Read Nyishi MARK 15 Bible Online

MARK 15 - Nyishi bible

MARK 15

¹Arkomc nyub buda tulungv, nyi nyiixa tulungv hoo Pvvb tomswrbo tulu ngvla mwlw Dookumv kaapa minsul bulv goobwq kunum. Bulv Jisun tagv kargab tvl boolayil Pilatg alaqho jipaq kunum.

²Pilat mwam hudy deenum, “No jvqtw jaqb Juhudi tulug lvpw atv i?” Jisu birwqnum, “No lak ham bedwn.”

³Nyub buda tulungv Jisun vigo yolu ann gob benum.

⁴Pilat hoqgab mwam lokta hudil toxnum, “No hog gokam birwqram i? Taka to bulug nam benam mam!”

⁵Jisu hvraqb agam gamgkam birwq maanam mam kaatwl Pilat swrjaq gob mwwl lomnum.

⁶Nyedarko Durum moodam nyi tulungv toxa tvbwk hvl ko-gabnam pvtwq uraho doonbo nyuum mam toxa jidwb Pilat nyinum.

⁷Hoq moodho Barabasvk hvl benam, sorkaram yolu dul nyi mengbo ak pvtwq urahv doonum.

⁸Nyi tulungv hookum banv bulug gookynam mam Pilatnvn nyitbvk hvl benum.

⁹Pilat bulam toxnum, “Nulv ngam nulug gab Juhudi tulug lvpw atam tolin tvb hvl bedwn i?”

¹⁰Mwv hindy jijaqb cimbwnum nyub buda tulungv Jisun hang baqbnv mwwg alaqho jilwqnum.

¹¹Hvbmabde nyub buda tulungv nyi tulungam bikul apnum. Pilat bulug gab Barabaswn toxa mvdwb gumnum.

¹²Nyi tulungam Pilat lokta toxnum, “Hvbnyiloqkam nulug Juhudi tulug lvpw atv hvl benam nyi ak sam ngo hoggub mvtayin?”

¹³Bulv sogoq goql birwqnum, “Mwam daapotol mengpaqto!”

¹⁴Hvbmabde Pilat bulam toxnum, “Mwv hognvk jaq yolu nyigo pan?” Bulv vc yaiyab sogoql birwqnum, “Mwam daapotol mengpaqto!”

¹⁵Kokw so Pilat nyi tulug hang xumdvb nyidwb mwwnv mwv Barabaswn bulug gab toxa jiknum. Hoq kokw so mwv Jisun xipwql mvmtvl daapo aoho mengm dukub nyi tulug alaqho gvqlwql jiknum.

¹⁶Sipai tulungv Jisun gora ab bokumg nam haty urab boanum hoo bulug sipai dvpar pvrpwngam olumgob goqkumnum.

¹⁷Bulv mwam lwwsa-lwwma bo vj ak koom tvl, taag ywr dumtup ak mvtwl mwwg dumpo ho tulwqnum.

¹⁸Kokw so bulv mwam salam jinyanum, “Juhudi tulug Lvpw Atv swwiyu nvka!”

¹⁹Bulv mwwg dumpongam svvdangv xigoql mvnum hoo mwam tacorv curxabnum, lwbw kumbwl bulv mwam xumnum.

²⁰Bulv mwam nyij-nyipar nyitar kokw so bulv mwam koomnam lwwsa-lwwma bo vjam pilin tukul mwwg atwg vj koonam mam mwam pilwq jiknum. Kokw so bulv daapoho mengdkub agab boolin leng kunum.

²¹Lamta wdu dvkho bulv nampam hoqgv haanbo Simon nvk hvl benam nyi ak nootu banv sipai tulungv Jisug daapongam jool wg mvdwb ninlwqnum. (Simon Siren gvda hoqg nyiv hoo mwv Alekjendar la Rupaswg abv.)

²²Bulv Jisun Golgota hvl benam “Dungklo alo Nyook” hvl eminam nyookub bool wgnum.

²³Ho bulv norbo sulum mam opo ho mviyo tvl Jisun jinum, hvbmabde mwv ham twwrwq maanum.

²⁴Kokw so bulv mwam daapo hoo mengknum ho mwwg vjam hiyv hogloq rummam naakin dvn ham tak kaal mvpin mvral naaknum.

