Read Nyishi MARK 12 Bible Online

MARK 12 - Nyishi bible

MARK 12

¹Kokw so Jisu bulam doocil agam goonum. Kol nyi ak doonum, mwv roo boolu ak mvtwl ham sulungv kvryiq dvb nwqlubnum ho roo alangam heqxornan ak mvnum, hoo boolungam kaaya ko taabo boog kam ponum. Kokw so mwv hoq roo boolungam rongo mvnbo nyi tulug alaqho apaqpel mwv nam hoqgv aadob nyoyw wleqnum.

²Kokw so roo aaxiam pud moodv haad kukho, mwv mwwg nyera akwn kanam tvl mwwg aaxy naadynam mam naatak hvl rongo mvnbo tulug ogumb kanamnum.

³Rongo mvnbo tulungv nyera akam nootul jwwgur tvl mwam alaq asarb hog gokam jimab kanam nomkur kunum.

⁴Kokw so at akv nyera akta kanamnum, rongo mvnbo tulungv nyera akam dumpongam jwwgoql mvtwl, mwam hvnyw-har nyisunum.

⁵Bir at akv nyera akta kanamnum, ham bulv mengknum. Hoqhvb kvda bulv vigo nyinum, tuugin jwwgurl mvnum, tuugin mengnum.

⁶Nyi akv hoqb kanamsv sija mwwg ko tuup tumanam akv dootwq kunum. Kokw jaqso mwv benum, “Ngo jvqtw jaqb cengdwn, bulv ngoqg ko tuup sam xitayin.

⁷Hvbmabde rongo mvnbo tulungv bulv bemin sunum, “Si kulak rongo atwg ko tuupv. Kuj, ngulv mwam mengtuj, hoo mwwg gumnv ngulug gab dootayin.”

⁸Kokw so bulv ko tuup akam nootul mengknum hoo mwwg svmangam roo boolu agaho hurpaq kunum.

⁹“Hvb nyiloqkam roo boolu at akv sija hoggub nyitayin?” Jisu toxnum. “Mwv haal rongo mvnbo tulungam bulam mengtayin ho roo boolungam rongo mvnbo nyi asaqkam jitayin.

¹⁰Jvqtw jaqb nulv sam Dvrwqbo Potalo poory ripa panpv? “Nam mvnbo tulungv niqtuq dooma dvnwk hvl ximab haqpaqnam wlwngv mwlwngam xibin yaanam wlw gob nyiknum.

¹¹Soq sam At Sw nyinum, ngulug vnyiq kaaga lo swrjaqb nyinum!’”

¹²Juhudi tulungam nyig-wgbo tulungv Jisun nootu dvb tuukanum, hoggab mwwg doocil benamv bulam beneql bepan hvl bulv cengnum. Hvbmabde bulv nyi tulungam bosnum, hoqgab bulv mwam apaqpel wleqnum.

¹³Parisi tulungv la Herodg dvpar hoq nyi ata go Jisun toxul mwwg agam gook hoqgv gooxiaqnam mam nootu mvdwb kanamnum.

¹⁴Bulv mwwg dookub haabnv mwam toxnum, “Tomswrbo, ngulv cengdwn no jvqtwngam bedwn hoo nyi tulug benam mam hiyv nvkam bos maadwn. Ho hiyv nvkam koi anyo xima dvn, hvbmabde Pwnbov jvqtwngam nyia ko gab mwwnam mam kaakin dvn. Ngulam no bekin tvna, ngulv Sijarnvn nyooga tulungam jidwb nyid nvi yv ma nyima dvn? Hvbmabde ngulv jitayin yv ma jima tayin?”

¹⁵Hvbmabde Jisu bulug hang uraho mwwsnam mam kaapa tvl birwqnum, “Nulv hoggub ngoqg gaml bexiaqko gab nootu tadwn, soq twngk kabarlo ak ngam jitwb, hoo ngo ham kaaka tvnwp.”

¹⁶Bulv twngk kabar barg mwam jinum. Ho mwv toxnum, “Soq so hiyvg nyuqtuq-moorv ho eminv doodo?” Bulv birwqnum, “Sijariyagv.”

¹⁷Kokw so Jisu benum, “Hoqgab hognvk Sijar gab doodwn ham Sijarnvn jito ho hognvkv Pwnbog gab doodwn ham Pwnboam jito.” Jisug soq benam sam tatwl bulv lomnum.

¹⁸Sinam hoqgv nyiv turab kuram hvl benbo Sadusi nyi tulungv Jisug dookub haabnv benum,

¹⁹“Tomswrbo, Mojes ngulam soq pvvb sam xeql ap jipan. Hiyv nyiv ko doomab nywxwngam apaqpel sileq dvn, hoq nyi ak hoqg borv xwwmy akam nywxw sol ko doob nyiloqkam hoq ko tuup ham sikbo nyi akwg kov hvl bedwb nyidwn.

²⁰Lok vbw-bor kvngo doonum, vbw jaqhv nyem naanum, hvbmab ko doomab sileqnum.

²¹Kokw so hoq niqsinv nyem akam doognum, hoo mwv kam ko doomab sileqnum. Hoqhvb kalam oum deen akv kam nyinum.

²²Hoqhvb vbw-bor kvn bwbwngv mwlwngv ko doomab sileqnum. Mwlwg kokw so nyem akv siknum.

²³Kokwngam sikbo mwlwngv swwgwb turab yukam nyem hv hiyvg nywxwb swwtayin? Hoggab mwlw kvnv mwnwn nywxw boonum.”

