Read Nyishi MARK 1 Bible Online

MARK 1 - Nyishi bible

MARK 1

¹Soq si Pwnbog Ko Tuup Jisu Kristog Tugu Pui.

²Soq si nyiqry Kaanbo Aijaya xeqpwl apnam mam nyirabnum: “Pwnbov benum, ‘Ngo noqg wma daab otuqb wcol noqg wk lamtangam mvdwb, ngoqg gumtwngam kanam tayin,

³Diixa-rara hoqgv nyi ak sogoql betayin, hoq benam si, At Swg lamtangam mwx-mvaqto; mwam wwm dvb mwwg lamtangam mvdin yaato!

⁴Hoqgab Jon deexa-rara hoqgv lengb nv nyic nyinam hoqgv mwwkur tukuk ho nyic nyinam mam nyedar dukub baptijum naato hoo Pwnbov nyic nyinam mam apaq jitayin.

⁵Judiya hoqgv Jerusalem bopamb Jonwg benam mam tatab wnum. Bulv bulug nyicam belin kunum hoo Jon bulam Jordon pobuho baptijum jinum.

⁶Jon svjin vm hoqgv cumnam vj koonum hoo vpin soruq gvtwl mwv komar takam mam dvl mooro hoqg tong ngolangam twwl swwnum.

⁷Mwv nyi tulungam betamnum, “Ngoqg kokwb haady bo nyi ak hv ngam koi yaan bov, ngo mwwg lvpia lwkwho doal luxuqngam kam poqsuql pilin jidwb ngo mwwg simp maadwn.

⁸Ngo nulam iss lvgab baptijum jidwn, hvbmabde mwv Dvrwqbo Yal lvgab nulam baptijum jitayin?

⁹Hoq moodho Jisu Galilig Najaret hoqgv haanum ho Jon galoqkv baptijum Jordon pobuho naanum.

¹⁰Jisu iss hoqgv lengda kalam twqda, ao gvdangam kuqkonam hoo Yalv mwam ipoql mwwg aoho pwk yobur hvb jarpwl doonam mam kaapanum.

¹¹Ho ao gvda toloqgv agam ak benam mam tapanum, “No ngoqg tumanam Ko Tuupv. Ngo noqg aoho hangv xumt dvn.”

¹²Hoq kokw daab Yalv mwam deexa-rarab bool wgnum,

¹³Hoo mwv aal campigo doonum, Uiyv atorjaqb pookanum. Hoq mooro ho sudum-svrv kam lvgab doonum, hvbmabde ao gumtwngv mwam ipoq banv svkanum.

¹⁴Jonnvn pvtwq lwqxo so Jisu Galili gvdab wbnv Pwnbog Tugu puiyam bekar yvnum.

¹⁵Mwv benum, “Mood jaqkv haapa ku, Pwnbog Lvpw-hativ hvvnwq paku. Nulug nyic hoggv mwwkur tuku hoo Pwnbog Tugu puiyam mwwjwto!?

¹⁶Jisu Galili swnyiq bviywrho wl yvdu dvkho ngui mengbo nyi vnyi go, Simon la Andriyonvn wswq hwrl ngui naal yvdwb kaapanum.

¹⁷Jisu bulam benum, “Ngoqg lvgab wmin gvto ngo nulam nyiam wswq hurtu mvdwb tomswr tayin.?

¹⁸Ho bulv bic-belin maadab wswqngam apaqpel mwwg kokwb wmin gvnum.

¹⁹Ho mwv aado gokam wma daab vbw-bor vnyi go, Jebedig ko tuup Jemsnvn la Jonnvn kaapanum. Bulv wswq ngam mvdar banv uraho doodunum.

²⁰Bulam kaapa daqtwl Jisu bulam goqnum. Bulug abam la nyijobo nyi tulungam swp urahv mwlwngam apaqpel Jisug kokwb wmin gvnum.

²¹Kokw so Jisu la mwwg buu tulungv Kaparnahum dwrbub haaknum, hoq haanbo aalv Doonunam aalv mwv Sinagogwb wbnv tomswrnum.

²²Nyi tulungv mwwg tomswrl benam mam tatwl lomnum, hoggab mwv Pvvb tomswrbo nyi tulug tomswrnam hvb bemanum, hvbmab oksubjaqb bos dvb benum.

²³Hoq ditaqho sony cenam nyi ak Sinagog nam urab haanum hoo sogoq kiir nool benum.

