Read Nyishi MARK 4 Bible Online

MARK 4 - Nyishi bible

MARK 4

¹Lokta Jisu Galili swnyiq bviywrho tomswr swrabnum. Nyiv mvqlw jaqgo mwwg ogumho pumkum ko-gab mwv swp aob caonv hoq uraho doonum. Swpv iss aoho doonum hoo nyi tulungv iss bviywr sugurho daqnum.

²Mwv doocil bulam vigo tomswrnum, bulam mwv benum.

³“Tagabto! Lok nyi ak doonum, mwv ampaq paqtab wnum.

⁴Mwv ampaqngam paqdwkho, ampaq tuugin lamta hoo hopnum, ham pvtangv jara banv pal dvnum.

⁵Ampaq tuugin wlw aohv ked jwwkam maakho hopnum. Kedv jwwkam maagam gab cox alwb goos banv beqlinum.

⁶Hvbmabde kokw so doonyiv caalin yukam ham doonyiv xomdaq yukam rwb mvmiv ked urab koigo haama gab kokw so sengknum.

⁷Ampaq tuugin taa-haataq ww aoho hopnum. Kokw so taa wwngv swwrab kunv ampaqngam doqyub tukul vmlyw lengk maanum.

⁸Hvbmabde ampaq tuugin ked albo aoho hopnum, hoq tuluhv goosil swwrab kunv vmlyw baqnum, tuugin vmlyw cammumbv, camxbv, hoo tuugin lwwgbv nyinum.”

⁹Hoo bitwr-benya so Jisu benum, “Nulug nyurungv dood nyiloqkam tagabto!”

¹⁰Kokw so Jisu vpwb doodwkho mwwg benam mam tanbo nyi tulu gon mwwg wyw leq vnyi buu tulungam boolayil mwwg dookub haabnv hoq doocnam hoqg bvrwq niqtuqngam bekin tvbwk hvl mwam benum.

¹¹Jisu bulam birwqnum, “Pwnbog lvpw hatig ura bvrwqngam nulam cengm dvb goopa kun.” Hvbmabde agaho doonbo nyi tulu gab bulv hog mwlwngam doocil bedwb tas tayin,

¹²Hoqgab “bulv kaagamv kaastayin, hvbsujaqkam kaacinram, bulv tagamv tas tayin, hvbmab tacin ram. Bulv hvb nyiloqkam Pwnbog dookub hookur nyiloqkam mwv bulam apaq jis paco.”

¹³Kokw so Jisu bulam toxnum, “Nulv soq doocil benam sam tacin ma i? Nulv sam tacin manyiloqkam hoggub nyil doocnam samkam tacin nyotayin?

¹⁴Ampaq paqnbo akv Pwnbog puiyam paqdwn.

¹⁵Nyi tuugin lamtaho am ampaq hopbo hvb nyidwn, bulv puiyam tapa daqkalam uiyv haabnv ham naareql wg gvdkun.

¹⁶Nyi tuugin wlw aoho hopbo am ampaq hvb nyidwn, bulv puiyam tapa daqtwl hemp jaqb svgagvrwq dvn.

¹⁷Hvbmabde hoq puiyv bulug hang urab haama ko-gab bulv ham oyugo mwwjwl ap nyoma dvn. Hoggab kokwngam nyelin dorsv la mvnyi-mviyanamv puiyam mwwjw ko-gab haaikam bulv nyebia alwb apaq dukun.

¹⁸Nyi tuugin taa-haataqho hopbo am ampaq hvb nyidwn, soq nyi tulu si puiyam tagab sutayin,

¹⁹hvbmabde atwg nyet-nyeram swwgam abybol, hog mwlw hangwg mwwnam mam mwwg puiyam ceqxiadvn hoo kokwngam bulv aaxy xeema dukun.

²⁰Hvbmabde nyi tuugin ked albo ho hopbo am ampaq hvb nyidwn. Bulv puiyam tatwl, svgagvrwq dvn, hoo aaxy xeel tuugin cammumgo, tuugin camxgo hoo tuugin lwleqgo aaxy xeedwn.?

