Read Nyishi METIYU 8 Bible Online

METIYU 8 - Nyishi bible

METIYU 8

¹Kokw so Jisu puutu ao hoqgv ipoq kunum, ho mwwg kokwb nyi acam camt algo wmin gvnum.

²Ho Kaato, tviyiq nyinbo nyi ak mwwg ogum haabnv mwwg agaho lwbw kumbwl xuml benum, “At Sw, no ngam mwp dvb mwwb nyiloqkam no ngam mwp nyotayin.”

³Jisu alaqkv irab banv mwam idaq banv benum, “Ngo mwp dvb mwwdwn. Dvrwq tuku!” Ho twqda hoq nyi akv mwwg tviyiq vc hoqgv al kunum.

⁴Kokw so Jisu mwam benum, “Tagabto! Sam hiyv nvkam bekin maab, hvbmabde ws wdal nyub dookub wgdvl mwam no hindib kvvdy kota; hoq kokwb noqg al kunam mam nyi mwlwngam kaakin dvb Mojesg gaml jikjaqb Pwnboam pwr jita.”

⁵Kokw so Jisu Kaparnahum nampam urab haaikam Roman sipai saab ak mwam kaapa tvl xuml svka konum.

⁶At Sw, ngoqg nyera akv vcil nam alo doodwn, giqkub-geqxeq nyokmab sisv twqb vcil dood deen.”

⁷Jisu mwam birwqnum, “Ngo wgdvl mwam aldvb mwptayin.”

⁸Saab akv birwqnum, “At Sw, hvbma. Ngoqg nam uraho ngo nam svgagvrwq dvb nyinbo nyi yooma. No gaml jitwq bolo ngoqg nyerangv al sutayin.

⁹Ngo kam ngam koi yaanbo saab tulug uraho bon nyidwn, hoo ngoqg alaqlo sipai tulu go doodwn. Ngo bulug akgon ‘Wto!’ hvl gaml jiyikam mwv wdwn; hoo akgon ‘Haato!’ hvl gaml jiyikam mwv haadwn hoo ngoqg nyera gon, ‘Soq sam nyito!’ hvikam mwv ham nyidwn.”

¹⁰Soq benam sam tatwl Jisu mwv lomnum, ho mwwg kokwb wmin gvnbo nyi tulungam benum, “Ngo jvqtw jaqb nulam bedwn, ngo Israel nyi tulug pengko hoqgv kam soq sib mwwjwbo nyi nywywngam kaapa ma.

¹¹Ngo nulam bitwjaqb bedwn, vigo dou-caga hoqgv la haaga hoqgv haalayil Abraham, Aisak ho Jakub lvgab doal ao gvdag lvpw durum ho dvbatayin.

¹²Hvbmabde Lvpwg ko tulungam kan urab hurlwq tayin ho kan uraho xabtayin hoo bulug exiv dvxeql dootayin.”

¹³Kokw so Jisu sipai saab akam benum, “Nammwb wnku, no hognvkam mwwjwdvn ham noqg gab nyidwb nyitayin.” Hoo hoq saab ak hoqg nyerangv hoq bed mood jaqho al kunum.

¹⁴Jisu Pitorg nammwb wnum, ho namho Pitorg ai akam dooily vc kordul doonam mam kaapanum.

¹⁵Mwv nyem akwg alaqngam gvbwl gaqdaq kalam dooiyv mwnwn apaq kunum, kokw so mwn gorab kunv Jisun ocum paqlaqlwl nyiknum.

¹⁶Kokw so ariyum nyi tulungv Jisug dookub vigo vcboam, bulug pengko lo tuugin sony cenamv doonum. Jisu hog mwlw ig-oram mam agam gamg bitwq kalam lengknum hoo vcbo mwlwngam bulam mwp jiknum.

¹⁷Mwv soq nyinam si hvbnyiloqkam nyiqry kaanbo Aijaya hoqgv benum ham niqtuq lengm dvb. “Mwv at jaqkv ngulug vcam ho ngulug laanyi maanam mam baqg nukun.”

¹⁸Kokw so Jisu mwam nyi tulungv taqg-loosaqb hwwiyum nammam kaatwl, mwv mwwg buu tulungam swnyiq kvtin gonwb rabtwk hvl benum.

¹⁹Pvvb tomswrbo nyi ak mwwg dookub haanv mwv benum, “Tomswrbo, hogloq xeqb no wtayin ngo noqg kokwb wmin gvtayin.”

²⁰Jisu mwam birwqnum, “Siyal gv ungngv pvta gv osupv doodwn, hvbmabde Nyia Ko Tuupwg dumpo tvpko gokam dooma dvn.”

²¹Buu swwnbo nyi akwnv benum, “At Sw, ngam otuqb ngoqg abwg svmangam wkurl liico mvdwb jitwb.”

²²Jisu birwqnum, Ngoqg kokwb kokwb wmin gvto sikbo tulungam bulam atv atv sinbo tulungam svma liimto.”

²³Kokw so Jisu swp uraho cao yukam mwwg buu tulungv mwwg lvgab wbanum.

²⁴Ho cema lvpab swnyiq aoho doogum dooi ak vc-jaqb yvnum hoo swpv iss urab jvvlwq tasv vcwrgo doonum. Hvbmabde Jisu yubngaql doonum.

²⁵Buu tulungv mwwg ogum haabnv mwam muunum, benum “At Sw, ngulam ywwtbv, ngulv sita duku.”

²⁶“Nulv hvkam bvxeq boswl lomdwn? Nulug mwwjwngv hwiyw gotwq i doodwn?” Kokw so mwv gorab kunv dooiyam la swnyiqngam yolu ruqxy kalam, hoo hoqho nyum-nyum jaqb dooknum.

²⁷Nyi tulu mwlwngv swrjaqb mwwnv, benum, “Soq nyi aksi hognvk nyiv yu? Mwwg benam mam dooiyvkam ho swnyiq ngvkam tadwn.”

²⁸Kokw so Jisu swnyiq kvtin gonwb Gadara gvdab haadwk ho nyubu butaq hoqgv nyi vnyi go leng layil mwam wrwqnum. Soq nyi tulu si bulug uraho sonyiv doonum ho mwlwngv bos soma vrram bulam bosnum; hoqgab hoq lamtab hiyvkam wdwb hampeq maanum.

²⁹Ho sogoq kiirl sogoql benum, “Pwnbog Ko Tuup, no ngulam hoggub nyitwk hvl? No ngulam moodv haama daab laqm-baqmtab haaiyin i?”

³⁰Hoq ditaq hoqgv aado yooma golo iriq pvtw twwt algo dvkar yvnum,

³¹Hoqgab sony cetwl rugaqbo nyi tulungv Jisun xuml benum, “No ngulam ruqpaq baloqkam aloq iriq riqtwg urab haam dvb jitwbv.”

³²Jisu bulam benum, “Wn,” hoqgv lengknv hoq iriq tulug urab haanum. Ho hoq iriq riqcam cvmpwngv bwdw yornwb xaabo kunv swnyiq uraho yoqlwl siknum.

³³Iriqngam rvkybo nyi tulungv kelayil nampam wknv sony cenam nyi vnyiv hoggub nyiknum hoq mwlwngam nyi tulungam bekinnum.

³⁴Kokw so nampam hoqg nyi tulu mwlwngv Jisun kaatab nampam agab lengnum. Kokw so mwam kaapa tvl xumbnv bulug gvdangam apaqpel wnkuk hvl benum.