Read Nyishi MARK 13 Bible Online

MARK 13 - Nyishi bible

MARK 13

¹Jisu Xumk nammam apaqpel wleq dukho mwwg buu akgon benum, “Tomswrbo, kaato! Soq wlw torab si ho nam sam hoggub kangam alwb mvpan!”

²Jisu birwqnum, “No soq wlw pvvsiq-paameql mvnam nam sam kaado, soq pengko so doonbo wlw pwkin gonkam mwwg dookho doom dvb jiram, wlw pwxiam mwwg dook hoqgv joopaq dvb nyitayin!”

³Kokw so Jisu Olib puutu aohog Xumk nam langk taqcib dookurl doodwk ho Pitor, Jems, Jon hoo Andriyo bulv vpwb mwwg dookub haanum.

⁴Bulv benum, “Soq tulu si hwdam nyitayin ngulam bekin tvb, hoo hoq moodv haaknam mam kaacin dvb hognvkv xeq nyitayin ham ngulam bekin tvb.”

⁵Jisu bulam birwqnum, “Hiyv nvkam nulv sup komab hengab dooto.

⁶Nyiv ngoqg eminb haal ngoqg puiyam bednvk hvl betayin, ho haal betayin, “Ngo mwv” hoo bulv nyi tulungam vigo sup tayin.

⁷Nulv ogumho nyob panam mam ho aado hoo nyob panam mam tapa tvl nulug hangv mwwkwq-svqwq maab, soq svk nyinam si nyiky dvb nyitayin, hvbmabde hvb nyijaqkam moodv wnya dvn hvl mwwmabv.

⁸Gvda akwn gvda gon nyob paiyaq minstayin, lvpw akwn lvpw ak gonam patayin, gvda mwlwho nyiobiv hwqtayin, dwr-kanongv wtayin, soq tulu si ko cinc cirabnam hvb nyidwn.

⁹“Nulv atv kam hvvminl hengab dooto. Nulam nootul nyel maqpar boatayin. Nulam Sinagog uraho jwwtayin, nulv gora abwg agaho, lvpw atwg agaho ngoqg emin gab daql bulam tugu puiyam bekin dvb nyitayin.

¹⁰Hvbmabde wd moodv haama daab tugu puiyam nyob luuxig dook agaho bekin dvb nyitayin.

¹¹Nulam nootul nyel maqpar bool wg yukam nulv hognvkam betayin ham mwwdwq maab, hvbmab hoq moodam nulam hognvkam bedwb jitayin ham nulv beto. Hoggab nulam bedwb jinam agamhv nulug atwg galoqkv ma, hoq tuluhv Dvrwqbo yal galoqkv jitayin.

¹²Nyi tulungv bulug atwg boram nyi tulug alaqho jitwl bulam mengm dvb jitayin, ho ab tulungv kam atwg ko tulungam hvb nyitayin. Ko tulungv kam bulug ab annam ceebiob hang baqtayin hoo bulam mengm dvb jitayin.

¹³Nyi vxiv nulam ngoqg emin gab oyum yumkum tayin. Hvbmabde hiyv nyiv kokw nagub cwql dooyu tayin mwam ywwtayin.

¹⁴“Nulv hoq “Almanbo Bosnam” ham dookin maak nyookho doonam mam kaapa tayin. “(Hiyv poory dvn mwv tacinto!) Judiya gvdaho doonbo nyi tulungv yorn puutub keleqto.

¹⁵Hiyv nyiv mwwlo aoho doodwn mwv ipoql mwwg nam urab haal nam hoqgv hog akukam bvl wg dvb naamabv.

¹⁶Hiyv nyiv rongo lo yvdwn mwv nammwb wkurl kamtam naatab wmab,

¹⁷hoq moodam nyem ko gvnbov la ko gwwi twwm xiqn bov hentwr jaqkam henbin yaatayin.

¹⁸Pwnboam Xumto soq tulu sam nyim mvmab tapam poolam.

¹⁹Hoggab hoq moodwg hentwr hv gvda gvt so nywywngam gvda gvt sam Pwnbov pwdwk hoqgv sool godab hengka maanam hentwrv. Ho kolam kam soq svk nywywngam nyita ma.

²⁰Hvbmabde hoq moodam At Sw anyo dukub mvpa kun, hvb mwv mvmalo, hiyvkam swwram. Mwwg xuqnam nyi tulu gab hoq moodam anyo dukub mvpa kun.

²¹“Ho hiyv akgon nulam, “Kaato, Kristo si doodo, hvbmab Kristo vv doodo,” hvl bejaqkam nulv mwam tvjw maab.

²²Hoggab xaalyo bo Kristongv ho xaalyo bo nyiqry benbo tulungv lengtayin. Bulv swrdorxeqb nyimanam mam nyil Pwnbog xuqdumnam nyi tulungam sup dvb nyitayin.

²³Hoqgab nulv atam hengab suto! Hoggab ngo hog mwlwngam nyima daab nulam bekin pakun.

²⁴“Hoq hentwr moodv wxo kokwngam doonyiv kaaya tayin kun, poolv kam huukram.

²⁵Takar tulungv ao toloqgv hol tayin, hoo doa ao tolo nyinamv ok sutayin.

²⁶Nyia Ko Tuupv xitor-xilob nyil doomwq ao toloqgv ipoqnam mam kaapa tayin.

²⁷Mwv mwwg ao gumtw tulungam gvda gvtwb poop daayar kanam tvl Pwnbog xuqnam nyi tulungam gvda taqg-loosaq gamlam mvmtayin.

²⁸“Taoq svvn soqgv doocnam lo ak nulv cengto. Taoq svvn haqbv vjwl jenyeql okv jurlin yinyi lo nulv cengdwn, dug poolv ogum paku.

²⁹Hoq hvbkalam, nulv cengto, soq mwlw sam nyinam mam kaapa yinloqkam, moodv ogum paku, mwv hvvnwq paku.

³⁰Sam mwwgabto soq mwlw si sija turl doonbo nyi tulungv sima daab nyitayin.

³¹Swcw nyodongv nyiileq jaqkam noqg agam tulu si nywywngam niiram.

³²“Hiyvkam hoq moodam hvbmab aalv hwdam haatayin ham cengma dvn, ao gvdag ao gumtw tulu ngvkam ho Ko Tuupv kam cengma dvn, hvbmabde Pwnbo aro cingtwq dvn.

³³Hoqgab nulv atam hingkub sul dooto, hoggab hoq moodv hwdam haatayin ham nulv cengma do.

³⁴Soq si nyi ak mwwg nammam nyera tulug alaqho apaqpel, nyera tulungam bulug at atwg vxig bonam nyim dvb tompaq jipel nyoyw wleqnum hoo nam rvkybo akam rvky mvdwb jinbo hvb nyidwn.

³⁵Hoqgab hengabl hvvminl dooto, hoggab nam atv hwdam haata yikun ham nulv cengma do, lokam Ariyum mam hvbmab doonyi caalin kalam haakam dvn.

³⁶Cengma lvpa golo haabnyiloqkam nulv mwam yubngaql doodub kaapa komabv.

³⁷Hoqgab ngo nulam mwlwngam bedwn, Hengabl kaayal dooto!”