Read Nyishi MARK 9 Bible Online

MARK 9 - Nyishi bible

MARK 9

¹Kokw so mwv hvraqb bulam bvl wnum, “Ngo nulam jvqtw jaqb bedwn, nulug pengko si Pwnbog Lvpwngv xitor-xilob haanam mam kaapa maady deedib simab doody bo nyiv doodo.”

²Aal loox kokw so Jisu Pitor, Jems hoo Jonnvn yorn ao albo golo boocanum. Bulv doodu dvb Jisug nyuqtuq-moorv swly yirabnum.

³Mwwg vjv puulu huuda kvlal gvda gvt so niixaqnam mwlwngam huubin yal huunum.

⁴Kokw so buu oumv Jisug lvgab Ilija la Mojes goorwq minsdvb kaapanum.

⁵Pitor kokw so Jisun benum, “Ngulv soq so doonam si aljaqpa, Tomswrbo; Ngulv tombulo oum go mvtju, akwn noqg gab, akwn Mojes gab ho akwn Ilija gab.”

⁶Hoggab mwv la mwwg ajin tulungv bos aljaqnum ho mwv hog bes mwwdar kumab nyinum.

⁷Hvb nyidu dvkho haapam olumgo bulam hwrlubnum hoo agam yal ak haapam olum hoqgv dulinum, hv benum, “Soq si ngoqg tumanam Ko Tuupv, mwwg benam mam tagabto!”

⁸Bulv nyebia alwb kvvyiq-taxeql kaanum, hvbmabde bulv nyi akam kaapa maanum, Jisu aro bulug dookho doonum.

⁹Bulv yorn hoqgv idkuk ho Jisu bulam yvtw pal benum, “Nulv hiyv nvkam Nyia Ko Tuupv sipekul sinam hoqgv turab kunam gob, nulv hognvkam kaapa kun ham akukam bekin maab.”

¹⁰Bulv mwwg gamlam tanum, hvbmabde bulug pengko ho bulv atv atv bvrwqngam hwwbamnum, “Sinam hoqgv gorabnam” hvgdvn si hognvkv yu?”

¹¹Hoqgab bulv Jisun toxnum, “Hoggab Pvvbam tomswrbo nyi tulungv Ilija otuqjaqb haaco tayin hvl bedwn?”

¹²Jisu birwqnum, “Ilija jvqtw jaqb hog mwlwngam mwx-mvaql otuqjaqb haaco tayin. Hvbsujaqkam, hoggab Dvrwqbo Potangv Nyia Ko Tuupv hentwram hentayin hoo haqpaq dvb nyitayin hvl bedwn.

¹³Ngo nulam bedwn, Ilija haaxo lopaku ho nyi tulungv mwam mwwg pagoqkam bekjaqb mengnukun.”

¹⁴Kokw so bulv asaq buu tulungam kaapa dukho bulv nyi nyiitw mvqlwgo bulug taqg-loosaqho kaapanum, Pvvb tomswrbo nyi atago bulug lvgab haqyaq minsul doonum.

¹⁵Kokw so nyi tulungv Jisun kaapa tvl loma vrram loml mwwg dookho xumal haanum.

¹⁶Jisu mwwg buu tulungam toxnum, “Nulv hognvkam bulug dookho hoqdu gvdwn?”

¹⁷Nyi tulug pengko hoqgv nyi ak birwqnum, “Tomswrbo, ngo ngoqg ko tuupam noqg dookub boapan, hoggab mwwg uraho almanbo yalv doodo, hoqgab mwv agam goonyi ma.

¹⁸Sony oram yalv mwam muduqkalam, mwv ked lo geqp dvn. Mwwg agam hoqgv tacor xupiqkv lengdwn, hoo mwwg exiv dvxeq dvn, hoqgab mwv kwwdwn. Ngo noqg buu tulungam oram mam ruqpaq tvbwk hvl benum hvbmabde bulv ruqpaq nyomanum.”

¹⁹Jisu bulam benum, “Mwwjw maanbo nyob tulu, ngo nulug lvgab hog hvd aal go dooba tayin? Ngo nulam hog hwdgo cwqtayin? Ngoqg ogumb nyega koam boata!”

²⁰Bulv nyega ko akam Jisug ogumb boanum. Almanbo yalv Jisun kaapa twqda kalam ko akam kedhv geqp dvb sima dvb, agam hoqgv xupiqkv lengl geqkar yvdwb mvnum.

²¹Jisu ab akam toxnum, “Mwv soq sib nyinamv aal look pakun?” Ab akv birwqnum, “Ko anyojaq hoqgv.”

²²“Almanbo yalv vigo mwam twrdwb wm gvla iss urab tulwqnum. Hvbmabde no ngulug aoso anya mwwpal no ngulam mwwd nyiloqkam svka tvbv.”

²³Jisu birwqnum, “Vv, no mwwjw baloqkam! Hog mwlwngv mwwjwbo ak gab nyipw maab nyitayin.”

²⁴Ab akv nyebia jaqb birwqnum, “Ngo mwwjw dvn, hvbmabde koi yooma. Ngam koigo mwwjw mvdwb svka tvb!”

²⁵Jisu nyi tulungam ciqkum-ciqlum nyinam mam kaapa tvl, mwv almanbo yalam gaml ak jil benum, “Ruutarbo hoo paca bo yal, nam ngo gaml jil bedwn, no nyega ko akwg ura asoqgv lengtku hoo nywywngam mwwg urab hookur kumab.”

