Read Nyishi MARK 10 Bible Online

MARK 10 - Nyishi bible

MARK 10

¹Kokw so Jisu hoq nyookam apaqpel wknv Jordon pobu kvtinho doonbo Judiya gvdab rabknum. Ho nyi tulungv mwwg ogumb hookumnum kokw so mwv otuq nyinam hvbkalam nyi tulungam tomswrnum.

²Parisi tulu go mwwg dookub haabnv mwam pooka banv toxnum, “Ngulam betam tvb, ngulug Pvvbv nyegangv mwwg atwg nywxwngam tumin sudub gamlv doodwn i?”

³Jisu bulam tuukubnv toxnum, “Mojes nulam hognvk pvvbv jinum?”

⁴Bulv birwqnum, “Nyegangv nywxwngam apaq kunam potangam xeql jitwl mwwg nywxwngam tumin sudkub Mojes ngulam gaml jinum.”

⁵Jisu bulam benum, “Nulug hangv tomswr lamab vdw ko-gab Mojes nulam soq pvvb sam nulgab xeqnum.

⁶Hvbmabde kol otuqho bvl pwrab dvk moodho, Pwnbov nyiam nyega gola nyem go pwnum, hvl dvrwqbo potangv bedwn.

⁷Soqg pagoq gablak nyiv mwwg atwg ab annam apaqtayin ho mwwg nywxw lvgab hang pwkin gob nyil swwtayin,

⁸hoo bunyiv vnyiv akin gob nyidkun. Hoggab bulv sija vnyi gob nyikma hvbmabde akin gob nyidkun.

⁹Hoqgab Pwnbov hognvkam akin gob mvpa kun ham nyiv vnyi gob mvpin nyoram.”

¹⁰Kokw so bulv nam urab hookur dukho, buu tulungv Jisun soq pagoq sam toxnum,

¹¹Bulam mwv benum, “Hiyvg nyiv mwwg atwg nywxwngam tumin supel nyem asaq ak naab nyiloqkam mwv mwwg nywxwngam bwwxinbob nyidwn.

¹²Soq sib kalam hiyvg nyemv atwg nyolam tumin supel asaq nyega ak naadwn mwn mwnwg nyolam bwwxin bob nyidwn.”

¹³Kokw so nyi tulungv ko tulungam mwwg dookub boal mwam ko tulug aoho alaq idaq mvdwb haagnum, hvbmabde buu tulungv nyi tulungam yolu ruqnum.

¹⁴Kokw so Jisu ham kaapa tvl hang lengb nv mwwg buu tulungam benum, “Ko tulungam ngoqg ogumb haamto, bulam bitur maabv, hoggab Pwnbog Lvpwngv soq tulu sib nyinbo tulu gab doodwn.

¹⁵Ngo nulam jvqtw jaqb bedwn, hiyv nyiv soq tulu sib nyil ko anyoko hvb nyima baloqkam Pwnbog Lvpwngam kaapa nyoram.”

¹⁶Kokw so mwv ko tulungam mwwg haabo aoho jootwl ko vxig aoho alaq idaql bulam lvqcnum.

¹⁷Kokw so Jisu wdkub lamta ho lingdu dukho nyi ak mwwg dookub xara banv lwbw kumbwl xuml mwam toxnum, “Alboam Tomswrbo, ngo nwrba cwtam swwgam kaapa dvb hognvk jaqkam nyidub nyitayin?”

¹⁸“No hoggab ngam albo hvl goqdwn?” hvl Jisu hoq nyi akam birwqnum. “Pwnbog aoho hiyvkam albo dooma dvn.

¹⁹No gamlam cengl doodo, “Nyi mengmabv, atwg nywxw-nyolam nyixin maabv, dvco comabv, hiyv nvkam bibum biyiq maabv, vm mvmabv, noqg ab annam tal bugil swwto.’”

