Read Nyishi MARK 5 Bible Online

MARK 5 - Nyishi bible

MARK 5

¹Kokw so Jisu la mwwg buu tulungv Galili kvd gonho doonbo Gerasa gvdaho wc kunum.

²Jisu swp hoqgv ipoq kalam twqda nyubu butaq hoqgv nyi ak lengb nv wrwqnum. Soqg nyi ak soq uraho sonyiv doonum

³ho mwv nyubu butaqho doonum. Mwam hiyv nyiv kam lyoqdwr gai tulu lvgab liitul ap nyomanum.

⁴Mwwg all alaqkam leetwl vigo ap kaakanum, hvbmabde luuxy-ceram mwv vmwq yumgub mwwg all alaqho leennan lyoqdwr gaiyam mvmwqnum. Mwam hiyvkam munyiubl ap nyoma dvb mwv ator torma vrram tornum.

⁵Ai aalwb mwv nyubu butaq hoo yorn yorxib sogoq goqkarl atam wlw ho tubsul yvnum.

⁶Hwdlo mwv meeg aado ho doodwkho mwv Jisun kaapanum. Hoqgab mwv Jisug agaho lwbw kumbwl

⁷hoo sogoq kiirl vc alwb nool benum, “Mwlwngam koi yaanbo Pwnbog Ko Tuup Jisu! No ngam sija hoggub mvtayin? Pwnbog emin gab ngo nam xuml bedwn, no ngam laqm-baqm maabv.”

⁸Hoggab Jisu mwam benam, “Almanbo yal, soq nyi ura soqgv lengt ku!”

⁹Hoqgab Jisu mwam, “Noqg eminv hognvkv?” hvl toxnum. Nyi akv mwam birwqnum, “Ngoqg eminv Mvqlw,” ngulug dvparho ngulv vigo doodwn.

¹⁰Ho mwv Jisun mvnyi-moiyul bulam hoq nyook hoqgv ruqlin maabwk hvl benum.

¹¹Hoq ditaqho yorn ao golo iriq riqtw go dvgaql yvnum.

¹²Hoqgab bulv Jisun mvnyi-moiyul benum, “Ngulam aloq iriq tulug dookub kanam tvb hoo ngulam bulug urab haam dvb jitwb.”

¹³Mwv bulam hoqb wwm dvb gaml jinum hoo almanbo yal tulungv hoq nyi ura hoqgv lenglayil iriq tulug urab haanum. Kokw so iriq tulungv swnyiq deetam hoqgv swnyiq urab jvrlwql sin bov lwwyw vnyi gob nyinum.

¹⁴Iriqngam rvkybo nyi tulungv wknv puiyam nampamho la rongo rwqtaqho dukarnum. Ho nyi tulungv hognvkv nyipa kun ham kaatab wnum.

¹⁵Bulv Jisug ogumho almanbo yalv nootunam ui yucam mam doogbo nyi akam vj kootwl doodwb kaapa tvl bulv mwlwngv boswl lomnum.

¹⁶Almanbo yalv nootunam nyi ak ham hoo iriq tulungv hoggub nyiknum ham kaanbo nyi tulungv bekinnum.

¹⁷Hoqgab bulv Jisun bulug gvdangam apaqpel hoqgv wnkuk hvl benum.

¹⁸Jisu swp urab cao daqyikam almanbo yal nootunam nyi akv xuml benum, “Ngam noqg dookub wba mvtwb!”

¹⁹Hvbmabde Jisu mwam biturnum, hvbmab mwam mwv benum, “Nampam wkur gvdwl noqg imiq nyi tulungam Pwnbov nam hog hwdgo aya pakun hognvkv noqg gab nyij pakun ham bulam bekinta.”

²⁰Kokw so hoqgab hoq nyi akv hoqgv wknv Jisu mwam gaml jinam hvb nampam wyw taqt mwlwho Jisu mwam hoggub mvnum ham bekinl yvnum hoo mwwg puiyam tanbo nyiv mwlwngv deedyjaq gokbo hvl lomnyanum.

²¹Jisu swnyiq kvtin gonwb lokta robkur kunum. Ho mwv wkur dukho nyi nyiitw mvqlwngv mwwg dookub haabnv mwam hwwywql hwwbumnum.

²²Ho Sinagog rvkybo Jairas hvl benam nyi koibo ak haanum.