²⁵Doonyiv caada dukho bulv Jisun daapo ho mengknum.

²⁶Mwam yolu bigwl pota xeqnamv, “Juhudi tulug Lvpw Atv.”

²⁷Jisun mengdwk ho bulv nyic nyi vnyi go Jisug lvqbwq taqcib akwn hoo laqc taqcib akwn mengnum.

²⁸Otuqho dvrwqbo Potag Xeql apkunv niqtuqb nyilin kunum “Mwam nyicbo lvgab xita kunum.”

²⁹Lamtaho wpeq bo nyi tulungv bulug dumpongam dumpwql tob-taiyil Jisun benum, “Oa! No Xumk nammam sapia tvl aal loumho mvdar bov!

³⁰Ho no sija atam ywwsto ho daapo hoqgv ipoq tuku!”

³¹Hoq hvb nyub buda tulungv hoo Pvvb tomswrbo tulungv Jisun bej beparl bulv bemin sul benum, “Mwv nyi asaqkam ywwnum hvbmabde mwv atam ywwny suma!

³²Israel tulug lvpw at, Ywwnbo akam daapo toloqgv ipoqnam mam kaaya tuj hoo ngulv mwam mwwjw tayin!” Jisun mengdwk ho mengtaqnam nyi vnyiv kam mwam tob taiyil benum.

³³Kokw so doonyi hwrj dvk ditaq hoqgv gvda gvt mwlwho mood oum go kanv pulub ap kunum.

³⁴Doonyiv itoq dvkho Jisu vc alwb sogoql benum, “Ili, Ili, lama sabaktani?” hvgdvn hv, “Ngoqg Pwnbo, ngoqg Pwnbo, no hoggub ngam apaq gvikun?”

³⁵Hoq ogumho daqnbo nyi tulungv bulv tuugin soq benam sam tatwl benum, “Kaaiyat mwv Ilijanvn goql doodo”

³⁶Bulug akwn xarbnv roo ala kusuq boam hiipuho mvbam tvl toolo niqtuq golo cabgab tvl Jisug agamhv xwqca jitwl benum, “Kaaiya tuj, Ilija haal mwam daapo toloqkam naapoqnam mam ngulv kaatuj!”

³⁷Jisu vc jaqb sogoql siknum.

³⁸Ho Xumk nam hoqg vj torciqnan vjv tvqnyi gob odum hoqgv akob swrc kunum.

³⁹Daapo ogumho daqnbo sipai saab akv Jisu hoggub nyil siknum ham kaanum. Mwv benum, “Soq nyi ak si jvqtw jaqb Pwnbog Ko Tuup goj kunyi!”

⁴⁰Hoq ditaqho nyem dvn ata go aado hoqgv daqtul kaal doonum, bulug pengko hoo Meeri Magdalin, Jemsig la Josap ann Meeri hoo Salomi bulv doonum.

⁴¹Bulv Jisu Galiliho doodwk hoqgv Jisug kokw kokwb wmin gvl mwam svkanum. Mwwg dookub Jerusalemb haamin gvnbov nyem dvnv kam vigo hoqho doonum.

⁴²Ariyum kan dukho Arimatiya nampam hoqg Josapvk hvl benam Dookum hoqg xinam nyi akgob mwv nyinum.

⁴³Mwv haata bo Pwnbog Lvpwngam kaayal doonum. Hoq aalhv Doonu ko aal gab mwx-mvaql dood alwb nyinum (Doonu ko aalv haama daab.) Kokw so Josap haakam alwb Pilat dookub haabnv mwam Jisug svmangam jitbvk hvl konum.

⁴⁴Jisu sipa kuk hvl benam mam Pilat tatwl lomnum. Mwv svqc maab sipai saab akam goql toxnum, “Jisu hwdlo sipa kun.

⁴⁵Sipai saab akwg benam mam taxo tvl Pilat Josapnvn svmangam naatwk hvl gaml jinum.

⁴⁶Josap svmangam joolayil kwlwq-kvlaqbo topum vjam tumtwl, wlw lwwn uraho dukoqnam nyubu golo liinum. Kokw so mwv wlw pwt albo pwg nyubu ungngam ngurxal ngurtum apnum.

⁴⁷Meeri Magdalin hoo Josapg ann Meeri bulv kaal doonum ho Jisug svmangam hoglo apnum ham bulv kaanum.