²⁶Ho almanbo yalv sogoq kiir nool nyega ko akam silo dvb hurtap peekul lengknum. Ko akv sikbo svma looda hvb nyiknum hoqgab vxiv benum, “Mwv sipa ku.”

²⁷Hvbmabde Jisu ko akwg alaqngam gvbwl mwam gorab mvdwb purabnum hoo mwv daqrab kunum.

²⁸Jisu nam urab haaxo kokw so mwwg buu tulungv mwam vpwb toxnum, “Ngulv hog nyitwl almanbo yalam ruqxa nyoma dvn?”

²⁹Jisu birwqnum, “Hog mwlwngv nyinyi ram hvbmabde swgwnam aro hoqgv sam ruqxa nyotayin.”

³⁰Jisu la mwwg buu tulungv hoq nampam mam apaqpel Galili gvdab wpeql wnum. Jisu mwwg dookam hiyv nvkam cengm dvb mwwmanum.

³¹Hoggab mwv mwwg buu tulungam benum, “Nyia Ko Tuupam nyi tulug alaqb gvqlwqtvl mengmpaq mvtayin, hoqgv aal loum kokwngam, mwv lokta swwgwb turkur taikun.”

³²Hvbmabde buu tulungv soq mwwg tomswrnam sam tacin maanam, hoo bulv mwam tox dvb bosnum.

³³Kokw so bulv Kaparnahum wc kunum hoo nam urab haaxo kokw so Jisu mwwg buu tulungam toxnum, “Nulug lamta alo hognvkam gool wnum?”

³⁴Hvbmabde bulv mwam hog birwq maanum, hoggab bulv lamta ho bulug pengko ho hiyv mwlwngam koi yaadwn ham gool wnum.

³⁵Jisu doonu tvl mwwg buu wyw leq vnyiam goqa banv bulam benum, “Hiyv nyiv otuqjaqb doodwb mwwdwn mwv mwlwg kokw ho dootayin hoo mwlwg nyerab swwtayin.”

³⁶Kokw so mwv himy ak bulug lvpaho daqm tvl mwam alaqngv cegab tvl bulam benum,

³⁷“Hiyv nyiv soq ko tulungam ngoqg emin gab svgagvrwq dvn, hoq nyi hv ngam svgagvrwq dvn, mwv ngam xeq svgagvrwq maadwn, hvbmabde ngam kanambo akam kam svgagvrwq dvn.”

³⁸Jon mwam benum, Tomswrbo, ngulv nyi ak noqg emin gab uiyam ruqpaq bog kaapanum hoo ngulv mwam ham nyima bvk hvl biturnum, hoggab mwv ngulug dvpar nyiib swwmanum.

³⁹Jisu bulam benum, “Mwam bitur maabv” hoggab hiyv nyiv ngoqg emin gab swrdorxeq bonam nyidwn mwv ngam ceebio baql kokwngam swwnyiram.

⁴⁰Hoggab hiyv nyiv ngulam ceebiob swwma dvn mwv ngulug gab doodwn.

⁴¹Ngo nulam jvqtw jaqb bedwn, hiyv akgon nulam ngoqg nyiv hvl cengtwl nulam iss juqg twwdwb jitayin, mwv hoggub nyijaqkam mwwg nyijongam niimram.

⁴²“Hiyv akgon soq anyobo tulug pengko so, ngam mwwjw boam mwwg mwwjwngam niim dvb jib nyiloqkam hoq nyi ak ham mwam lwwpo ho wlw pvqlwqtvl sa-svlo urab hurlwqnamv al yaatayin.

⁴³Hoggab noqg alaqngv nam mwwjwngam niim dvb nyic nyim dvb jib nyiloqkam ham pal hurxa to; “Hoggab nywywngam wm miqm ma bo ui nyookub immam lingsam alaq laqkin gon baqtwl Pwnbog lvpwngam kaapanamv al yaatayin.”

⁴⁴Hoqho bulam dvnbo topumv nywywngam sima dvn, ho bulam gunbo wmv nywywngam miqmadvn.

⁴⁵Ho noqg lvpiangv noqg mwwjwngam almadwb mvd nyiloqkam, ham papaqto! Hoggab noqg lvpia lwnyi-lwnyiam baqtwl ui nyookub hurlwq kommam lingsam lvpia lvkin gon baqtvl lvca tvl swwg nyookam kaapal swwnamv alyadwn.

⁴⁶Hoqho bulam dvnbo topumv nywywngam sima dvn, ho bulam gunbo wmv nywywngam miqmadvn.

⁴⁷Noqg vnyiqkv noqg mwwjwngam almadwb mvd nyiloqkam ham kam heqlin hurpaqto, hoggab vnyiq nyiqnyi nyiqnyiam baqtwl ui nyookub hurlwq kommam lingsam vnyiq nyiqkin gon baqtwl Pwnbog Lvpwngam kaapal swwnamv noqg gab al yaatayin.

⁴⁸Hoqho bulam dvnbo topumv nywywngam sima dvn hoo bulam gunbo wmv nywywngam miqmadvn.

⁴⁹“Guun nannam al lvgab nyedar darxaqnam hvbkalam, nyi vxiam wm lvgab parxaql nyedar dvb nyitayin.

⁵⁰“Alv aldvn, hvbmabde al hoqg tiinamv niik baloqkam ham hoggub nyil lokta tiidwb nulv mvnyitayin? “Nulug hang uraho al tiinam mam doogto hoo akwn akwn swrsomalob doobam nyiato.”