²⁰Nyi akv birwqnum, “Tomswrbo, ngo yaapa hoqgv soq mwlw gaml sam bugil swwca pakun.”

²¹Jisu mwam kaagabl abil benum, “Noqg nyis akin go doopa, wnku hoo noqg gumnam mwlwngam puqg dvl jwwgwbo nyi tulungam twngkam jita ho no noqg gab ao gvda tolo gumnam door tukum tayin, hoqgv no ngoqg dookub haato hoo ngoqg kokwb wmin gvto.”

²²Nyi akv soq benam sam tatwl mwwg nyuqmv kaaya poogub nyinum hoo mwv mur alwl wleqnum, hoggab mwv nyet albo nyiib nyinum.

²³Jisu mwwg buu tulungam kaakar-taarl kaanv bulam benum, “Nyet nyi tulungv Pwnbog Lvpwlo hoggub nyilakam haanyiram!”

²⁴Buu tulungv mwwg agam benam tulungam tatwl loma vrram lomnyanum, hvbmabde Jisu hvraqb hoq aoho bel wnum, “Ngoqg ko tulu, Pwnbog Lvpw lo haangam alwb haala maadwn.

²⁵Nyet nyiv Pwnbog Lvpw lo haanamv vj hamn nan peqs ukob svjinv ngwcoql wnamv wngam alyatayin.”

²⁶Sam tatwl buu tulungv swrjaq gob mwwnum, hoo bulv mwam toxnum, “Hvb nyiloqkam hiyv ywwt ywwnam mam kaapa nyotayin?”

²⁷Jisu bulam kaagabl benum, “Soq si nyia ko gab nyila maanamv, hvbmabde Pwnbog gab nyipw maanamv, hoggab Pwnbog gabnyiloqkam hog luuxiv nyipw maanamv.”

²⁸Ho Pitor berabnum, “Kaato, ngulv hog mwlwngam apaqpel noqg kokw kokwb wmin gvdkun.”

²⁹Jisu bulam benum, “Ngo nulam jvqtw jaqb bedwn, hiyv atwg nammam, vbw-bor tulungam, any-bwrm mam, ab annam, ko tulungam, rongo tulungam ngoqg tugu pui gab apaqdvn,

³⁰mwv sija kam swwca so ham koi yaab kaapa tayin. Mwv ham hilayab lwwgwb vbw-borv, any-bwrmv, annv, kov, hoo rongongv hoo mvnyi-mviyanam mam kaapa tayin, hoo haata bo moodho mwv nwrba cwtam swwgam kaapa tayin.

³¹Hvbmabde sijag otuqb doonbo tulungv vigo kokwb dootayin, hoo sijag kokwb doonbo tulungv otuqb vigo dootayin.”

³²Kokw so Jisu la mwwg buu tulungv lamta ho Jerusalemb idul doonum. Jisu bulug otuqb wnum, ho bulv deedy gokbo mwwnum, ho mwwg kokwb wmin gvnbo nyi tulungv bosnum. Ho lokta mwwg buu wyw leq vnyiam oksub goqxuq banv mwwg gab oyu maadab hognvkv xeq nyitayin ham bulam mwv bekinnum.

³³Mwv bulam benum, “Tato, ngulv Jerusalemb coodudvn, ho Jerusalem tol Nyia Ko Tuupam nyub buda tulug alaqho, hoo Pvvb tomswrbo nyi tulug alaqho jilwq dvb nyitayin. Bulv mwam sim dukub betayin, ho hoq kokwb mwam Nyoodo nyi tulug alaqho jilwqtayin.

³⁴Ho bulv mwam nyirj-nyipar tayin, mwam tacorv curxab tayin, sooxw lvgab xipwql mvtayin, ho mwam meng tayin, hvbmabde aal loum kokwngam mwv swwgwb turkur tayin.”

³⁵Kokw so Jebedig ko tuup Jems la Jon Jisug dookub haanum. Bulv benum, “Tomswr bov, ngulv nam hog ak ngul gab nyit bvk hvl binw do.”

