Read Nyishi METIYU 9 Bible Online

METIYU 9 - Nyishi bible

METIYU 9

¹Kokw so Jisu swp urab cao kunv swnyiq kvtin gonwb robkur kunv mwwg atwg nampam hookur kunum.

²Ho kaanamv nyi tulungv kartaqnan golo lviya laqyabo nyi ak mwwg dookub joa jinum, Kokw so Jisu bulug mwwjwnam mam kaatwl, lviya laqyabo nyi akam benum, “Ngoqg ko no bos maabv! Noqg nyic mwlwngam apaq jipa kun.”

³Ho Pvvb tomswrbo nyi tulungv atv bemin sunyianv benum, “Soq nyi ak si Pwnboam bepaq taiyaq bo go!”

⁴Bulv hognvkam mwwdul doonum ham Jisu kaapa tvl benum, “Nulv hoggab hoqhvk almanbo bvrwqkam hang uraho mwwdwn?

⁵Noqg nyicam apaq jipa kun hvl benamv bengam yaadwn, hvbmab gorab wto hvnamv bengam yaadwn?

⁶Ngo nulam bekin dvn, Nyia Ko Tuupv gvda gvt so nyicam apaq jidwb atorv doodwn. “Hoqgab mwv lviya laqyabo nyi akam benum, “Gorab tuku, ho noqg kartaqngam naarab bvl nammwb wnku.”

⁷Nyi akv gorab kunv mwwg nammwb wknum.

⁸Soq sam nyi tulungv kaatwl bos sonum, ho nyi tulungam soq svk atoram jigam gab Pwnboam paqnyanum.

⁹Jisu hoq nyookam apaqpel wdul doonum, Ho mwv gvda nyoogangam konbo Metiyu hvl eminam nyi ak mwwg gvda nyooga kokumko namho doonam mam kaapanum. Jisu mwam benum, “Ngoqg kokwb wmin gvto.” Metiyu gorab banv mwwg kokwb wmin gvnum,

¹⁰Kokw so Jisu Metiyug nam uraho dvnam dudul doodwkho gvda nyooga kokar bov hoo nwd xipa maanam asaq nyi tulungv vigo Jisug la mwwg buu tulug lvgab dool dvnam dvbanum.

¹¹Soq sam Parisi tulungv kaapa tvl mwwg buu tulungam toxnum, “Hoggab nulam tomswrbo akv gvdag nyooga konbo hoo nwd topa maanam nyi tulug lvgab dvba dvn?”

¹²Jisu bulug benam mam tapa tvl birwqnum, “Vc maanbo gab nyub goqdwb nyimadvn, hvbmabde vcbo nyi tulu gab sulak nyubv doodwn.

¹³Dvrwqbo Potangv hog hvl bedwn hoqg niqtuqngam wgdvl meelin ta. ‘Ngo ayanam mam sulak meegaqdvn, sibin sviya pwr jinam mam ngo meegaq ma. ‘Ngo xinam nyiidarbo nyi tulungam goqtab haama, hvbmabde nwd xipa maanam nyi tulungam goqtab haaiyin.”

¹⁴Jon Baptist buu tulungv Jisug dookub haabnv toxnum, “Hoggab ngulv la Parisi tulungv dvmab vrr dvn, hvbmabde noqg buu tulungv vcwr gokam vrr maado?”

¹⁵Jisu bulam birwqnum, “Nyem naanbo nyegag lvgab mwwg ajin tulungv doody deedib nyem naanbov nyiin dvparam muurul doomnamv aldvn? Hvbmabde bulug pengko hoqgam nyega akam bool wleqdvk aalv haatayin, hoq kokwngam dvmab vrr tayin.

¹⁶“Hiyvkam kucuqbo kamt paceqbo aoho nitbo vjam hamtaq dvn, hoggab nitbo vj hamtaqnamv xwwkum baloqkam kamt hoqg ungngv otuqgam ut yaatayin.

¹⁷Hvbmab hiyvkam nitbo roo alangam kucuqbo vpin yooxaqlo toolwq maadwn, hvb mvbaloqkam vpin yooxaqngv buqctayin ho alangv toopaq tayin ho yooxaqngvkam dubtayin. Hvbmab nit vpin yooxaqlo nitbo roo alangam toolwq dvb nyidwn, homolo vnyi-vnyiv alwb dootayin.”

