Read Nyishi MARK 8 Bible Online

MARK 8 - Nyishi bible

MARK 8

¹Oyu maadab, nyi acam gota olum gob hookum nyanum. Kokw so nyi tulungv bulug dookho hog dvs dooma dukukho, Jisu mwwg buu tulungam mwwg ogum goqa banv benum,

²“Ngo soq nyi tulu sam aya mwwpa do, hoggab bulv soolo ngoqg kokwb wl yvnamv aal loum paku, hoo bulug dvs vcwr gokam dookma.

³Ngo bulam hog dvdwb jimab bulug nammwb kanam nomkur kublo bulv tuugin lamtaho wnyi kumab tapto tai, hoggab bulug pengko lo tuugin lamta aado hoqgv haapa.”

⁴Mwwg buu tulungv mwam birwqnum, “Hogloqgv mooro lvpa so hiyv dvs kaapal swd nyi tulu sam dvdwb jinyi tayin?”

⁵Jisu toxnum, “Nulug dookho wtwngv toqkgo doodo?” Bulv birwqnum, “Wtwngv kvngo doodo.”

⁶Mwv nyi tulungam ked aoho doatvk hvl gaml jinum. Hoq kokwb mwv wtw kvnam bvvtwl Pwnboam paql wtwngam pingmwql mwwg buu tulungam jitwl nyi tulungam jimnum ho buu tulungv bekjaqb nyinum.

⁷Bulug dookho ngui cinyiobo cinyi-cirum gokam doonum. Jisu paqyalinco hvl paqtwl ham mwwg buu tulungam horm dvb jinum.

⁸Nyi tulungv dvdeq dvb dvnum. Hoqho nyiv lwwyw vpy gob doonum. Kokw so buu tulungv dvleqngam dorkum kunamv huc kvn jot kvlgo dooknum.

⁹Jisu nyi tulungam kanam tukul mwwg buu tulug lvgab

¹⁰swp aob cao kunv Dalmanuta gvdab wknum.

¹¹Parisi acamgo Jisug dookub haabnv, mwwg lvgab haqyaq minsul benum. Bulv mwam nootu dvb pookal Pwnbov mwwg lvgab doonam mam kaakin dvb swrdorxeq nyinamlo nyil kaakin tvbwk hvl benum.

¹²Hvbmabde Jisu vc alwb soqsul benum, hoggub nyitwl swnyw-soolo nyi tulu si swrdorxeq nyinam mam kvvnw pak hvdwn? Ngo nulam jvqtw jaqb bekin dvn, swnyw-soolog nyi tulungam hog swrdorxeq nyinam go kaakin dvb nyiram.

¹³Bulam apaqpel mwv swpwb robkur kunv swnyiq kvd gonwb rabknum.

¹⁴Buu tulungv mwwpa kumab wtw vigo baqkmab nyinum.

¹⁵Jisu bulam yvtw pal benum, “Nulv Parisi tulug opap hoqgv hoo Herodg opap hoqgv hengab nyiato.”

¹⁶Bulug pengko ho goomin sunyianv benum, “Mwv soq sam benam si ngulv wtw dooma jitwl bedo.”

¹⁷Bulv hognvkam benum ham Jisu cengtwl bulam toxnum, “Nulug wtw doomako gab hognvkam goodu gvdwn” Nulv sija godab nulug hangam paca jaqb mvdwb ap pan i?

¹⁸Nulv vnyiq baqtwl, kaapa maadwn i? Nulv nyurungv gvtwl nulv tapa maadwn i? Nulv mwwpa ma i?

¹⁹Ngo wtw taqangam pindubl nyi lwwyw ang gam dvdwb jinam mam nulv kama i? Ho huc cikgo dvngongam nulv dorkum kunum?” Bulv birwqnum, “Huc cwyw leq cinyi go.”

²⁰Hoq kokw so wtw taq kvnam pindubl nyi lwwyw vpiam dvdwb jidwk ho huc cikgo nulv dvngongam dorkum kunum? Bulv birwqnum, “Kvn go.”

²¹Hoqgab mwv bulam benum, “Nulv sija godab tacin maadab doodwn i?”

