwq dvb nyima dvn.’’

⁷Kokw so goomin sul goody kunv, Dvkam pwcw mvnbo hoq kedam nyoodo nyi tulungam svma liikum koob hog twngkam rvn kunum.

⁸Hoqgab soolo godab hoq kedam “Hijumg kediv’’ hvl soolo godab begdvn.

⁹Hoqgab nyiqry kaanbo Jerimiya benamv niqtuq lengknum, “Israel nyi tulungv mwam rup twngk cammum mam jidkub loor kunam mam naaknv,

¹⁰hoo At Sw ngam gaml jinam hvbkalam pwcw mvnbo kedam rvn kunum.’’

¹¹Jisu mwam toxbo Roman Gora abwg agaho daqnum, Pilat toxnum, “No Juhudi tulug Lvpw atv jaq i?’’ Jisu birwqnum, “Noqg begdvn hv sulak.’’

¹²Hvbmabde mwv nyub buda tuluho nyi axa tulug yolu benam mam hog gokam birwq maanum.

¹³Hoqgab Pilat mwam benum, “Bulv soq mwlw yolu sam nam benam sam no tapa maadwn i?’’

¹⁴Hvbmabde Jisu agam gamgkam birwq maanum, ham kaatwl Gora ab akv vigo lomnum.

¹⁵Nyedarko durum vxiam Roman Gora ab akv nyi tulungv topaq mvdkub begam gab pvtwq lwqnam nyi ak tolin jiknum.

¹⁶Hoq apoho mwlwngv cimpwnam nyuum akv pvtwq uraho doomnum, mwwg eminv Barabas.

¹⁷Kokw so nyi tulug olum gob hookum dvkho Pilat bulam toxnum, “Ngo hogloq akam nulam tolin jitayin? Barabaswn hvbmab Ywwnbo hvl benam Jisun?’’

¹⁸Hoqgab mwv cengnum Juhudi tulungv hang baqbnv Jisun mwwg alaqho jilwqnum.

¹⁹Pilat pw-hwwdul doodu dvkho mwwg nywxwngv mwam pui bilwqnum, “Hoq yolu doomabo nyiidar nyi akwg aoho alaq idaq maab, hoggab mwwg pagoq gab ngo soi yuma maanyi altvn.’’

²⁰Nyub buda ngvla nyi axa tulungv nyi tulungam Pilatnvn Barabaswn tolin tvk ho Jisu mengtwk hvl gumnum.

²¹Hvbmabde Pilat nyi tulungam toxnum, “Soq nyi pengko so hogloq akam ngam nulv tolin tvbwk hvl bedwn?’’ Bulv birwqnum, “Barabaswn.’’

²²“Hvbnyiloqkam Ywwnbo hvl benam, Jisun ngo hoggub mvtayin?’’ Hvl Pilat toxnum. Bulv birwqnum, “Daapo tol mengto!’’

²³Hvbmabde Pilat bulam toxnum “Mwv hognvk nyimurv nyipan?’’ Hvb beda kalam vc alwb sogoql kiir nool benum, “Mwam daapo tol mengto!’’

²⁴Kokw so Pilat kaanamv soq sam bidul doodub nyikma, hvbmab nyi tulug pengko ho yolu parab kimpa mwwnv, iss naabnv mwwg alaqngam nyi tulug kaagaho losuqnum, hoo mwv benum, “Soq ak soq sinam pagoq so ngoqg so yolu dooma! Soq sam nulv atv cengs laka!’’

²⁵Nyi acamv birwqnum, “Mwwg sinam yolungam ngulug aoso hoo ngulug ko tulug aoho doomto!’’

²⁶Hoqgab Pilat Barabaswn bul gab tolin jinum kokw so mwv Jisun xigurl mvtwl daapo aoho mengm dukub jilinum.

²⁷Hoq kokw so Pilatg sipai tulungv Jisun Gora ab dookum namho boalayil sipai acam campwngam mwwg taqg-loosaqb bookumnum.

²⁸Bulv mwwg vjam pipaqtvl lwwsa-lwwma bo pobaqnam vj rumg mwam pobaql koomnum.

²⁹Bulv taag ywr dumtup ak mwwg dumpo ho tulwq jinum, ho mwwg alaq lvqbwqho beqnyia daag gvqlwqnum ho lwbwngv kumbwl nyij-nyiparnum. Bulv benam, “Juhudi tulug Lvpw atv swwiyu nvka!’’

³⁰Bulv mwam tacorv curxabnum, hoo beqnyiangam naabnv mwwg dumpongam xigoql mukub nanum.

³¹Bulv nyij-nyipar mwam nyixo kokw so hoq vj poqbaqngam lok pilin tukul mwwg vjam mwam koom kunum. Hoq kokw so mwam daapo aoho mengkwb mwam agab boolin wg kunum.

³²Kokw so Jisun boolayil agab lengd kukho, Siren gvda hoqgv haanbo Simonvk hvl benam nyi ak kaapa tvl, Sipai tulungv mwam nootul Jisug daapongam joom dvb ninlwqnum.

³³Bulv Golgota hvl benam, “Dungklo alo Nyook ho wc kunum.’’

³⁴Ho Jisun kacaqbo dvrab mviyonam opongam jinum, hvbmabde mwv ham twwka tvl, twwmab apaqnum.

³⁵Bulv mwam daapoho mengknum hoo mwwg vjam naal mvpin-mvral naaknum.

³⁶Hoq kokw so hoqho dootwl mwam kaal doonum.