³⁶Jisu bulam “Hognvk go?” hvl toxnum.

³⁷Bulv birwqnum, “Noqg yuunam lvpwho no dooi kukam, ngunyi ngunyiam akwn noqg lvqbwq taqc ho hoo akwn laqc taqc ho doom dvb jitwb.”

³⁸Jisu bulam benum, “Nulv hognvkam kodwn ham nulv cengma. Nulv ngoqg hentwr henl twwn nan pvtaqho twwkin dvn i? Nulv ngoqg baptijum naakjaqb naakin dvn i?”

³⁹Bulv birwqnum, “Vv ngulv nyinyi tayin.” Jisu bulam benum, “Nulv jvqtw jaqb ngoqg twwn nan pvtaqho twwn tayin hoo ngoqg baptijum naakjaqb nulv baptijum naatayin.

⁴⁰Hvbmabde ngo hiyvn ngoqg lvqbwq taqcib hoo laqc taqcib doom tayin ham ngo xuqnyi ram. Soq sam nyidy bov Pwnbov, mwv hiyv gab hoq tulu sam mwx-mvaql ap pan mwv ham bulam jitayin.”

⁴¹Kokw so buu wyw gonv sam tapa tvl bulv Jems la Jon bunyiam vigo hang lingtwrnum.

⁴²Hoqgab Jisu bul mwlwngam mwwg ogumb olumgob goqa banv benum, “Nulv cengdwn Nyoodo lvpwg nyiilo akv bulug aoho nyid bedwb ator doodwn hoo bulam gaml jidwb ator doodwn.

⁴³Hvbsujaqkam soq sib nulug pengko ho nyidub nyima dvn. Nulug pengko lo hiyv akgon koiyib swwdwb mwwdwn, mwv nyi asaqg nyerab swwdwb nyiky tayin;

⁴⁴hoo hiyv nyiv otuqb doodwb mwwdwn, mwv mwlwg nyerab swwdwb nyitayin.

⁴⁵Hoqgab Nyia Ko Tuupv kam xumk taab haamanum hvbmab mwv nyi tulungam xumtab hoo mwwg swwgam nyi mwlwngam ywwt ywwkho jitab haanum.”

⁴⁶Kokw so bulv Jeriko nampamho wc kunum, hoo Jeriko nampam mam apaqpel mwwg buu tulungv la nyi acamgo wdu dukho, Timayasg ko tuup Bartimiyus nyiqca tvl kokarbo akv lamta wga bviywrho dootwl kodul doonum.

⁴⁷Mwv Najaretwg Jisu haadwk hvl tapa tvl sogoq goql benum, “Debidg ko tuup, Jisu! Ngam aya mwwpa tvbv!”

⁴⁸Nyi tulungv mwam vigo yolu benum hoo cooikab dootwk hvl benum. Hvbmabde ham taiya yaiya tukul ham laabo yaab vcib sogoq goql benum, “Debidg ko tuup, ngam aya mwwpa tvbv!”

⁴⁹Jisu wngo tvl doqnu banv benum, “Mwam goqto,” Kokw so bulv hoq nyiqca bo nyi akam goqanum. Bulv benum, “Bos maabv, gorab tuku, mwv nam goqdo.”

⁵⁰Ho mwv vjam hurpaqpel, juqrab banv Jisug dookub haanum.

⁵¹Jisu mwam toxnum, “Noqg gab ngam hognvkam nyit bvk hvl bedwn?” Nyiqca bo nyi akv birwqnum, “Tomswrbo, ngo kaapa nwwdku.”

⁵²Jisu mwam benum, “Wnku, noqg mwwjwngv nam al dukub mvpa ku.” Bic-belin maadab mwwg vnyiqkv kaapa kunum hoo lamta ho Jisug kokw kokwb wmin gvnum.