Read Nyishi METIYU 4 Bible Online

METIYU 4 - Nyishi bible

METIYU 4

¹Kokw so Yalv Jisun nyorob Ui galoqkv sup mvdwb bool wgnum.

²Aal campy ai campigo dvma twwmab dooxo kokw so Jisu kanonum.

³Hoq jaqho Uiyv mwam hang pooka taab mwwg ogumb haabnv benum, “No Pwnbog Ko Tuupv jaqloqkam so wlw torab sam dvnam wtwb nyitwk hvl beka to.”

⁴Hvbmabde Jisu birwqnum, “Dvrwqbo Potangv bedwn, ‘Nyiv dvnam wtw dwtwq tvl swwma dvn, hvbmabde Pwnbog agam hoqgv goolinam agam gomxy aoho swwdwb nyitayin.’”

⁵Hoq kokw so Uiyv mwam Dvrwqbo Nampam Jerusalemho wgnum, Jisun mwlwngam ao yaanbo Israelwg Xumk nam mwwlo niqtuq ao golo doom tvl

⁶mwam benum, “No Pwnbog Ko Tuupv jaqloqkam atv hatib poqpoq kaato, hoggab Dvrwqbo Potangv bedwn, ‘Pwnbov mwwg gumtw tulungam noqg pagoq gab gvmbwql gaml jil kanam tayin; ho nam bulug alaqngv joorab aptayin. Ho noqg lvpiangv wlw aoho hodaq jaqkam vcwr gokam vcram.’”

⁷Jisu birwqnum, “Hvbmabde Dvrwqbo potangv bedwn, ‘Noqg Pwnbo At Swn pooka-yirka dvb nyimadvn.’”

⁸Hoq kokw so Uiyv Jisun puutu vigo ao albo ao golo boocanum, ho mwam gvda gvtwg mwlw jaqg nyet-nyeram mam la lvpwngam kaakin banv benum.

⁹“Soq mwlw sam ngam no lwbw kumbwl xumb nyiloqkam nam jitayin.”

¹⁰Kokw so Jisu birwqnum, “Ui no wleqto! Dvrwqbo potangv bedwn, ‘Noqg Pwnbo At Swn xumto hoo mwam pvqtwqto!’”

¹¹Ho dara Uiyv Jisun apaq peekul wleq kunum, hoo kokw so ao gumtwngv ipoqbanv mwam svkanum.

¹²Kokw so Jonnvn pvtwqho lwqnam puiyam tapa tvl mwv Galilib wleqnum.

¹³Mwv Najaretam apaqpel Galili swnyiq bviywrho doonbo Jebulun la Naptali gvdag Kaparnahum nampam ho dootab wnum.

¹⁴Soq sib nyinam si hvbaloqkam nyiqry kaanbo Aijaya hognvkam otuqho bepwl ap kunum ham jvqtw jaqb niqtuq lengm dvb nyiknum.

¹⁵“Jebulun la Naptali gvdaho doonbo lamta, ho Jordon pobu taqc ho doonbo gvda, Nyob luusaq gvda Galili!

¹⁶Kan uraho doonbo nyi tulungv hutongam kaapa tayin, ho kan uraho sil doonbo nyi tulug aoho hutongv huudaq pakun.”

¹⁷Hoq apo hoqgv Jisu mwwg puiyam berab kunum. Mwv benum, “Nulug nyic nyinam hoqgv mwwkur tuku, hoggab ao lvpwngv ogumb hvvnwq paku.”

¹⁸Jisu Galili sa-svlo bviywrho wdu dvkho vbw-bor vnyi go ngui nootubo nyiv, Pitorvk hvl benam Simon la mwwg bor Andriyonvn swnyiqho wswq hwrl ngui nootul yvnam mam kaapanum.

¹⁹Jisu bulam benam, “Ngoqg kokw kokwb wmin gvto, ngo nulam nyi nootu mvdwb tomswr tayin.

²⁰Bulv ho dara bulug wswqngam apaqpel mwwg kokwb wmin gvnum.

²¹Hoqgv mwv wdul hvraqb doodwkho vbw-bor vnyi gota Jebedig ko tuup Jemsnvn la Jonnvn kaapanum. Bulv hulu ho bulug ab Jebedig lvgab wswqngam mwx-mvaql mvdarl doonum. Jisu bulam goqnum,

²²hoo goqda kalam hulungam hoo bulug abam apaqpel mwwg kokwb wmin gvknum.

²³Jisu Galili gvda tvqpwngam gaqkar banv Sinagog uraho tomswrl ho Lvpw Puiyam bekarl hoo deedib vcbo nyi tulungam mwpnum.

²⁴Mwwg pagoq hoqg puiyv Siriya gvda tvqpwho yuupw kunum, hoqgab mwwg dookub nyi tulungv deedib vcboam, vc luuxy hoqgv vc cidul doonbo nyi tulungam, sony cenam mam, rugaq boam, svmeq boam hoo lviya-laqyabo mwlwngam Jisu bulam mwp jinum.

²⁵Mwwg kokwb nyiv mvqlw jaqg Galili, Dekapoli, Jerusalem, Judiya, hoqgv Jordon taqc gvda hoqgv kam nyiv vigo wbanum.