¹⁸Jisu soq sam bidu dvkho Juhudi saab ak mwwg dookub haabnv lvpia kumbwl xuml benum, “Ngoqg nyem kov sijada sipa ku, hvbmabde no wl mwnwg aoho alaq idaq baloqkam mwn turab taikun.”

¹⁹Hoqgab Jisu gorab kunv mwwg buu tulungv la mwv hoq nyi kokw kokwb wnum.

²⁰Kokw so vnyw nywyw leq nywnyi go vrr ui sarl doodubo dvn ak Jisu kokwb rumin gvbnv mwwg vj laqyap niqtuqkam gvbwnum.

²¹Nyem dvn akv mwn atam atv besnum, “Ngo mwwg vjam igab twqb nyiloqkam ngoqg vcv al taikun.”

²²Jisu nywwkur kaanv nyem dvn akam kaapa tvl mwam benum, “Ngoqg nyem ko, haakam to, bos maabv! Noqg mwwjwngv nam al dukub mvpa ku.” Hoq bed mood jaq hoqgv hoq nyem dvn akv al kunum.

²³Kokw so Jisu hoq saab nammwb haanum. Nyi tulungv svma liid kub dumdum-taal dwwl, piul tabl ho xabl-riil doonam mam kaapa tvl

²⁴mwv benum, “Mwlwngv wleqto! Nyem ko ak si sima sulak-mwn yubl doodo!” Ham tatwl nyi tulungv mwam nyirj-nyiryanum.

²⁵Kokw so nyi tulungam cwrw hoqgam roolin tvl Jisu hoq nyem ko dook cwrw urab haanv nyem ko alaqngam gvbw kalam nyem ko akv turab kunum.

²⁶Soq pagoq soq puiyv hoq gvda tvqpwho naleqb yuuknum.

²⁷Hoq ditaq hoqgv Jisu wdul doodwkho nyiqca bo nyi vnyi go mwwg kokw-kokwb wmin gvbnv benum, “Debidg Ko Tuup! Ngulam aya mwwpa tvb!” hvl sogoql benum.

²⁸Kokw so Jisu nam urab haanum, ho hoq nyiqca bo nyi vnyiv mwwg dook urab haanum, hoo mwv bulam toxnum, “Ngo nulam mwp tai nvbo hvl nulv mwwjwdvn i?” Bulv birwqnum, “Vv, tomswrbo!”

²⁹Kokw so Jisu bulug vnyiqngam alaqngv idaql benum, “Soq sam nulv mwwjwnam hvb nyimto!”

³⁰Kokw so bulug vnyiqkv kaapa kunum. Jisu bulam vc-jaqb yvtw pal benum, “Soq sam nulv hiyv nvkam bekin maab!”

³¹Hvbmabde lengda layil Jisug puiyam gvda mwlwho bepor tukul puiyv durabnum.

³²Hoq nyi tulungv agab lengda kalam nyi acamgo sony cenam nyi ak Jisug dookub joanum, mwv goolaq kumanum, hoggab mwwg uraho oramv doonum.

³³Hvbmabde kokw so sony uiyam ruqpaq kalam nyi akv agam goorab kunum, ham kaatwl nyi tulungv deedy jaq gokbo mwwnyianum, ho Israel nyi tulug pengko lokam soq sib nyinam go kaaka tukma hvl benyanum.

³⁴Hvbmabde Parisi tulungv benum, “Mwam sony tulug lvpw atv ruqpaq mvdwb jipan.”

³⁵Jisu pamda dvvxib la nampam pvmxib gaqkarnum. Mwv Sinagog uraho tomswrnum, ho deedy luuxib vcbo nyi tulungam mwpnum.

³⁶Mwv nyi acammam kaatwl mwwg hangv biinv bul gab aya mwwpanum, hoggab rvkybo doomabo sviya pvtw hvb anya twqb nyinum.

³⁷Hoqgab mwv mwwg buu tulungam benum, “Vly naasv vi supa, hvbmabde noosu baqadvb bon nyinbov anyo pa.

³⁸Hoqgab vly atam mwwg dvnam noocum bo nyi lo vigo kanam mvdwb mwam xumto.”