²¹Jisu hvraqb benum, “Hiyv nyiv muram bvalayil huc uraho kulub ap maadwn, hvbmab kartaqnam niikum uraho ap maadwn. Hvbmabde mwv mur tvdaqnan aoho apdvn.

²²Hognvkam kvsil ciil ap pakun ham agaho huulin tayin ho hognvkam kulub ap pan ham kulubnanam naaxa tayin.

²³Hoqgab nulug nyurungv dood nyiloqkam tagabto!”

²⁴Mwv sam kam bulam benum, “Nulv hognvkam tadwn ham hindib mwwgabto! Nulv hognvk pw-hwwcwb nyi asaqkam pw-hwwdwn hoqhvb kalam nulam Pwnbov pw-hwwtayin, ham laabo yaab nulam vbwl jitayin.

²⁵Hiyv nyiv meeg doogdvn ham vigota jibwtayin hoo hiyv nyiv hog gokam doog maadwn mwwg galoqkv mwwg vcwr go doognam ham kam naareq dvb nyitayin.”

²⁶Jisu hvraqb benum, “Pwnbog Lvpwngv rongo ho am paqnbo nyi akwg lvgab doocnam hvb nyidwn.

²⁷Mwv aiyam yubdwn hoo aalam huurab dvn, hoo ampaqngv goos kunv swwrab dukun. Hvbsujaqkam hoggab nyil soq si swwdwn ham mwv cengma dvn.

²⁸Ked atv ammam swwm dvb jidwn hoo aaxy xeedwb jidwn. Otuqjaqb ok beqlinv hoq kokwb ompungv, hoq kokwb vmcirv lengdwn.

²⁹Kokwngam vmcirv ningly kukam nyi akv mwwg lyoqciq lvgab ham geqdkun, hoggab dvn naad moodv haapa ku.

³⁰Jisu benum, “Pwnbog Lvpwngv hoggub nyidwn ham hognvk lvgab dooc natayin? Hvbmab hognvkam doocil sam betayin?

³¹Soq si sib nyidwn. Ywwm aaxiv mwlw aaxiam gvda gvt so cinyio yaadwn; ham ak naalayil ked hv liidwn.

³²Hoq aaxiv swwrab banv nwmw mwlwngam nwwt yaan bob nyidwn hoo hoq haqbv haqt al banv hoo haqbho pvta tulungv osup subgwl doonyium ho doodwn.”

³³Soq sib vigo doocil Jisu nyi tulungam mwwg puiyam benum. Mwv nyi tulungam hog hwdgo tadwb mwwnum hwdgo bulam bekinnum.

³⁴Mwv doocil goomab agam goomanum, hvbmabde mwv vpwb mwwg buu tulug lvgab dooikam mwv hog mwlwngam bulam bekinnum.

³⁵Hoq aalwg Ariyumho Jisu buu tulungam benum, “Kuj ngulv swnyiq kvtin gonwb rabnyia nuj.”

³⁶Hoq nyi acammam bulv apaqpel, buu tulungv Jisug doogwnam swp uraho caonum hoo bulv mwam bulug lvgab wgnum. Hoqho swp asaqngv kam doonum.

³⁷Haqmapaq golo doogum dooi koi albo ak yinum hoo issiv xoqb nv swpam urab baqnum, hoqgab swpho issiv haanum.

³⁸Jisu swp tuurgonho dumtam ak golo dumpongv dumdaq tvl yubl doonum. Buu tulungv mwam muu banv benum, “Tomswrbo, ngulv sita dukun lak, no ngul gab mwwdwq maadwn i?”

³⁹Jisu daqrab banv dooiyam gaml jil benum, “Cooikab dooto!” hoq kokwb issam benum, “Biimab!” Kokw so dooiyv niiknum hoo hog mwlwngv cooikab doonum.

⁴⁰Jisu mwwg buu tulungam benum, “Nulv hoggab bos sodwn? Sija godab nulv mwwjw maadwn i?”

⁴¹Hvbmabde bulv bos soma vrram sobnv akwn akwn bemin sunum, “Soq nyi ak si hiyv? Mwam dooiyv kam hoo issiv kam mwwg gamlam tado!?”