²²Kokw so bulv Betsaida nampamho haad kukho nyi atago nyiqca bo nyi ak Jisug dookub boanum hoo mwam nyiqca bo nyi akam alaq idaqtvk hvl mvnyi-moiyul xuml benum.

²³Jisu nyiqca bo nyi akwg alaqngam gvbw tvl mwam nampam hoqgv agab boolinum. Kokw so nyiqca bo nyi akwg vnyiqngam tacorv curxab tvl mwwg aoho Jisu alaq idaql mwam toxnum, “Hog kaapa do i?”

²⁴Nyi akv nywrab kaatwl benum, “Vv, Ngo nyi tulungam kaapa do, hvbmabde bulam svvn go wgaql yvdwn hvbjaq kaado.”

²⁵Jisu kokw so lokta hoq nyi akwg vnyiq aoho alaqngv idaqnum. Ho sija hoq nyi akv hog mwlwngam kaadarl kaapanum ho mwwg vnyiqkv lokta kaapa kunum.

²⁶Jisu kokw so hoq nyi akam yvtw pal gaml jinum ho nammwb kanam kunum ho bilwqnum, “Nampam urab wkur kumab.”

²⁷Kokw so Jisu mwwg buu tulug lvgab Sijariya Pilipi gvdaho doonbo nampam tulub wnum. Lamtaho wjo ywwtwl mwv bulam benum, “Nyi tulungv ngam hiyv hvl bedwn?”

²⁸Bulv tuugin birwqnum, “No Jon Baptist sulak,” tuugin benum, “No Ilija sulak,” ho tuugin benum, “No nyiqry benbo tulug pengko hoqg akwn?”

²⁹Bulam mwv toxnum, “Nulv hog hvdwn? Nulv ngam hiyvjaq hvdwn?” Pitor birwqnum, “No Ywwnbo ak hv sulak.”

³⁰Kokw so bulam yvtw pal gaml jil benum, “Hiyv nvkam ngoqg bvrwqngam bekin maab.”

³¹Kokw so Jisu mwwg buu tulungam tomswr swrabnum, “Nyia Ko Tuupv hemanam hentwram hendwb nyiky tayin hoo mwam nyi axa tulungv, nyub buda tulungv hoo Pvvbam tomswrbo nyi tulungv haqpaq tayin. Mwam meng tayin. Hvbmabde aal loum kokwngam mwv lokta swwgwb turkur tayin.”

³²Mwv soq sam bid lalal bulam tadar cekar dvb bekinnum. Hoqgab Pitor mwam boogin banv yolu benum.

³³Hvbmabde Jisu kaakar-taar banv mwwg buu tulungam rogabl Pitornvn yolu benum. Mwv benum, “Ngoqg ogum soqgv wleqto Ui! Noqg hang mwwnamv Pwnbog galoqkv haama dvn, hvbmabde nyia ko galoqkv haadwn!”

³⁴Kokw so Jisu mwwg buu tulungam la nyi tulungam mwwg ogumb goqanum, “Hiyv nyi akgon ngoqg lvgab wdwb mwwdwn, mwv atam mwwpaq sudub nyitayin hoo mwwg atwg daapongam jool ngoqg kokwb wdwb nyitayin.

³⁵Hiyv nyiv atwg swwgam ywwdwb mwwdwn, mwv ham niim tayin. Hvbmabde hiyv nyiv atwg swwgam ngoqgab hoo tugu pui gab niim dvn mwv ham niim mvmab ywwtayin.

³⁶Nyi akgon gvda gvt mwlwngam kaapa doog tvl atwg swwgam niim baloqkam mwwg swwnamv hognvkv niqtuqkv doodwn? Hog niqtuq dooram!

³⁷Mwwg swwgam kaapa pookur dukub mwv ham kwly naak dookram.

³⁸Hiyv nyiv ngoqgab hoo ngoqg agam gab soq yocu-yabio gvla nyimur nyinbo nyi tulug agaho hvnyw dvn, nyia kov mwwg Abwg yuunam atoram baqlayil dvrwqbo ao gumtw tulug lvgab ipoq yukam mwv mwwg aoho hvnyw tayin.”