²⁴Jisu bulam birwqnum, “Nulv Dvrwqbo Potangam ho Pwnbog atoram kam cengma namsi nulug nyixiaqnam ma i?

²⁵Hoggab sikbo tulungv swwgwb turab yukam, bulv ao gvda tolo ao gumtw tulu hvbkalam nyitayin hoo bulv nyem jimin-naamin suram.

²⁶Sikbo tulungam pwrab kunam bvrwqngam nulv Mojesg Potalo puum mam wm gunam pagoqkam lok kam poory ripa ma i? Hoqho xeqpnamv doodwn, Pwnbov benum, “Ngo Abraham gv Pwnbov, Aisak gv Pwnbov hoo Jakub gv Pwnbov.

²⁷Mwv simab turl doonbo Pwnbov. Sinbo tulug ma. Nulv nyixiaq loodal nyimur pa!”

²⁸Pvvb tomswrbo nyi ak bulug goonam mam tal doonum. Jisug Sadusi tulungam birwqnam mam kvtaqjaqb beg nvba bo hvl mwv mwwnum, hoggab mwv Jisug dookub haal toxul tvdynam ak mwwgab layil haagnum, “Mwlwngam xibin yaanam gaml (pvvb) si hogloq ak hv?”

²⁹Jisu birwqnum, Israelv, tato! Pwnbo At Sw ngulug At Sw jaqkv,

³⁰Noqg Pwnbo At Swn noqg hvvjw-harangv, noqg yalv, noqg nyupuq lyolv hoo noqg mwlw atorv mwam aby boto.

³¹Mwlw jaqkam xibin yaanam gaml (pvvbv) vnyi deen si, “Noqg door-doopwngam no atam aby sunam hvb aby boto, soq vnyi sam koi yaanbo gaml (pvvb) asaq dooma dukun.”

³²Pvvb tomswrbo akv Jisun benum, “Tomswrbo, no kvtaqjaqb bedo! Noqg benamv jvqtwngv, At twqku ngulug Pwnbov, mwwg aoho asaq Pwnbo dooma dvn.

³³Hoqgab nyiv Pwnboam mwwg hvvjw-hara hoqgv mwwg hang hoqgv, hoo mwwg hog mwlw ator hoqgv, hoo mwwg door-doopwngam mwv atam aby sunam hvbkalam aby dvb nyiky dvn. Sibin iriq mengl yugw aoho Pwnboam guum mam lingsam soq gaml vnyi sam bugil tal swwnamv alyadwn.”

³⁴Jisu mwv pwbw jaqb birwqnam mam tatwl, mwv mwam benum, “No Pwnbog Lvpw-haty hoqgv aado haajaq go dooma.” Soq kokw so Jisun hiyvkam hog ak tox dukub hampeq nyokmab nyiknum.

³⁵Jisu Xumk nam uraho tomswr swrjo ywwtwl mwv benum, “Pvvb tomswrbo tulungv hoggub Ywwnbo akv Debidg ko hosiqb nyitayin hvl tomswr dvn?

³⁶Dvrwqbo yalv Debidnvn bilwq tvl mwam bemdvb jinum: ‘At Sw ngoqg At Swn benum, Ngoqg lvqbwq taqc so dooto ngo hwdlo noqg nyemaqkam noqg lvpia niikumho doom dvb mvma deedib.’

³⁷“Debid mwv atv mwam “At Sw” hvl goqnum, hvnyiloqkam Ywwnbo akv hoggub Debidg ko hosiqb nyitayin?” Nyi tulungv Jisug benam mam hemp alwb tanum.

³⁸Mwv bulam tomswr banv benum, “Vjam aaso dvb lvbor dvb kootwl kwm-kor mvk haty lo nyi tulungam xil xumk dvb mwwl nyinbo,

³⁹Sinagog nam uraho xuql apnam dootam mam kaal doonbo hoo durumko nam mwlwngam doongam yaanbo dootam mam xuql doonbo, Pvvb tomswrbo nyi tulungam hengabl kaagabto.

⁴⁰Bulv xwwmy tulungam mwwnyi-saqyal bulug nammam naareqdvn ho nyi kaaga-tagab aaso jaqb swgwdvn. Bulv mwlwngam alyamabo hentwr laqm mam baqtayin!”

⁴¹Kokw so Jisu Xumk nammwg twngk uddum ogumhv daqtwl nyi tulungv hoggub bulug twngkam jinum ham mwv kaal doonum. Nyetbo nyi tulungv vigo twngkam naleqb uddum urab vlwqnum.

⁴²Kokw so jwwgwbo xwwmy dvn ak haabnv lwwcw taiyin tvqnyi go, taiyin taqgub xinam ak uddum urab vlwqnum.

⁴³Jisu mwwg buu tulungam goqkum banv bulam benum, “Ngo nulam jvqtw jaqb bedwn, soq xwwmy jwwgwbo ak si mwlw nyi asaqkam koi yab aky vlwqko twngk uddumho vlwqpa. Jwwgwbo xwwmy ak si mwn hognvkv doognum ham mwlwngam jijur jimarl dvnsam jipaq kunum.

⁴⁴Nyetbo tulug jinamv bulug lableqkam jinum, hvbmabde jwwgwbo xwwmig jinamv mwn hognvkv doogpan ham jinum, ho mwn mwnwg swwgw sanam mam jipaq kunum.”