Read Nyishi MARK 11 Bible Online

MARK 11 - Nyishi bible

MARK 11

¹Bulv Jerusalem wnwq kunum, ho kokw so bulv Olib yorn doonbo Betpagiv la Betani nampam mam wc kunum. Jisu buu vnyi gon kanam namcol

²sam bilwqnum, “Nulug wga alo doonbo nampamb wcon. Nulv alo wc kalam svdam ko dorg nywywngam nyi caol wka maanam ak rwwtul apnam mam kaapa tayin. Ham poqsul soqb boata.

³Hoo hiyv akgon hoggub poqsuq gvdwn hvl tox baloqkam, mwam bekinta, Nyiit at sam hog nyinsv ak doopa hoo kokwngam sam nyiory jaqb kanaml jikur tayin.”

⁴Kokw so bulv wbnv lamta wga ho nam viyap haagag deelaho svdam ko ak rwwtul apnam mam kaapanum. Bulv rwwtul apnam svdam mam poqsuqnam mam

⁵ogumho daqnbo nyi tulungv bulam svdam koam hoggab poqsuq gvdwn hvl toxnum.

⁶Bulv Jisug benam hvbkalam bulam birwqnum hoo nyi tulungv bulam bool wg mvdwb jinum.

⁷Bulv svdam koam Jisug dookub boa jinum, Bulv svdam aoho bulug vjam puup jitwl Jisun hoq aoho doomnum.

⁸Nyi tulungv bulug vjam lamtaho puup jinum, hoo tuugin svvn haqbam palayil swwmwngam lamtaho puup jinum.

⁹Otuq bvla kokwb wnbo nyi tulungv sogoq goqrab nyanum, “Pwnboam paqto! Hiyv At Swg emin gab haadwn mwam Pwnbov aya tvka!

¹⁰Pwnbov haata bo ngulug lvpw at ab Debidg lvpwngam aya tvka! Pwnbog eminam paqto!”

¹¹Jisu Jerusalem urab haabnv Xumk nam urab haal hog mwlwngam kvvyiq-taxeql kaanum. Hvbmabde doonyiv dwwd kunum, hoqgab mwv agab lengknv buu wyw leq vnyiam bool Betani nampamb wknum.

¹²Aal loogwn so bulv Betani nampam hoqgv wkur dukho, Jisu mwv kano alnum.

¹³Mwv aado hoqgv kootul taoq svvn nwwg ok dw-dw jaqdwb doodwb kaapa tvl mwv hoq svvn dookub aaxy dootwqto mwwnv ogumb haanum, hvbmabde mwv hvvnwql kaanamv ok rooxongam kaapanum, hoggab hoq moodho taoq aaxy xeed moodwb nyimanum.

¹⁴Jisu taoq svvnam benum, “Noqg galoqkv hiyvkam taoq aaxy nywywngam lok dvkram!” Mwwg buu tulungv mwwg soq benam sam tanum.

¹⁵Kokw so bulv Jerusalemho wc kunum, ho Jisu Xumk nam urab haal uraho doonbo kor mvnbo, rvnbo nyi tulungam agab ruqlinum. Mwv twngk kwly bo tulug tebolam hoo pukum puqnbo tulug dootam mam likub-lexeq dvb mvnum.

¹⁶Ho mwv hiyv nvkam Xumk nam bviywr hoq xaqcarb hog gokam baqpeql wm mvmanum.

¹⁷Mwv nyi tulungam tomswrl benum, “Dvrwqbo potalo xeqpwl apnamv doodwn, Pwnbov benum, “Ngoqg nammam nyob luuxig swgw gwwkumko nammv hvl betayin.” Hvbmabde nulv sam dvcobo tulug kvs sikumko nam gob mvpa ku!”

¹⁸Nyub buda tulungv la Pvvb tomswrbo nyi tulungv soq benam sam tapanum. Hoqgab bulv Jisun mengdwb pagoq meekarnum. Hvbmabde bulv mwam bosnum, hoggab nyi mwlwngv mwwg tomswrnam mam tatwl swrjaqb lomnum.

¹⁹Ariyum kan kunum hoo Jisu mwv la mwwg buu tulungv nampam hoqgv lengknv wleq kunum.

²⁰Ar rogin so, arkomc, bulv lamta ho wdu dukho, bulv taoq svvnam niqtuq hoqgv rwb namgob sengl siknam mam kaapanum.

²¹Hognvkv nyiknum ham Pitor mwwgabnum hoo mwv Jisun benum, “Tomswrbo kaaka to, noqg beenam taoq svvnv sipa ku!”

²²Jisu bulam birwqnum, “Pwnboam nulv mwwjwto,

²³Ngo nulam jvqtw jaqb bedwn, hiyv akgon soq yorn sam betayin, soqgv wgdvl atv sa-svlo urab jvvlwq suto hvl mwum maab mwwg hangho mwwdwn, ho mwwg benamv nyitayin hvl mwwjw baloqkam mwwg gab soq sam nyitayin.

²⁴Soq pagoq so ngo nulam bedwn, nulv swgwl hognvkv kopan ham kaapa paknvbo hvl mwwjwto hoo nulug konam mwlwngam jitayin.

²⁵Hoo nulv xumtab daqrab yukam hiyv akgonwg aoho hog hang baqnam doop nyiloqkam ham apaq jito, ho ao gvda tolo doonbo nulug Abv kam nulug nyimurnam mam apaq jitayin.”

²⁶No nyiig nyimuram apaqjib nyiloqkam, ao tolo doonbo ao Ab noqg nyimur nyic mwlwngam apaq jitayin.

²⁷Kokw so bulv lokta hvraqb Jerusalemho hookur kunum. Jisu Xumk nam uraho gaqkar yvdu dukho, nyub buda tulungv, Pvvb tomswrbo tulungv hoo nyi nyiixa tulungv mwwg dookub haabnv

²⁸bulv mwam toxnum, “No soq bon tulu sam nyidwb hognvk atorv kaapa pan? Hiyv nam soq ator sam jinbov?”

²⁹Jisu bulam birwqnum, “Nulam ngo tox sanam lo tox coodwn, hoo ham nulv birwqbalo, hoo ngo nulam betam tayin hogloqgv ator kaapal soq tulu sam nyidwn.

³⁰Jon hogloqkv baptijum jidwb atoram kaapanum, Pwnbo galoqkv ma nyia ko galoqkv?”

³¹Bulv bulug atwg pengko lo goomin sunum. Bulv benum, “Ngulv hog hvl betayin? Ngulv Pwnbo galoqkv hvl bebalo, mwv betayin, hvnyiloqkam hoggub Jonnvn mwwjw maanum”

³²Hvbmab ngulv Nyia ko galoqkv hvl besam bulv nyi tulungam bosnum, hoggab nyi mwlwngv cengnum, Jon nyiqry benbov.”

³³Hoqgab bulv, Jisun birwqnum, “Ngulv cengma.” Jisu bulam birwqnum, “Ngo kam nulam ngo hogloqgv ator naal soq bon tulu sam nyigdvn ham ngo beram.”