²⁴“Najaretwg Jisu, noqg lvgab ngulug hognvk nyisv? No ngulam mvcaq-mviyaq taab doodwn i? No hiyv ham ngo cengdwn, no Pwnbog dvrwqbo puiyam baqnbov!”

²⁵Jisu hoq yalam gaml jil benum, “Cooikab dooto hoo hoq nyi ura hoqgv lengtku!”

²⁶Ho hoq almanbo yalv hoq nyi akam vc alwb hwqdinum hoo sogoq kiir nool mwwg ura hoqgv lengknum.

²⁷Ho nyi mwlwngv lomnum ho deedy jaqgo i, “Soq si hoggv i? Soq si nit gon mas i? Soq nyi ak si almanbo yalam kam lengt kuk hvl gaml jidwb ator doogdo hoo bulv mwam tado!?

²⁸Hoqjaq hoqgv Jisug puiyv Galili gvda mwlwho nyebia jaqb yuupwnum.

²⁹Kokw so Jisu la mwwg buu tulungv ho Jems la Jon bulv Sinagog ura hoqgv lenglayil Simong la Andriyog nammwb ws wdal wnum.

³⁰Simong ai akv aram karl mear dooily vcil doonum. Jisu hoqho hvvc daqkalam mwam hoq vcnam puiyam bekinnum.

³¹Jisu mwnwg dookub haabnv alaqngam gvbwl mwnwn purabnum, hoo mwnwg vcv al kunum ho mwn bulam dwj-mwjnum.

³²Doonyiv haaxo kokw so Ariyum nyi tulungv Jisug dookub vcbo nyi mwlwngam hoo sony cvnam nyi tulungam mwwg dookub boanum.

³³Nampam hoqg nyi tulungv mwlwngv nam haagaho pumkum doonum.

³⁴Jisu deedy luuxib vcboam vigo mwpnum hoo sony cenam ui-oram kaanam mam vigo ruqpaqnum. Mwv oram tulungam gombeql goodwb jimanum, hoggab mwv hiyv ham bulv cengnum.

³⁵Ar rogwn ar komc, huto maadab, Jisu gorab banv nam hoqgv leng layil bopam agab lengl nyi cumciq nyookho wbnv xumnum.

³⁶Hvbmabde Simon la mwwg ajin tulungv mwam meekar taab wnum.

³⁷Kokw so bulv mwam meepa tvl benum, “Nyi vxiv nam meekardo.”

³⁸Hvbmabde Jisu bulam birwqnum, “Ngulv soq diis-paap so doonbo nampam pamsaqb wdwb nyipa, ngo hoq nampam tuluho kam pui bedwb nyidwn, hoggab ngo hoqham nyitab haaiyin.”

³⁹Kokw so bulv Galili gvdangam gvqyiq-gaqxeq kunv Sinagog nam uraho pui bekarl sony-oram mam ruqpaql yvnum.

⁴⁰Tviyiq-nyinbo nyi ak Jisug dookub haabnv mwwg agaho al kumbwl xuml mvnyi-moiyul svka konum. Mwv benum, “No mwwd nyiloqkam no ngam dvrwq dvb mwp sutayin.

⁴¹Jisu aya mwwpa kunv mwwg alaqngv irab banv mwam idaqtvl birwqnum, “Ngo mwwdwn, dvrwqto!”

⁴²Benya maadwb hoq nyi hoqg tviyiq vcv niiknum hoo dvrwq kunum.

⁴³Ho Jisu vcjaqb benv mwam nyebia jaqb wwm kunum.

⁴⁴Kokw so Jisu hoq nyi ak ham vcjaqb yvtw pal gaml jil benum, “Soq pagoq sam hiyv nvkam bekin maabwk hvl benum. Hvbmabde nyub dookub ws wdal wgdvl mwam kvvdy kota hoo nyi mwlwngam noqg dvrwq kunam mam kaakin dvb Mojesg bepwl apnam gamlwb Pwnboam guuta.

⁴⁵Hvbmabde hoq nyi ak hv wlayil gvda mwlwho puiyam dukar yvnum. Hoggab kokw so mwv hvbjaq dukar yvgam gab Jisu nampam ak golo mwlwngv cengdwb urab haadwb nyimanum. Hvbmabde mwv nyi cumciq nyook kvdaqlo kvsil yvdwb nyinum hoo taqg-loosaqg nyi tulungv mwwg dookub haanum.