²³Mwv Jisun kaapa tvl Jisug lvpia lwkwho kumbwl mvnyi-moiyul benum, “Ngoqg nyem ko anyo akv vc cigwqpa, anya mwwpal no haag dvl mwnwg aoho alaq idaq tvbv, ho mwn al taikun hoo swwtayin!”

²⁴Kokw so Jisu mwwg dookub wmin gvnum. Nyiv vigo twwt jaqg Jisu dookub wmin gvnum ho mwam taqg-loosaqb pumbumnum.

²⁵Hoqho vnyw nywyw leq nywnyig namc ui sarl doonbo nyem ak doonum.

²⁶Mwnwn nyubv vigo ui paknum, hvbsujaqkam mwn al kumanum. Mwn twngk-tayin ho gumnam vigo hiqknum, hvbsujaqkam mwn vi-vi yaiya go alkumab nyiknum.

²⁷Mwn Jisug puiyam tapanum, hoqgab mwn nyi tulug urab haabnv Jisug kokwb langkwb rumin gvnum.

²⁸Ho mwn atv atam besnum, “Ngo mwwg vjam idaq twqbalo ngoqg vcv al taikun.”

²⁹Mwn Jisug vjam idaqkalam twqda nyem ak hoqg namc ui sarnamv sarngin kunum hoo nyem akv mwnwg hang urahv mwnwg nyelin-dors hoqgv al pak nvbo hvl atv mwwsnum.

³⁰Jisu mwwg gv hoqgv atoram lengnam mam hempa daqtwl mwv nywkur banv nyi tulungam toxnum, “Hiyv ngoqg vjam gvbw bov?”

³¹Mwwg buu tulungv mwam birwqnum, “Nyi tulungv nam pumbum do ham no koodum tvl no hoggub toxdvn hiyv ngam idaq pan hvl?”

³²Hvbmabde Jisu mwam alaq idaqbo nyem akam kaadwb kaagaqnum.

³³Nyem akv mwnwn hognvkv nyipa kun ham cengknum, hoqgab mwn bos sol tvmdwr hwqbnv Jisu lvpia lwkwho kumbwl mwam hog mwlwngam jvqtw jaqb bekinnum.

³⁴Jisu mwnwn benum, “Ngoqg nyem ko noqg mwwjwngv nam al dukub mwp paku, hoo noqg vc-ai hoqgv al tuku.”

³⁵Jisu soq sam bidul doodu dvkho Jairasg nam hoqgv pui baqabo nyi tulu go haabnv Jairasnvn benum, “Noqg nyem kov sipa ku. Hoggab no tomswr boam bisup-beyab dvn?”

³⁶Jisu bulug benam mam tvmw kaayab tanum, hvbmabde mwam benum, “Bos maabv, mwwjw twqto.”

³⁷Hoq kokw so mwv hiyv nvkam mwwg kokwb wmin gvdwb Pitor, Jems hoo mwwg bor Jonwg aoho jimanum.

³⁸Bulv Jairasg namho wc kunum hoo Jisu nyi tulungam mwwdar lamab xabl nyiqs-tanap rooxob hvvdwq dwql doodwb kaapanum.

³⁹Nam urab haabnv bulam benum, “Nulv hoggab xabl nyiqs-tanap dil mwwdar maab hvvdwq dwql doodwn? Hoggab nulv xobdu dvn? Nyem ko ak si sima sulak, mwn yubl doos dvn lak!”

⁴⁰Bulv mwam nyirj-nyirparnum, hvbmabde mwlwngam agab roolin tvl, nyem ko ak hoq ab, ann hoo mwwg buu tulug oum gon mwwg dookub boal nyem ko dook cwrwb haanum.

⁴¹Mwv nyem ko alaqngam gvbw tvl benum, “Talita koum,” Hvgdvn hv, “Nyem ko anyo, ngo nam gorab tuku hvdwn!”

⁴²Mwn nyiory alwb gorab kunv wkar-war yvnum. (Mwn vnyw nywywleq nyinyi kunum) ham kaatwl bulv deedyjaq gokbo hvl lomnum.

⁴³Hvbmabde Jisu bulam hiyv nvkam soq bvrwq sam bemabvk hvl atorjaqb yvtw panum, hoo mwv benum, “Nyem ko ak sam hog dvs loq jito.”