Read Nyishi MARK 16 Bible Online

MARK 16 - Nyishi bible

MARK 16

¹Doonunam aalv wxo kokw so, Meeri Magdalin, Jemsig ann Meeri hoo Salomi sungam albo kutiam rvlayil Jisug svma aoho needwb wtanum.

²Doonu de arkomc, doonyiv caalin kalam bulv nyubwb wnum.

³lamtaho bulv bemin sul wnum, “Hiyv ngul gab nyubu bug toloq wlw tvlam ngurpaq jitayin?” (Hoggab hoq wlw hv pwt alnum).

⁴Kokw so bulv kaaknamv wlwngam ngurgin ap kunam mam kaapanum.

⁵Ho bulv nyubu urab haal bulv nyi yaapa ak vj jipu kootwl lvqbwq taqc ho tuul doonam mam kaapanum hoo bulv bosil lomnum.

⁶Mwv bulam benum, “Loml bos maabv, ngo cengdo nulv Najaretwg Jisun daapo ho mengknam akam meegaqdo. Mwv so dooma, mwam turdkub purab pakun! Mwam joopwl apkov si doodo, Kaato.

⁷Hvbmabde wg dukul nulv Pitornvn la mwwg buu tulungam soq pui sam baqkinta. “Mwv nulug otuqb Galilib wco nukun, mwv nulam otuqho benam hvb nulv alo mwam kaapa tayin.’”

⁸Kokw so bulv nyubu hoqgv lengknv tvmdwr hwql mwwdwq kunv xaal kenum. Bulv hiyv nvkam hog bek maanum, hoggab bulv bos sonum.

⁹Doonu de arkomc Jisu sipekul turkur dvk kokw so otuqjaqb hiyvg ura hoqgv oram kvngo ruqpaqnum hoq Meeri Magdalinnvn kaatamnum.

¹⁰Mwn wknv xabl-ril doodubo Jisug otuq ajin tulungam puiyam bekinnum.

¹¹Hvbmabde mwn Jisu turab paku hoo mwnwn kaakin pakun hvl bekinam mam bulv tvjw maanum.

¹²Hoq kokw so Jisu ok oksub nyil bulug pengko lo vnyi gonam kaakinum, bulv nampamb lamtaho wdunum.

¹³Bulv wkur kunv nyi asaqngam bekinnum, hvbmabde bulug benam mam bulv tvjw maanum.

¹⁴Kokw jaqso, Jisu buu wyw leq akinam bulv dudul doodwkho kaakinum. Mwv bulam yolu benum, hoggab bulv mwwjwngam doog maanum hoo bulv mwwg sipekul turkur kunam puiyam benbo tulungam tvjw maab hang vdwko gab benum.

¹⁵Mwv bulam benum, “Nulv wgdvl gvda gvt mwlwngam, nyia ko mwlwngam Tugu Puiyam bekinta.

¹⁶Hiyv akgon mwwjwl baptijum naatayin mwam ywwtayin, hoo hiyv nyiv mwwjw maatayin mwv sitayin.

¹⁷Mwwjwbo tulungam swrdorxeqb nyinam bonam nyim dvb jitayin, ho bulv sony oram mam ngoqg emin gab ruqpaq tayin, bulv agam oksunbo nit nit agam mam gootayin.

¹⁸Bulv tvbam naarab bejaqkam ho hoqg cumdwqkam twwjaqkam bulv hog nyiram, bulv vcbo nyi tulug aoho alaq idaqtayin hoo bulv al taikun.”

¹⁹At Sw Jisu bulug dookub gooxo kokw so mwam ao gvdab booca kunum hoo Pwnbog lvqbwq taqc ho doom gvnkun.

²⁰Kokw so buu tulungv gvda mwlw wknv Tugu Puiyam bekarnum, hoo At Sw bulug dookub doobal swrdorxeqb bonam nyil bulug pui benam hv jvqtwngvk hvl kaakinum.