Read Nyishi METIYU 3 Bible Online

METIYU 3 - Nyishi bible

METIYU 3

¹Hoq apoho Jon Baptist Judiya gvdag deexa-raraho haabnv puiyam berabnum.

²Mwv benum, “Nyic hoqgv mwwkur tuku, Pwnbog Lvpwngv ogum hvvnwq paku.”

³Nyiqry kaanbo Aijayag benam akv Jon kulak, mwwg pagoqkam Aijaya benum, “Nyi ak nyoro diixa-rara ura hoqgv sogoql bedo, ‘At Swg lamtangam mwx-mvaql ap yaato, mwwg wk lamtangam dinda aldvb mvl apto!’ ”

⁴Jon sudum svr vm hoqgv mvnam vj koonum, ho mwv vpin hoqgv mvnam vpin soruqkam gvvsho gvnum ho mwwg dvnamv komar takam mam la moorog tong ngolangam dvl swwnum.

⁵Nyi tulungv Jerusalem hoqgv Judiya gvda tvqpw hoqgv hoo Jordon durbu ogumho doonbo gvda mwlw hoqgv mwwg dookub haanum.

⁶Bulv bulug atwg nyicam nyedar darxaq suknum, ho bulam Jon Jordon pobuho baptijum jinum.

⁷Kokw so Jon Parisi ngvla Sadusi nyi tulungam vijaqg mwwg dookub baptijum naatab haanam mam kaapa tvl mwv bulam benum, “Tvbwg nyob tulu, nulam hiyv Pwnbov galoqkv oyu maadab kanam tanam laqm baqnam hoqgv keleqtvk hvl bekin pan?

⁸Nulug nyic nyinam hoqgv mwwkur pakun hvl nulv hognvkam kaacin dvb nyil kaakin tayin.

⁹Nulv akukam mwwmabv ngulv Abraham gv ko hosiv hoqgab ngulv laqm mam baqram hvdwb nyima dvn. Ngo nulam sam bedwn, Pwnbov soq lwwn torab samkam Abraham gv ko hosib mvnyitayin.

¹⁰Vxv sija svvnam patab dvb svvn lwkwhv doodo ho almanbo aaxy xeenbo svvn nwwxiam patab dvb nyitayin, ho wmmwb joolwq tayin.

¹¹Ngo nulam iss lvgab nulug nyic nyinam hoqgv mwwkurl wkur pakun ham kaakin dvb baptijum jidwn, hvbmabde ngoqg kokwb haady bo akv nulam Dvrwqbo Yal lvgab la wm lvgab baptijum jitayin. Mwv ngam koi yaan bov, hoggab ngo mwwg luxuqngam kam bvvya jidwb mwwg simpv hvl bedwb ator dooma.

¹²Mwwg am jurpiam pooxaqnan darlongv mwwg lvgab doodwn, hoq lvgab mwv am vmciram pooxuql poolin tayin ho mwv ammam mwwg noosub bvqlwq tayin, hvbmabde am amsuqngam nywywngam miqmabo wm uraho mwv parxia tayin.”

¹³Kokw so Jisu Galili hoqgv Jon galoqkv baptijum jikdvb Jordon ho mwwg dookho haanum.

¹⁴Hvbmabde Jon mwam bitur dvb benum, mwv benum, “Ngo ya noq galoqkv baptijum naadwb nyidwn, hvb bonam ya apaqtvl no ngoqg dookub haadwn.”

¹⁵Hvbmabde Jisun mwam birwqnum, “Sija gab sam sib nyimto hoggab soq sib nyil ngulv Pwnbog ngulam nyidwb jinam mam nyiky dvb doodwn.” Jon kokw so loorwqnum.

¹⁶Jisun baptijum naaxo twqpel iss hoqgv agab lengda kalam mwwg gab ao gvdangam kuqko jinum hoo mwv Pwnbog Yalam mwwg aoho pwk yobur hvb nyil hopwl huul doonam mam kaapanum.

¹⁷Ao gvda toloqgv agam yal ak benam mam tapanum, “Soq ak si ngoqg tumanam Ko Tuupv, mwam ngoqg hangv xumdwn.”