Read Nyishi MARK 14 Bible Online

MARK 14 - Nyishi bible

MARK 14

¹Dvtv Durum ho Opap kiilwq maanam Wtw dvd Durum aal loonyig otuqho, nyub buda tulungv la tomswrbo tulungv Jisun kvsil nootul mengdwb pagoq meekarnum.

²Bulv benum, “Ngulv sam durum dwd mood so nyima buj, hvb nyibaloqkam nyi tulungv hur marab gob nyil yolu dutayi.”

³Kokw so Jisu Betani nampamho otuqho tviyiq nyinbo Simong namho vcin dudul doodu dvkho nyem ak sungam albo alabastar kuty xinam uppum pumg bval haanum. Mwn uppum mam mvkoq banv kutiam Jisug dumpo ho neenum.

⁴Hoqho yvnbo nyi tulungv ham kaatwl hang lengl bulv bemin sunyianum, “kuty sungam alboam mwciq-mwiyiql hoggub nyis doomab mvmin gvdwn?

⁵Soq sam rup twngk lwum gob puql jwwgwbo nyi tulungam jiloq al ya!”

⁶Hvbmabde Jisu benum, “Mwnwn vpwb nyipw mvto! Nulv mwnwn hoggub bitur dvn? Mwn ngoqgab kvtaqjaqb hoo aljaqb nyipa.

⁷Nulug dookub looxiam jwwgwbo nyi tulungv dooba tayin, hoo mood gotwq bolo nulv bulam svka kaadwb kaapa tayin, hvbmabde nulv ngam looxiam kaaparam.

⁸Mwnwg nyilanam mam mwn nyipa kun. Mwn ngoqg gv aoso sungam albo kutiam paqyaq namsi ngoqg gv sam svma liima dab svma liidwb mwx-mvaql mvnam gos lak.

⁹Sija ngo nulam jvqtw jaqb bedwn, hogloq gvdaho Tugu Puiyam bekar tayin hoq gvdaho mwnwg nyiknam bonam mwnwn bepal betayin.”

¹⁰Kokw so Judas Iskeriot, buu wyw leq vnyig pengko lo akwn, agab lengb nv nyub buda tulug dookub Jisun nyepintab bulug dookub haanum.

¹¹Bulv mwwg benam mam tatwl taby tapanum hoo mwam twngk jibwk hvl birwl apnum. Hoqgab Judas Iskeriot Jisun bulug alaqho gvqlwq jidwb pagoq kaacoql yvnum.

¹²Opap kiilwq maanam wtw dvd aalwg otuq aal jaqho sviya koam patabl Dvtv Durum mam ruml dvdho, Jisug buu tulungv mwam toxnum, “No ngulam hogloqho wl noqg gab Dvtv Durum mam dvdwb mwx-mvaq tak hvdwn?”

¹³Ho Jisu bulug vnyi gon kanaml soq sam bilwqnum, “Nampam urab haan, iss uppum go jool wnbo nyi ak nulv kaapa tayin. Mwwg kokwb

¹⁴wmin gvl mwwg nam haakwb haamin gvta, ho nam atam beta, “Tomswrbo akv bedwn, hogloq imiqho ngo la ngoqg buu tulungv Dvtv Durum mam dvtayin?”

¹⁵Ho mwv nulam imiq golo hog mwlwngam ngulug gab mwx-mvaql apnam ak kaakin tayin.”

¹⁶Buu tulungv nampamb wknv hog mwlwngam Jisug bulam bekjaqb kaapanum, hoo bulv Dvtv Durum dvsam munu kunum.

¹⁷Ariyum kan dukho, Jisu mwwg buu wyw leq vnyiam boolayil haanum.

¹⁸Kokw so bulv tebolho dudu dvkho Jisu benum, “Ngo jvqtw jaqb bedwn, nulug pengko ho ngoqg dvkwb dvba bo akv ngam nyepin tayin.”

¹⁹Buu tulungv mwwdar lakmab nyinum hoo mwam akin akinv tox xurabnum, “No ngam jvqtw jaqb bema i? Hoq akv ngo yv?”

²⁰Jisu birwqnum, “Hoq akv nulug wyw leq vnyig pengko hoqgv, hoq akv mwwg wtwngam pvtaq uraho ngoqg lvgab alaq ibur dvn.

²¹Nyia Ko Tuupv Dvrwqbo Potangv bekjaqb mwv sitayin, hvbmab Nyia Ko Tuupam nyepinbo ak gab anya mwwpangv! Soq nyi ak si mwv nywywngam dwr buqkmab doonyi loqkam alyaba de.”

²²Bulv dudu dvkho, Jisu wtw taqg naarab banv xuml paqxo kokw so wtwngam pindub banv ham buu tulungam jil benum, “Sam naato, si ngoqg gv ayaqkv.”

²³Kokw so twwn nan pvtaqngam naarab banv Pwnboam paqnum, ho pvtaqngam bulam jinum, hoo bulv mwlwngv twwnum.

