Read Nyishi METIYU 7 Bible Online

METIYU 7 - Nyishi bible

METIYU 7

¹“Nyi asaqkam pw-hwwmabv, ho Pwnbov nulam kam pw-hwwram.

²Nulv nyi asaqkam hoggub nyil pw-hwwdwn hoq hvbkalam Pwnbov nulam pw-hwwtayin, hoo nulv hognvk bvrwq bicwb bel nyi asaqkam bedwn hoq hvbkalam Pwnbov nulug bicwb nulamkam betayin. Ho hognvkv nulv nyi asaqkam xil jintayin hoqho nulamkam xil jitayin.

³Noqg vnyiqlo svpongam kolol doom tvl no hoggub noqg bor akwg vnyiq pvcam kaadwn?

⁴Hvnyiloqkam no hoggub noqg vnyiqlo svpongam kolol doom tvl noqg boram, ‘Noqg vnyiq ura hoqg pvcam ngo naalin tvs,’ hvl hoggub hampeql benyi tayin?

⁵Kaak-takdvb nyinbo nul! Noqg atwg vnyiq uraho doonbo svpongam otuqcob naalin cooto hoolak kaadar cekarl noqg vnyiqkv kaapa tayin ho noqg borwg vnyiq hoqg pvcam no naalin nyotayin.

⁶“Hognvkv dvrwqdvn ham ikiam jimabv, lokam nam juqkurl cedwn, hoo hunam nulv iriqkam jimabv, hoggab ham bulug lvpiangv cooyul caajab tayin.

⁷“Koto, ho nulv kaapa tayin; meegaqto, nulv meepa tayin; cedinto, hoo nulgab viyap pam kuqko jitayin.

⁸Hoggab hiyv kodwn mwv ham kaapa tayin, ho hiyv nyiv meegaqdvn mwv ham meepa tayin, ho hiyv nyiv viyap pam cedin dvn mwwg gab viyap pam kuqko jitayin.

⁹Nulug pengko lo hiyvg abv mwwg kongv wtw koi kam, mwam wlwngam jinbov doodwn?

¹⁰Ho mwv ngui koi kam, mwam tvb jinbov doodwn?

¹¹Hoggab nulv almasjaqkam, nulug ko tulungam nulv albo akiam jilaq dvnyiloqkam, ao gvda tolo doonbo nulug Abv hog hwdgo ham alyanbo akiam mwam konbo nyi tulungam jiky dvn!

¹²“Hoggab nyitaq mwlwho nyiv nam hognvkam nyiyikam no al mwwpa dvn hoq hvbkalam no bulam kam nyijto; soq si Mojesg Pvvb niqtuqkv hoo nyiqry benbo tulug xeqpwl apnam tomswrnam gonv.

¹³“Viyap haak adeqbob haato, hoggab ui nyookub wk viyapv taqt dvn hoo lamta ngvkam wngam aldvn ho hoq lamtab wnbov mvqlw dvn.

¹⁴Hvbmabde swwg viyapv adeqdvn, yabnyo dvn hoo lamta ngvkam wr aldvn; hoo soq lamta sam meepa bov nyiv jaqt maadwn.

¹⁵“Nulv atam xaalyo bo nyiqry benbo tulu hoqgv hengab suto; aob kaanamv sviya hvb kvviyiq dvn, hvbmabde urangv jvqtw jaqb dvn-twwnbo moorog svca hvb nyidwn.

¹⁶Nulv bulug nyinam mvnam hoqgv kaacin tayin. Taa gvnbo teriv roo aaxy xeema dvn ho taa svvnv taoq aaxy xeema dvn.

¹⁷Albo svvnv albo aaxy xeedwn, hvbmabde svvn almanbov almanbo aaxy xeedwn.

¹⁸Svvn albov almanbo aaxy xeela ram.

¹⁹Hogloq svvnv almab aaxy xeedwn ham patabl wmmwb jool hurlwq gvdwn.

²⁰Hoqgab nulv xaalyo bo nyiqry kaanbo nyi tulungam bulug nyinam-wnam hoqgv kaacin tayin.

²¹“Nyi vxiv ngam ‘At Sw, At Sw’ hvl goqnbov mwlwngv Ao gvdag lvpwngam kaapa nyoram, hvbmabde hogloq nyi tulungv ao gvda tolo doonbo ngoqg Abwg mwwlwqkob mwwg nyim dvb bulam jinam mam nyinbo nyi tulungv aro kaapa tayin.

²²Hwdam pw-hwwd aalv haatayin hoq aalam nyiv vigo ngam betayin, ‘At Sw, At Sw! Noqg emin gab ngulv Pwnbog Tugu Puiyam betkun, noqg eminlo ngulv vigo almanbo yalam ruqxa tukun, ho vigo swrdorxeqb nyimanam nyis tulungam nyitkun!’

²³Ho ngo bulam bid lalal betayin, ‘Ngo nulam nywywngam cengtma. Ngoqg ogum soqgv wleqto, almanbo nyi tulu!’

²⁴“Hoqgab hiyv nyiv ngoqg soq benam sam tatwl bugil swwdwn hoq nyi hv mwwlaq albo nyiv mwwg nammam wlw aoho mvnbo nyi ak hvb nyidwn.

²⁵Kokw so nyodongv hol diidwr issiv tonum, doogum-dooiyv vcjaqb hoq nam aoho hodaqnum. Hvbmabde hoq nam hv tapto maanum, hoggab soq nam sam wlw aoho mwlwqnum.

²⁶“Hvbmabde hiyv nyiv ngoqg soq benam sam tatwl bugil swwma bo nyi ak hv nyiidam bo nyiv mwwg nammam xuqx aoho mvnbo nyi hvb nyidwn.

²⁷Kokw so nyodongv hol diidwr issiv tonum, doogum-dooiyv vcjaqb hoq nam aoho hodaqnum, kokw so hoq nam hv vcjaqb dul tapto nukun!”

²⁸Kokw so Jisu soq mwlw sam bexo kokw so nyi tulungv mwwg tomswrl benam mam tatwl deedyjaqb bedbo hvl lomnum.

²⁹Hoggab mwv bulug Pvvb tomswrbo nyi tulug benam hvb bemab xitor-xilob pwbw jaqb tomswrnum.