Read Nyishi METIYU 28 Bible Online

METIYU 28 - Nyishi bible

METIYU 28

¹Doonu dvk aalv wxo kokw so wjw aal ar komc ho Meeri Magdalin hoo Meeri akwn hv nyubungam kaatab wnum,

²Cengma lvpab nyioby ak vc alwb hwqnum, ho ao At Swg gumtw ak ao gvda toloqgv ipoqbanv nyubu hoq wlw ngurtuml apnam wlwngam ngurgin tvl hoq aoho doonum.

³Mwwg gv vpv taiyam bioqnam hvb ho gv vjv tapam hvb puulu huuda-kvlanum.

⁴Rvkybo tulungv bos soma vrram sonum hoo tvmdwr hwqnv nyi sikbo hvb nyinum.

⁵Ao gumtw akv nyem tulungam benum, “Nulv bos sodwb nyikma, ngo cengdwn, daapo aoho mengknum Jisun nulv meegaqdo.

⁶Mwv so dookma, mwv benum hvbkalam, mwv turab nukun. Mwwg gel karkam haagdvl kaaka to.

⁷Sija nulv vnwqb wgdvl mwwg buu tulungam ‘Mwv sinam hoqgv turab nukun hvl bekin ta, ho mwv nulug otuqb Galilib wco nukun; nulv alo mwam kaapa tayin!’ Ngoqg benam sam nulv mwwg gab tvka.’’

⁸Bos sunam hvbjaqkam hemp lvgab nyubu hoqgv nyiory alwb xarbnv mwwg buu tulungam bekinnum.

⁹Cengma lvpab Jisu bulam kaapa tvl benum, “Swrsomalongv nulug lvgab doonka.’’ Bulv ogum haabnv mwwg lvpiangam gvbw tvl mwam xumnum.

¹⁰Jisu bulam benum, “Bos somabv. Wgdvl ngoqg buu tulungam bulam Galilib wtwk hvl bepa ta, hoo alo ngam kaapa tayin.’’

¹¹Nyem tulungv bulug lamtab wxo kokw ho nyubungam rvkybo tulu gon bopam wkur banv hognvkv nyiknum hog mwlwngam nyub buda tulungam puiyam bekinnum.

¹²Nyub buda tulungv nyi axa tulug lvgab dookum doopa banv ywrs minsul pagoq ak meelinum, rvkybo tulungam twngk vigo jitwl,

¹³benum, “Nulv yubngaql doodwkho mwwg buu tulungv haal svmangam dvcol baqg nukun hvl beto.

¹⁴Ho soq pui sam gora ab tapa baloqkam, ngulv mwam xumt dvb mvtayin hoo nulam vs-axaq pagoq hoqgv cengin tayin.’’

¹⁵Rvkybo tulungv twngkam naanum hoo bulam hoghvl bedwb jinum hvbjaq nyinum. Hoqgab Juhudi tulug pengko lo hoq hvk puiyv joodul doodwn.

¹⁶Buu wyw leq akinv Jisu bulam xipwl apko Galiliho doonbo puutub wnum.

¹⁷Kokw so mwam kaapa tvl mwam xumnum. Hvbmabde bulug pengko lo tuugin mwwjw maanum.

¹⁸Jisu bulug dookub ogum hvvnwq banv bulam benum, “Ngam ao gvda tolo hoo swcw-nyodo so hog mwlw atoram ngoqg alaq si jipa kun.

¹⁹Hoqgab nulv wn, nyob luuxig nyi mwlwngam ngoqg buub mvta, hoo bulam Ab, Ko Tuup hoo Dvrwqbo yalwg emin gab baptijum jita,

²⁰hoo ngoqg nulam gaml jinam ham bulam tomswr tvl tvjwl swwm to. Ho ngo nulug lvgab looxiam swcw-nyodongv dubnam gob dooba tayin.’’