²⁴Jisu benum, “Soq si ngoqg nyi mwlw gab gv ui lengnamv, ho ngoqg uiyv Pwnbog birwl apnam mam pvvb padwn.

²⁵Ngo nulam jvqtw jaqb bedwn, ngo soq twwn nan sam Pwnbog lvpwlo nitbo twwsam twwma deedib nywywngam twwtin kuram.”

²⁶Kokw so bulv bemin bvl Olib Yornwb lengl wknum.

²⁷Jisu bulam benum, “Nulv mwlwngv ngam apaqpel xaal keleqtayin, hoggab Dvrwqbo Potangv bedwn, “Pwnbov sviya rvky boam meng tayin hoo sviya mwlwngv cwrsaq twqb nyitayin.

²⁸Hvbmabde ngo swwgwb turkur duk kokwngam, ngo nulug otuqb Galilib wco tayin.”

²⁹Pitor birwqnum, “Mwlwngv nam apaq jaqkam ngo nywywngam nam apaqram.”

³⁰Jisu Pitornvn birwqnum, “Ngo nam jvqtw jaqb bedwn, poroqngv lwnyi go xoqma daab soiyig aiso no ngam luum go cengma kvl betayin.”

³¹Pitor hvraqb vcjaqb ator alwb birwqnum, “Ngo nywywngam hvl beram, ngo noqg lvgab sijaqkam nywywngam vm mvvram!” Hoo buu tulungv mwlwngv benam akwn agam gamkinam benum.

³²Kokw so bulv Getsemani hvl benam nyookho wc kunum, hoo Jisu mwwg buu tulungam benum, “Ngo xumta deen nulv so dooiya to.”

³³Jisu mwv Pitor, Jems ho Jonnvn lokub bool wgnum, hentwr jaqb mwv mwwdwq-saqk gob nyinum.

³⁴Bulam mwv benum, “Ngoqg hang soq mwwdwqnamv haajaq jaqpa, sisv twqb nyido. Nulv so dool hengab kaal dooiya.”

³⁵Mwv hoqgv meeg wggin banv, kedhv geqpwl xuml benum, hvb nyila baloqkam, mwv hoq hentwr henam ham hema dvb xuml benum.

³⁶Mwv xuml benum, “Ngoqg Ab, no hog mwlwngam nyipw maadwn. No ngoqg soq hentwr hennan pvtaq sam ngoqg galoqkv naapaq tvb. Hvbsujaqkam, ngoqg mwwkub ma, hvbmabde noqg mwwkub nyimto.”

³⁷Kokw so mwv wkur kunv kaanamv buu oum mam yubngaql yubdul doodub kaapanum. Mwv Pitornvn benum, “Simon no yubdul doodwn? Wm swlw duur gokam huul doola kuma i?”

³⁸Hoo mwv bulam benum, “Hengabl xuml dooto pooka-yirka ko bwdwb homa dvb. Yalv ator sudwn, hvbmabde gv soodinv ator maadwn.”

³⁹Mwv lokta wkurnv benam agam akinam bel xumnum.

⁴⁰Kokw so mwv hookur kunv mwwg buu tulungam hvraqb yubl doonam mam kaapanum. Bulug vnyiqkam nyiqbiol bulv ap nyomanum, hoo bulv mwam hog hvl birwqtayin ham bulv cengmanum.

⁴¹Kokw so mwv luum dvb bulam yubl doodwb kaapa tvl mwv bulam benum, “Hvbnyiloqkam sija nulv yuminl dooto, ho moodv haapa ku! Kaato, sija Nyia Ko Tuupam nyic nyinbo nyi tulug alaqho gvqlwq jipa ku.

⁴²Gorabtuk, kuj wnuj, kaato, soq nyi ak si lak ngam nyepin bov.”

⁴³Jisu raab agam goodul doodwkho mwwg buu wyw leq vnyig pengko hoq akwn bulug dookho nyub buda tulungv, Pvvb tomswrbo tulungv la nyiixa tulungv kanamnam nwwxo-uppuq orioq bvvtwl nyi ata go haanum.

⁴⁴Nyepinbo akv nyi tulungam hog ak kaacin mvdwb bekinl apnum. “Hogloq nyi akam ngo moopup tayin hoq nyi ak hv nulug tuugab nootu tanamv. Mwam nootul hengab rvkil bool wgto.”

⁴⁵Judas Iskeriot wc twqnv Jisug dookub haal “Tomswrbo!” hvl mwam moopupnum.

⁴⁶Kokw so bulv Jisug gv aoho idaql mwam nootu kunum.

⁴⁷Hvbmabde bulug pengko ho daqnbo nyi ak mwwg lyoqr orioqkam seqlin banv Nyub But akwg nyera hoqg nyurungam papaqnum.