³⁷Mwwg dumpo ao daapoho pota taqg mwwg ceebio yolu pota taqg hvl xeqpnum, “Soq si Juhudig Lvpw atv.’’

³⁸Mwwg lvgab hoq ditaqho dvcobo nyi vnyi go, akwn lvqbwq taqc ho hoo akwn laqc taqc daapoho mengnum.

³⁹Lamta wpeq bo nyi tulungv kaatwl bulug dumpongam pvk-pvknv Jisun bej-bepar benum.

⁴⁰“No xumk nam mam sapia tvl aal loum deenam mvdar tainvk hvl benum! No Pwnbog Ko Tuupv jaqloqkam atam ywws toloqkam! Daapo hoqgv ipoqtuk loqkam.’’

⁴¹Hoq hvbkalam, nyub buda tulungv, Pvvb tomswrbo nyi tulungv hoo nyi axa tulungv mwam bej-bepar benyanum.

⁴²“Mwv nyi asaqkam ywwnum, hvbmabde mwv atam ywwny suma! Mwv Israelwg Lvpw at ak hvvma i? Mwv daapo toloqgv ipoq kubnyiloqkam ngulv mwam mwwjw tayin.

⁴³Mwv Pwnboam hingw do hoo atam Pwnbog Ko Tuupv hvl bisdvn. Hoqgab ngulv sija mwam kaaya tuj. Pwnbog mwam ywwnam mam!’’

⁴⁴Daapo aoho mwwg lvgab mengnam dvcobo tulu ngvkam mwam bej-bepar benum.

⁴⁵Aal doonyi caada dvk hoqgv itoq nagub hog mwlwngv kanv pulubnum, ho hoq wm swlw duur oum gob doonum.

⁴⁶Ariyum oum moodho vc alwb sogoql benum, “Ili, Ili, lama sabaktani?’’ hvl benamv “Ngoqg Pwnbo, Ngoqg Pwnbo hoggub ngam apaq pakun?’’

⁴⁷Hoq ditaqho daqnbo nyi tulungv mwwg hoq benam mam talayil benum, “Mwv Ilijanvn goqdo!’’

⁴⁸Bulug pengko hoqgv akwn nyebia alwb xarbnv hiipu ak naal ham roo ala golo subum tvl mwam toolo niqtuqho cabxeqtvl hwca jinv mwam twwm dvb nyinum.

⁴⁹Hvbmabde tuugin benum, “Apaqto, mwam Ilija haal ywwnam mam kaaya tuj!’’

⁵⁰Jisu lokta vc alwb sogoq kunv swwrw bingknum.

⁵¹Ho xumk nam ura hoqg vj torciqnam vjv odum hoqkv ako nagub tvqnyi gob pajeq kunum. Nyioby hwqnum, lwwnv pwnyi gob buqcnum.

⁵²Nyubungv ukonum, Pwnbog dvrwqbo nyi tulungv sik bov vigo turab kunum.

⁵³Bulv nyubungam apaq peekul Jisu sixo kokw so turab dvkho bulam dvrwqbo bopam urab haanam mam nyi tulungv kaapanum.

⁵⁴Kokw so Sipai Saabv la Sipai tulungv Jisun kaayal doon bov nyioby hwqnam mam hoo hog mwlw luuxy nyinam mam kaatwl, bos soma vrram sonum, hoo benum, “Mwv jvqtw jaqb Pwnbog Ko Tuup goj kunyi!’’

⁵⁵Jisug kokwb wba bo mwam svka bo Galili hoqgv haanbov nyemv vigo hoq ditaqho daqtwl aado hoqgv kootul koodunum.

⁵⁶Bulug pengko ho doon bov Meeri Magdalin, Jems, Josap bunyig ann Meeri ho Jebedig nywxw akv yvnum.

⁵⁷Ariyum kan tadwkho, Arimatiya nampam hoqgv nyetbo nyi Josapvk hvl eminam Jisug buub swwnbo ak.

⁵⁸Mwv Pilat dookub haabnv Jisug gv vpam konum. Pilat Josapnvn svmangam naamdvb gaml jinum.

⁵⁹Hoqgab Josap svmangam joolayil nit albo topum vj rumg hwwtumnum.

⁶⁰Oyu maadab dukol wlw lwwraq hoqgv mwwg gab apnam nyubu uraho liinum. Ho mwv wlw lwiyab pwt albo pwg nyubungam ngurtuml ap pel wleqnum.

⁶¹Meeri Magdalin, ho Meeri akwn hv nyubu taqcib doqkurl hoqho doodu nyanum.

⁶²Loogwn ho Juhudi hvdwg Doonu dvk aalwb nyinum, hoo nyub buda tulungv la Parisi tulungv Pilat dookub haabnv benum.

⁶³Gora ab ngulv mwwgab do, xaalyo bo akv mwv simab doodwkho benum, “Ngo aal loum kokwngam lokta turab tayin.

⁶⁴Hoqgab aal loumv wnam gob mwwg nyubungam hengab jaqb rvkil aptvl mwwg buu tulungam wl svmangam dvcol joosil wg mvma dvb hoo nyi tulungam mwv sinam hoqgv turab nukun hvl bekin mvma dvb rvky boloq jito. Soq kokwg xaalyo si otuqg xaalyongam alyama bo gob nyitayin.’’

⁶⁵Pilat bulam benum, “Rvky boam boogwn hoo wgdvl nyubungam hog hwdgo rvky kitayin hwdgo nulv rvky ta.’’

⁶⁶Hoqgab wknv nyubu hoqg wlw aoho morxtubnam mam apnum hoo nyubungam kaayal rvky mvdwb apaqnum.