⁴⁸Ho Jisu bulam benum, “Nulv nwwxo, orioq bwwtwl dvco boam nootunam hvb ngam nootu taab haadwn i?

⁴⁹Ngo Xumk nam uraho looxiam tomswr swrl nulug dookho yvnum, hoo ngam nootu maanum. Hvbmabde Dvrwqbo Potalo xeqpnamv niqtuq lengdwb jvqtw jaqb nyinum.

⁵⁰Kokw so buu tulungv mwlwngv mwam apaqpel xaal keleq kunum.

⁵¹Hvbmabde yaapa nyi ak vj kwlwq-kvlaqb koonbo ak Jisug kokw-kokwb wmin gvnum. Bulv mwam nootu dvb nyikanum.

⁵²Hvbmabde hoq nyi ak hv vjam apaqpel gv asarv talo tvl xaal keleqnum.

⁵³Kokw so Jisun Nyub Butwg nammwb, nyub buda tulungv, nyiixa tulungv hoo Pvvb tomswrbo tulungv dookumko namho boal haagnum.

⁵⁴Pitor aado hv wc wc yoomab wmin gvnum, ho Nyub But nammwg hat uraho haanum. Ho mwv rvkybo tulug dookho wm hengl doonum.

⁵⁵Nyub buda tulungv la Dookum hoq nyi tulungv Jisun mengk pagoq yolu hvvky meekarnum. Hvbmabde bulv akukam meepa maanum.

⁵⁶Nyiv vigo Jisug ceebiob xaalyob beknum, hvbmabde bulug benamv jumin sumanum.

⁵⁷Nyi tulu gon daqrab banv Jisug ceebiob xaalyob benum,

⁵⁸Ngulv mwwg soq sam benam mam tatwn, “Ngo soq nyi mvnam Xumk nam sam sapia tvl aal loum kokwngam sam ngo nyiv mvnyi maanam ak hvb mvdar tayin.”

⁵⁹Hvbsujaqkam bulug pui baqnamv loomin gvdwb nyimanum.

⁶⁰Nyub But akv bul mwlwg agahv daqrab banv Jisun toxnum, “Bulv nam yolu gob benam sam no hoggub birwqram i?”

⁶¹Hvbmabde Jisu ody maab cooikab agam gamgkam birwq maanum. Nyub But akv lokta mwam toxnum, “No jvqtw jaqb Xikumnam Pwnbog Ko Tuupv, Ywwnbo ak hv jaq i?”

⁶²Jisu birwqnum, “Vv ngo, hoo nulv Nyia Ko Tuupam mwlw jaqkam At ator yaanbo akwg lvqbwq taqc ho doonam mam hoo ao gvda toloqgv ao gvdag doomwq aoho ipoqnam mam kaapa tayin.”

⁶³Ho Nyub But akv atwg lvlwqkam swrc banv benum, “Ngulv hvvky meegaq dukub nyikma!

⁶⁴Nulv Pwnboam mwwg benyi-beyanam mam tag nukba. Nulv sija hog hvl goobwq tadwn?”

⁶⁵Nyi tulungv tuugin mwam tacor curxabnum hoo mwam vnyiq kam puucw tvl jwwl benum, “Beka tvna, hiyv nam jwwn bov!” hvl bulv toxnum. Kokw so rvkybo tulungv mwam pitaql jwwjo-jwwyol bool wg kunum.

⁶⁶Pitor hvraqb Nyub But akwg nam haty ho doonum ho Nyub But akwg paqn ko ak Pitorg dookub haanv

⁶⁷Pitornvn wm hengl doonam mam kaapa tvl mwam kaagab lalal benum, “No rub Najaret Jisug dookub yvbanum.”

⁶⁸Hvbmabde mwv vm mvl benum, “Ngo cengma dvn, no hognvkam bedwn ham ngo tacin ma.” Kokw so mwv agab lengda kalam poroqngv xoqknum.

⁶⁹Bon nyijobo paqn akv Pitornvn lokta agab daqnam mam kaapa tvl hoqho daqnbo tulungam bekinnum, “Mwv bulug pengko hoq akgon!”

⁷⁰Hvbmabde Pitor lokta hvraqb vm mvnum. Meeg oyu maadab hoq ogumho daqn bo nyi tulungv Pitornvn lokta benum, “No bulug pengko hoqg akwn maak hvl no vm mvvdwb nyima, hoggab no rub Galili hoqg nyiv.”

⁷¹Ho Pitor benum, “Ngo dingl jvqtwngam bedwn! Ngo xaalyo dvnyiloqkam Pwnbov ngam laqm-baqm tvb nulug benam ak ham ngo cengma dvn!”

⁷²Ho poroqngv lwnyi dvb xoqknum. Kokw so Pitor mwam Jisug poroqngv lwnyi go xoqmadab no ngam cengma dvnwk hvl luum go betayin hvl benam mam mwwpa kunum. Kokw so mwv mwwka sutkul vcjaqb xabnum.